ސިއްހީ ކުއްލި ނުރައްކަލުގެ ހާލަތު އިތުރު 14 ދުވަހަށް ދަންމާލައިފި
15 މެއި 2021 | ހޮނިހިރު 18:33މިއީ ސިއްހީ ކުއްލި ނުރައްކަލުގެ ހާލަތުގެ މުއްދަތު އިތުރުކުރި 15 ވަނަ ފަހަރު
ކޮވިޑަށް ޓެސްޓު ކުރުމަށް ސާމްޕަލް ނެގުން
ކޮވިޑް-19އާ ގުޅިގެން ރާއްޖޭގައި އިއުލާން ކޮށްފައިވާ ސިއްހީ ކުއްލި ނުރައްކަލުގެ ހާލަތު އިތުރު 14 ދުވަހަށް ދެމެހެއްޓުމަށް ނިންމައިފިއެވެ.
ރާއްޖޭގައި ކުއްލި ނުރައްކަލުގެ ހާލަތު އިއުލާންކުރީ ރާއްޖެއިން ކޮވިޑް-19ގެ ފުރަތަމަ ކޭސް ފެނުމާއެކު މިދިޔަ އަހަރުގެ މާޗް މަހުގައެވެ. ސިއްހީ ކުއްލި ނުރައްކަލުގެ ހާލަތުގައި އޮންނަތާ މިހާރު އެއް އަހަރަށް ވުރެ ގިނަ ދުވަސްވެފައިވާއިރު، ޑިރެކްޓަރ ޖެނެރަލް އޮފް ޕަބްލިކް ހެލްތު، މައިމޫނާ އަބޫބަކުރު ސޮއިކުރައްވާ ނެރުނު ބަޔާނެއްގައި ބުނެފައި ވަނީ ޢާންމު ޞިއްޙަތު ރައްކާތެރިކުރުމުގެ ޤާނޫނުގެ ދަށުން އަޅަންޖެހޭ ޚާއްޞަ ފިޔަވަޅުތައް އެޅުމަށް މަގުފަހިކުރުމުގެ ގޮތުން، އާންމު ޞިއްޙަތުގެ ކުއްލި ނުރައްކަލުގެ ހާލަތު ދިގުދަންމާލަން ނިންމާފައިވާ ކަމަށެވެ.
ރާއްޖޭގައި ކޮވިޑް-19 އުޅޭތާ އަހަރަކަށް ވުރެ ދުވަސްވެފައިވާއިރު މިހާތަނަށް މި ބަލީގެ ތިން ރާޅު ވަނީ ދިވެހިންގެ ތެރޭގައި ފެތުރިފައެވެ. އެގޮތުން އެންމެ ފުރަތަމަ މާލެއިން ފެނުނު ކޭހަށް ފަހު މާލެ ލޮކްޑައުންކޮށް ލޮކްޑައުން އުވާލި ފަހުން ކޭސްތައް ވަރަށް ބޮޑަށް އިތުރުވިއެވެ. ފިޔަވަޅުތަކާއެކު ކޮންމެ ފަހަރަކުވެސް ކޭސްތައް ކޮންޓްރޯލްކުރެވޭ މަންޒަރު ފެނުނު ނަމަވެސް މިހާރު ދުވާލެއްގެ މައްޗަށް ހާހަކަށްވުރެ ގިނަ ކޭސް ދަނީ ރިޕޯޓްކުރެވެމުންނެވެ.
މުޅި ރާއްޖެއަށް ކޮވިޑްގެ އަސަރު ކޮށްފައިވާއިރު، އަތޮޅުތެރޭގެ ކޭސްތައް އިތުރުވެ މާލެއެކޭ އެއްފަދައިން ރަށްރަށުގައިވެސް ދަނީ ކޮވިޑުން ރައްކާތެރިވުމަށް ގިނަ ފިޔަވަޅުތަކެއް އަޅަމުންނެވެ.
މިއީ ރާއްޖޭގައި އިއުލާނުކޮށްފައި އޮތް ސިއްހީ ކުއްލި ނުރައްކަލުގެ ހާލަތު އިތުރުކުރި 15 ވަނަ ފަހަރެވެ.
