ކޮވިޑު ޖެހިގެން އިތުރު 2 މަރު، ޖުމުލަ 96
އޭނާ ނިޔާވީ ހޮނިހިރު ދުވަހުގެރޭ 02:38 ހާއިރު
ހުޅުމާލެ މެޑިކަލް ފެސިލިޓީ- ނިޔާވެފައިވާ 2 މީހުންނަށްވެސް ފަރުވާދެމުން ދިޔައީ ހުޅުމާލޭ މެޑިކަލް ފެސިލިޓީގައި
ރާއްޖެއިން ކޮވިޑް ޖެހިގެން އިތުރު 2 މީހަކު ނިޔާވެއްޖެއެވެ.
ހެލްތް ޕްރޮޓެކްޝަން އޭޖެންސީ (އެޗްޕީއޭ) އިން ބުނީ، ހޮނިހިރު ދުވަހުގެރޭ 02:38 ހާއިރު އުމުރުން 81 އަހަރުގެ ދިވެހި ފިރިހެނަކު މި ބަލީގައި ނިޔާވެފައިވާ ކަމަށެވެ. އޭރު އޭނާއަށް ފަރުވާދެމުން ދިޔައީ ހުޅުމާލޭ މެޑިކަލް ފެސިލިޓީގައިކަމަށް އެޗްޕީއޭއިން ވަނީ ބުނެފައެވެ. އަދި އެއީ ރާއްޖެއިން ކޮވިޑު ޖެހިގެން ނިޔާވި 95 ވަނަ މީހާއެވެ.
އޭގެ އިތުރުން، ހޮނިިހިރު ދުވަހުގެ ހެނދުނު 04:30 ގައި އުމުރުން 30 އަހަރުގެ ދިވެހި އަންހެނެއްވެސް މި ބަލީގައި ނިޔާވެފައިވާއިރު، އޭނާއަށްވެސް ފަރުވާދެމުން ދިޔައީ ހުޅުމާލޭ މެޑިކަލް ފެސިލިޓީގައި ކަމަށް އެޗްޕީއޭއިން މައުލޫމާތު ދެއެވެ. އޭނާއަކީ ރާއްޖެއިން ކޮވިޑު ބަލީގައި ނިޔާވި 96 ވަނަ މީހާއެވެ.
ރާއްޖެއިން މިހާރަކަށް އައިސް ޕޮޒިޓިވްވަމުންދާ އަދަދުތައް ހާހަކުން މަތީގައި އުޅޭއިރު، މި ބަލީގައި މަރުވާ މީހުންގެ އަދަދުވެސް ވަނީ ބޮޑުތަނުން އިތުރުވެފައެވެ. އެގޮތުން ހޮނިހިރު ދުވަހުވެސް 2 މީހަކު މި ބަލީގައި ނިޔާވެފައިވެއެވެ. އަދި ހުކުރު ދުވަހު އެކަނިވެސް 5 މީހަކު ވަނީ ނިޔާވެފައެވެ.
