ރާއްޖެއަށް ކުރަމުންދާ ވިއްސާރާގައި ގެއްލުންވި ގެތަކުގެ އަދަދު 500ން މައްޗަށް

ރާއްޖެއަށް މިހާރު ކުރަމުންދާ ވިއްސާރައިގައި 500ށްވުރެ ގެއަކަށް ގެއްލުން ވެފައިވާ ކަމަށް ނެޝަނަލް ޑިޒާސްޓަރ މެނޭޖްމަންޓް އޮތޯރިޓީން (އެންޑީއެމްއޭ) އިން ބުނެފިއެވެ.

ރާއްޖެ އެމްވީއާ ވާހަކަދައްކަވަމުން އެންޑީއެމްއޭގެ ޑެޕިއުޓީ ޗީފް އެގްޒެކެޓިވް އުމަރު މޫސާ ފިކްރީ ވިދާޅުވީ ރާއްޖޭގެ ހުރިހާ ހިސާބަކަށް މިހާރު ކުރަމުންދާ ވިއްސާރައިގެ ސަބަބުން ރަށްރަށުގެ ޙާލަތު ގާތުން ބަލަމުންކަމަށެވެ. އެގޮތުން ގެއްލުން ލިބި ރިޕޯޓްކުރަމުންދާ ވަރަކުން ކަމާގުޅުން ހުރި ފަރާތްތަކާ ގުޅިގެން އެހީތެރިވުމަށް މަސައްކަތްކުރަމުންދާކަމަށް ވިދާޅުވިއެވެ. އުމަރުވަނީ އެ އިދާރާއަށް ރިޕޯޓްކުރެވިފައިވާ ކަންކަމުގެ ތަފްސީލް ހިއްސާކުރައްވާފައެވެ.

ރާއްޖޭގެ އެންމެ އުތުރުން ހއ. ހޯރަފުއްޓަށް އުދައަރައި ބައެއް މީހުންގެ މުދަލާއި ތަކެއްޗަށް ވަނީ ގެއްލުން ލިބިފައެވެ. އުދަ އެރުމުގެ ސަބަބުން މަގުތަކުގައި ފެންބޮޑުވެފައިވާއިރު، ވިއްސާރައިގައި ބައެއް ގޭގޭގެ ފުރާޅު ވެސް ވަނީ އެއްލައިލާފައެވެ. މީގެ އިތުރުން އެއްގަމުގައި ހުރި ބައެއް އޮޑި ދޯނި ފަހަރާއި ފައިބަރު ދޯނި މޫދަށް ފައިބާ ގެއްލުންވެފައިވެއެވެ. އަދި ހޯރަފުށީ އެއަރޕޯޓްގެ ރަންވޭއަށް ވެސް އުދައިގެ އަސަރު ވަރަށް ބޮޑަށް ކޮށްފައިވާއިރު އެއަަރޕޯޓަށް ދާ ހައިވޭއަށް ވެސް އުދައިގެ ސަބަބުން ބޮޑެތި އަސަރު ތަކެއް ވަނީ ކޮށްފައެވެ. ހޯރަފުށީގެ އިތުރުން އެއަތޮޅު އުލިގަމުގައި ވެސް އުދައެރުމުގެ ސަބަބުން އެރަށުގެ 03 ގެއަކަށް ލޮނުވަނުމުން ވެލިބަސްތާ ވަނީ ޖަހާފައެވެ.

ށ. އަތޮޅުން ކޮމަންޑޫ އާއި ނޫމަރާ، އަދި ޅ. އަތޮޅު ކުރެންދޫއަށް އުދައިގެ އަސަރުކޮށްފައިވީ ނަމަވެސް، އެއްވެސް ގެއަކަށް ގެއްލުންވެފައެއް ނުވެއެވެ. އެހެންނަމަވެސް ކަނޑު ގަދަވެ، އޮއިބާރުވުމާ ގުޅިގެން ޅ. އަތޮޅު ކުރެންދޫ ބަނދަރުގައި އޮތް ދޯންޏެއް ހަލާކުވެ އެކި ބައިތައް ނެއްޓުމުގެ ސަބަބުން އިތުރު 2 ދޯންޏަކަށް ގެއްލުންވަމުންދާތީ، ނެއްޓުނު ބައިތައް ނެގުމުގެ މަސައްކަތް ދަނީ ކުރަމުންނެވެ.

އުދައެރުމުގެ ސަބަބުން ކ. ދިއްފުށީގެ 13 ގެއަކަށް ލޮނުވަދެފައިވާއިރު، އުދައެރުމުގެ ސަބަބުން ރަށުތެރެއަށް އަރާފައިވާ ލޮނުގަނޑު ހިންދުމުގެ މަސައްކަތް ރަށުގެ ރައްޔިތުންނާއި ކަމާބެހޭ ފަރާތްތައް ގުޅިގެން ކުރިއަށްދާކަމަށް އުމަރު ވިދާޅުވިއެވެ.

ރާއްޖޭގެ އެންމެ ދެކުނުން އައްޑޫ ސިޓީގެ 200 ގެއަކަށް ލޮނުވަދެފައިވާއިރު އައްޑޫ ސިޓީ ފޭދޫއިން އެކަނިވެސް 39 ގެއަކަށް ފެން ވަދެފައިވެއެވެ. މިގެތަކުގެ ތެރެއިން މިހާތަނަށް 21 ގެއެއްގެ ހާލަތު ބެލުމަށްފަހު، ވެލި ބަސްތާ ޖަހަންޖެހޭ 10 ގެއެއްގައި 56 ވެލިބަސްތާ ވަނީ ޖަހާފައެވެ. އަދި އައްޑޫ ސިޓީ ފޭދޫގެ ފެންބޮޑުވެފައިވާ ސަރަހައްދު ތަކުގައި ރަށު ރައްޔިތުންނާއި އެމްއެންޑީއެފް ގުޅިގެން ވަނީ ފެން ހިންދާފައެވެ.

މިހާރު ކުރަމުންދާ ވިއްސާރައިގެ ސަބަބުން އެންމެ ބޮޑު ގެއްލުމެއް ވެފައިވަނީ ފުވައްމުލައް ސިޓީއަށް ކަމަށް އުމަރު ވިދާޅުވިއެވެ. އެގޮތުން ފުވައްމުލަކު ސިޓީން 291 ގެއަކަށް ފެންވަދެގެން ރިޕޯޓުކޮށްފައިވާކަމަށް އޭނާ ވިދާޅުވެއެވެ. މީގެތެރެއިން 119 ގެއެއްގައި 392 ވެލިބަސްތާ ޖަހާފައިވާކަމަށާއި 4 ގެއެއްގެ މުދާތައް ރައްކާތެރި ހިސާބުތަކަށް ގެންގޮސްފައިވާ ކަމަށް އެއޮތޯރިޓީން ވިދާޅުވެއެވެ. އަދި އެސިޓީގައި ފެން ހިންދުމުގެ މަސައްކަތް މިހާރުވެސް ކުރިއަށްދާކަމަށް އެންޑީއެމްއޭއިން މަޢުލޫމާތުދެއްވައެވެ.

އެންޑީއެމްއޭގެ ޑެޕިއުޓީ ޗީފް އެގްޒެކެޓިވް އުމަރު މޫސާ ފިކްރީ ވަނީ ކުރިއަށްއޮތް ދުވަސްތަކުގައި ވެސް މޫސުން ގޯސްވާނެކަމަށް ލަފާކުރެވޭތީ ފެންބޮޑުވުމާއި ގަދަ ވައިގެ ސަބަބުން ގޯތިގެދޮރާއި މުދަލަށް ލިބިދާނޭ ގެއްލުމަކުން ރައްކާތެރިވުމަށް ސަމާލުވުމަށް އިލްތިމާސްކުރައްވާފައެވެ.

ބޯކޮށް ވާރޭވެހި ފެންބޮޑު ވުމުގެ ހާދިސާތައް އާންމުކޮށް ކުރިމަތިވާ ފުވައްމުލަކުގައި، މި ފަހަކަށް އައިސް ކުރިމަތިވާ އެންމެ ބޮޑު މައްސަލައަކީ ވާރޭ ވެހުމުގެ ސަބަބުން ނަރުދަމާ ނިޒާމުގައި މައްސަލަޖެހި ނަޖިސްފެން ބޭރުވުމެވެ. މިފަހަރުވެސް މި މައްސަލަ ކުރިމަތިވެ، ބައެއް ގޭގޭގެ ފާޚާނާއިން ނަޖިސްފެން ބޭރުވެ، ރަށުގެ ފެން ތަޣައްޔަރު ވެފައި ވާކަމަށް އެ ރަށު ކައުންސިލުން ރާއްޖެ އެމްވީއަށް ވަނީ މަޢުލޫމާތުދީފައެވެ. މާރޗު މަހުގެ ފަހުކޮޅު ކުރި ވިއްސާރާގައި ވެސް ރަށުގެ ފެން ތަޣައްޔަރުވުމުގެ ސަބަބުން ވަޅުފެން ކްލޮރިނޭޓް ކުރުމުގެ މަސައްކަތް ސިޓީ ހޮސްޕިޓަލުން ވަނީ ކޮށްފައެވެ.

މޫސުމާގުޅޭ އެންމެ ފަހުގެ މަޢުލޫމާތު ރާއްޖެ އެމްވީއާ ހިއްސާކުރައްވަމުން މޫސުމާބެހޭ ގައުމީ އިދާރާގެ އެސިސްޓެންޓް މީޓިރޮލޮޖިސްޓް ހުސައިން ވަހީދު ވަނީ ހުޅަނގު މޫސުމުގެ ވިއްސާރަ އިތުރަށް ގޯސްވާނެކަމަށް ލަފާކޮށްފައިވާއިރު، ކުރިއަށް އޮތް ދެ ތިން ދުވަހު ވެސް ވިއްސާރަކޮށް މޫސުން ގޯސްވާނެކަމަށް ލަފާކޮށްފައެވެ. އަދި ދެތިން ދުވަހަށްފަހު ވިއްސާރަ ކޮންމެވެސް ވަރަކަށް އަލިވިނަމަވެސް ވައިގެ ބާރުމިން މަޑުނުވެ ގަދަވާނެކަމަށް ވަނީ ލަފާކޮށްފައެވެ. މި ސަބަބައްޓަކައި ކަނޑުތައް ވެސް ދަތުރުނުކުރެވޭވަރަށް ގަދަވާނެކަމަށް ވަނީ ލަފާކޮށްފައެވެ. ދިޔަވަރު ބޮޑުވާ ވަގުތުތަކުގައި އުދައެރުން އެކަށީގެންވާތީ އެކަމަށް ސަމާލުވުމަށާއި، ޒަރޫރީ ދަތުރެއް ނޫނީ ނުކުރުމަށް ހުސައިން ވަހީދު އިލުތިމާސްކުރައްވާފައެވެ.

ރާއްޖޭގެ ހުޅަނގު އުތުރުން، އިރުދެކުނު އަރަބިކަނޑުގައި އުފެދިފައިވާ ތޫފާން "ޓައުޓޭ" ރާއްޖެއާ ދުރަށް ދަތުރުކުރަމުންދާއިރު، ރާއްޖޭގެ ދެކުނުގައި ބާރުގަދަ ކޮޅިގަނޑެއް އުފެދުމުގެ ނުރައްކާ ބޮޑުވަމުންދާކަމަށް މޫސުމާބެހޭ ގައުމީ އިދާރާއިން ވަނީ ބުނެފިއެވެ. ތޫފާން "ޓައުޓޭ" ރާއްޖެއާ ދުރަށް ދަތުރުކުރަމުންދާއިރު، މި ތޫފާނުގެ ބާރު އިތުރުވަމުންދާކަމަށް ވަނީ މައުލޫމާތު ލިބިފައެވެ. މިއީ މި ސަރަހައްދުގައި މިއަހަރު އުފެދުނު ފުރަތަމަ ތޫފާނެވެ. މި ތޫފާނުގެ އަސަރު އެންމެ ބޮޑަށް ކުރާނެކަމަށް ބެލެވެނީ އިންޑިޔާގެ ހުޅަނގު ބިތުގެ ސަރަހައްދަށާއި ޕާކިސްތާނަށް ކަމަށް ބައިނަލްއަގްވާމީ މީޓިއޮރޮލޮޖިސްޓުން ވަނީ ލަފާ ކޮށްފައެވެ.