ކޮވިޑް-19: އެންމެ ފަހުގެ

ކޮރޯނާވައިރަސް (ކޮވިޑް-19) ފެތުރެމުންދާ ގައުމެއް ކަމަށްވާ ބަންގްލަދޭޝްގައި މިވަގުތު ތިބި ރާއްޖޭގެ ޓީސީ ސްޕޯޓްސް ކްލަބު އެނބުރި ރާއްޖެ އަންނާނީ ސްރީލަންކާގައި 14 ދުވަހު ކަރަންޓީނުގެ މުއްދަތު ހަމަކުރުމަށްފަހު ކަމަށް ސަރުކާރުން ބުނެފި އެވެ.

ޓީސީން ބަންގްލަދޭޝަށް ދިޔައީ އޭއެފްސީ ކަޕުގައި ބުދަ ދުވަހު އެ ގައުމުގެ ބަޝުންދުރާ ކިންގްސްއާ ދެކޮޅަށް ކުޅުމަށެވެ.

ބުދަ ދުވަހު ބޭއްވި ނޫސްވެރިންގެ ބައްދަލުވުމެއްގައި ކޮވިޑް-19 ގެ ތަރުޖަމާނު މަބްރޫކް އަބްދުލް އަޒީޒް ވިދާޅުވީ މިކަމުގައި ކުޅިވަރާ ބެހޭ ވަޒީރު އަހުމަދު މަހުލޫފު، ޓީސީއާ ވާހަކަދައްކަވާފައިވާ ކަމަށާއި މިހާރު ހަމަޖެހިފައި އޮތީ ލަންކާގައި ކަރަންޓީނުގެ 14 ދުވަހުގެ މުއްދަތު ހަމަކޮށްފައި ރާއްޖެ އަންނަ ކަހަލަ ގޮތަކަށް ކަމަށެވެ.

ކޮވިޑް-19 އަށް ޕޮޒިޓިވްވި 8 މީހަކު ރާއްޖެއިން ފެނުމާއި ގުޅިގެން، ކުރިޔަށް އޮތް ލޯކަލް ކައުންސިލްގެ އިންތިޚާބާއި، އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކުގެ އިންތިޚާބު ފަސްކޮށް ދިނުމަށް މަޝްވަރާ ކޮށްދިނުމަށް ސަރުކާރު ކޯލިޝަނުގައި ހިމެނޭ މޯލްޑިވްސް ރިފޯމް މޫވްމެންޓް (އެމްއާރްއެމް) އިން އިލެކްޝަން ކޮމިޝަން (އީސީ) ގައި އެދިއްޖެ އެވެ.

އިންތިޚާބު ފަސްކޮށްދިނުމަށް އެދި އެމްއާރްއެމުން އީސީއަށް ފޮނުވި ސިޓީއެއްގައި ބުނެފައިވަނީ، މި ވަގުތަކީ ކުރިޔަށް އޮތް ލޯކަލް ކައުންސިލް އިންތިޚާބާއި، އަންހެނުންގެ ތަރައްޤީއަށް މަސައްކަތް ކުރާ ކޮމިޓީތަކުގެ އިންތިޚާބަށް ތައްޔާރުވަމުންދާ ވަގުތު ކަމަށެވެ. ނަމަވެސް މިވަގުތު ޙާލަތު އޮތް ގޮތުން ދައުލަތުން އެތައް މިލިއަން ރުފިޔާއެއް ޚަރަދުކޮށްގެން ބާއްވާ މި ދެ އިންތިޚާބުގައި ވޯޓުލުމަށް އެކަށޭނަ ޢަދަދަކަށް ރައްޔިތުން ނުނިކުމެ، އިންތިޚާބަކީ ރައްޔިތުންގެ އެއްބާރުލުން ނުލިބޭ، މާލީ ގޮތުން ކުރެވޭ އިޞްރާފަކަށް ވެދާނެކަމަށް އެ ޕާޓީން ދެކޭކަމަށެވެ.

ކޮވިޑް-19 އާ ގުޅިގެން ކުޑަކުދިންގެ މަލްޓިމީޑިއާ ލައިބްރަރީ ވަގުތީގޮތުން ބަންދުކުރަން ނިންމައިފިއެވެ.

ޤައުމީ ކުތުބުޚާނާއިން ބުނީ މިހާރު ފެތުރެމުންދާ ކޮވިޑް-19 އިން ކުޑަކުދިން ރައްކާތެރި ކުރުމަށް އަޅާ ފިޔަވަޅެއްގެ ގޮތުން ބުރާސްފަތި ދުވަސް (މާދަމާ) އިން ފެށިގެން ކުޑަކުދިންގެ މަލްޓިމީޑިއާ ލައިބްރަރީ ވަގުތީގޮތުން ބަންދުކުރުމަށް ނިންމާފައިވާ ކަމަށެވެ. އަދި މި ލައިބްރަރީން ދެމުން ގެންދާ ޚިދުމަތްތައް ވަގުތީގޮތުން މެދުކަނޑާލެވޭނެ ކަމަށްވެސް ޤައުމީ ކުތުބުޚާނާއިން ބުނެއެވެ.

އެމެރިކާގެ ދިފާޢީ ވުޒާރާ ޕެންޓެގަން އިން މިކަން ހާމަކޮށް ޢާންމުކޮށްފައިވާ ބަޔާނުގައި ބުނެފައިވަނީ ދެކުނު އޭޝިޔާގެ އިތުރުން އިރުމަތީ އޭޝިޔާގެ ބައެއް ޤައުމުތަކައް ދިފާއީ ވަޒީރު މާރްކް އެސްޕަރ ކުރައްވަން ތާވަލުކޮށްފައިވާ ދަތުރު ފަސްކުރައްވާފައިވާކަމަށެވެ. މާރޗު މަހުގެ 16 އިން 20 އަށް އެމަނިކުފާނު ކުރައްވަން ހަމަޖެހިފައިވާ ޤައުމުތަކުގެ ތެރޭގައި އިންޑިއާ، ޕާކިސްތާން އަިދ އަފްޣާނިސްތާނު ހިމެނެއެވެ. އޭޝިޔާގެ ޤައުމުތަކުގައި ކޮވިޑް-19 ފެތުރެމުންދާތީ ދަތުރުފުޅު ފަސްކުރެއްވިކަން އިޢުލާންކުރެއްވި ނަމަވެސް، އަލުން ތާވަލުކުރައްވާނެ ތާރީޚެއް އިޢުލާންކުރައްވާފައެއް ނުވެެއެވެ.

ބަހްރައިނުގެ ހެލްތު މިނިސްޓްރީއާއި ޙަވާލާދީ ގަލްފުގެ މީޑިއާތަކުން ރިޕޯޓުކުރާގޮތުގައި ފާއިތުވެ ދިޔަ 24 ގަޑިއިރު 77 ކޭސް ޕޮޒިޓިވްވެގެން ރިޕޯޓުކޮށްފައިވެއެވެ. މިހާތަނަށް އެޤައުމުން 189 މީހުން ވައިރަސްއަށް ޕޮޒިޓިވްވެފައިވާއިރު، ފަރުވާދީގެން 30 މީހުން ވަނީ ރަނގަޅުވެފައެވެ.

ތައިލޭންޑުން އޮން-އެރައިވަލް ވިސާ ދިނުން ހުއްޓާލައިފިކަން އެޤައުމުން އިޢުލާންކޮށްފިއެވެ. މިހާރު އެޤައުމުގެ އިމިގްރޭޝަނުން އޮން-އެރައިވަލް ވިސާ ދެމުން އަންނަ ހުރިހައި ޤައުމަކަށް މިއަދުން ފެށިގެން މުއްދަތެއް ނެތްގޮތައް ވަނީ އޮން އެރައިވަލް ވިސާ ދޫކުރުން ހުއްޓާލާފައެވެ. އަދި ދެކުނު ކޮރެއާ، އިޓަލީ، އަދި ހޮންގކޮންގ ގެ ރައްޔިތުންނަށް އެއްވެސް ބާވަތެއްގެ ވިސާއެއް ދޫނުކުރަންވެސް ވަނީ ނިންމާފައެވެ.

ޗައިނާގެ ދައުލަތުގެ މީޑިއާއިން ޚަބަރު ފަތުރާ ގޮތުގައި، ވެރިރަށް ބެއިޖީންއަށް، އެއްގަމާއި، ކަނޑާއި، ވައިގެ މަގުން އަންނަ ބޭރު ޤައުމުތަކުގެ މީހުން ދެހަފުތާގެ މުއްދަތައް ކަރަންޓީން ކުރުމަށް މައި ސަރުކާރުން ވަނީ ނިންމާފައެވެ.

ޗައިނާ ސަރުކާރުން މިގޮތައް ނިންމީ، އެޤައުމުގައި މިހާރު ކޮވިޑް-19 ކޮންޓްރޯލް ކުރުމާއި ގާތްވެފައިވާތީ، އެ ޤައުމަށް އިތުރު ޤައުމަކުން ވައިރަސް އަޔަ ނުދިނުމުގެ ބޭނުމުގައެވެ.

ބެއިޖިން އިން މީގެކުރިންވެސް ދިޔައީ ވައިރަސް އެންމެ ވަރުގަދަޔަށް ފެތުރެމުންދާ ޤައުމުތައްކަމަށްވާ، ދެކުނު ކޮރެއާ، އިރާން، އިޓަލީ، އަދި ޖަޕާނުން އަންނަ މީހުން ކަރަންޓިން ކުރަމުންނެވެ. މ ިހާރު މި ނިންމީ ހުރިހައި ޤައުމަކުން އަންނަ މީހުން ކަރަންޓީންކުރުމަށެވެ.

ބެލްޖިއަމްގެ ހެލްތު މިނިސްޓަރ މެގީ ޑެބްލޮކްއާއި ޙަވާލާދީ ބޭރުގެ މީޑިއާތަކުން ރިޕޯޓުކުރާ ގޮތުގައި މިއަދު ބެލްޖިއަމުން ވަނީ ވައިރަސްޖެހިގެން އެކަކު މަރުވެފައެވެ. އޭނާ މަރުވީ ވައިރަސްއަށް ފަރުވާދެމުން ދަނިކޮށް ޙަލުދެރަވެގެންކަމަށް ވިދާޅުވެފައިވެއެވެ. ބްރަސެލްސްގެ މައި ހޮސްޕިޓަލެއްގައި ފަރުވާދެމުން ދަނިކޮށް މަރުވެފައިވަނީ އުމުރުން 90 އަހަރުގެ މީހެކެވެ

ޔޫީކްރެއިންގެ ވެރިރަށް ކިއޭވްގެ ހުރިހައި ސްކޫލެއްގެ ކިޔެވުން މާދަމާއިން ފެށިގެން ބަންދުކުރަން ނިންމައިފިއެވެ.

މިކަން ހަމަކުރައްވާ ކިއޭވް ސިޓީގެ މޭޔަރ ވިޓަލީ ކްލިޝްކޯ ވިދާޅުވެފައިވަނީ، މާރޗު މަހުގެ ނިޔަލަށް ކިއޭވްގެ ހުރިހައި ސްކޫލެއް ބަންދުކުރަން ނިންމާފައިވާކަމަށެވެ. އަދި އަލުން ހުޅުވުމގެ ކުރިން ޙަލަތު މުރާޖަޢާކުރައްވާނެކަމަށް ވިދާޅުވެފައިވެއެވެ. މިގޮތައް ނިންމެވީ ކޮވިޑް-19 ފެތުރުވުން ހުއްޓުވުމަށް ކުރަމުންދާ މަސައްކަތުގެ ތެރެއިން ރައްކާތެރިކަމުގެ ފިޔަވަޅެއްގެ ގޮތުން ކަމަށްވެސް އެމަނިކުފާނު ވިދާޅުވެފައިވެއެވެ.

މީގެ އިތުރުން ކިއޭވް ސިޓިގައި މަދަނީ އެއްވުންތަކާއި، ކޮންސަޓްތަކާއި ކޮންފަރެންސްތައް ބޭއްވުން ވެސް ވަނީ މަނާކޮށްފައެވެ، އަދި ބޮޑެތި ޝޮޕިންގ މޯލްތަކުގެ ތެރޭގައި ޤާއިމުކޮށްފައިވާ ސިނަމާތަކާއި ކުޅިވަަރު އޮޑިޓޯރިއަމްތައްވެސް ބަންދުކުރުމަށް މޭޔަރވަނީ އަންގަވާފައެވެ.

ޔޫކްރެއިން މިހާތަނަށް ވައިރަސްއަށް ޕޮޒިޓިވްވެފައިވަނި އެންމެ މީހެކެވެ.

އަންނަ ހަފުތާގެ ހޯމަ ދުވަހުން ފެށިގެން ޕޮލެންޑުގެ ސްކޫލްތައް ބަންދުކުރުމަށް އެޤައުމުގެ ސަރުކާރުން ނިންމައިފިއެވެ.

މިކަން ހާމަކުރައްވާ ދައުލަތުގެ މީޑިއާގައި ދެއްވި ބަޔާނެއްގައި އެޤައުމުގެ ބޮޑުވަޒީރު، މެތެއުޒް މިރާވިއޭކީ ވިދާޅުވީ، އެޤައުމުގެ ހުރިހައ ސްކޫލެއްގެ ކިޔެވުން ހޯމަ ދުވަހުން ފެށިގެން ބަންދުކުރަން ނިންމަވާ އެކަން ޢާންމުކޮށް އިޢުލާންކުރައްވާކަމަށެވެ. އެމަނިކުފާނުގެ ބަޔާނުގައި އިތުރަށް ވިދާޅުވީ ސްކޫލްތަކުގެ އިތުރުން ކޮލެޖުތަކާއި، ޔުނިވަރިސިޓީތަކާއި، މިއުޒިއަމްތަކާއި، ސިނެމާތައްވެސް ބަންދުކުރަން ސަރުކާރުން އަންގާކަމަށެވެ. ސްކޫންތަކާއި، ބަންދުކުރަން އެންގިތަންތަން އަކުން ހުޅުވާނެ ތާރީޚެއް އަދި ޕޮލެންޑުގެ ސަރުކާރުން ހާމަކޮށްފައެއް ނުވެއެވެ.

ޕޮލެންޑުން މިހާތަނައަށް އައިއިރު، 26 މީހުން ވަނީ ކޮވިޑް-19 އަށް ޕޮޒިޓިވްވެފައެވެ.

ކޮވިޑް-19 ޖެހިގެން އީރާނުގައި ފާއިތުވެ ދިޔަ 24 ގަޑިއިރުގެ ތެރެގައި 63 މީހުން މަރުވެ، އެޤައުމުގައި މިވައިރަސްގަ މަރުވި މީހުންގެ އަދަދު 354 އަށް އަރައިފިއެވެ.

އީރާނުގެ ހެލްތު މިނިސްޓްރީގެ ތަރުޖަމާނު ކިއާނޫޝް ޖަހާންޕޫރު ދައުލަތުގެ މީޑީއާގައި ވާހަކަފުޅު ދައްކަވަމުން ވިދާޅުވީ، ވައިރަސް ޖެހުނު މީހުންގެ އަދަދު މިހާރު 9،000އަށް އަރާފައިވާކަމަށެވެ. އޭނާ ވަނީ ޒަރޫރީ ބޭނުމެއްގައި ނޫނީ ގެއިން ބޭރަށް ނުނިކުތުމަށް، އެންމެހައި ރައްޔިތުންނަށް އިލްތިމާސްކޮށްފައެވެ.

އަންނަ ހަފުތާގެ އާދިއްތަ ދުވަހު ހުޅުވަން ކަލަންޑަރުގައި ހަމަޖެހިފައި އޮތް ސްކޫލްތައް ހުޅުވުމާމެދު، ކުރިޔަށް އޮތް ތިން ދުވަހުގެ ތެރޭގައި ގޮތެއް ނިންމާނެ ކަމަށް މަބްރޫކް އަޒީޒް ވިދާޅުވެއްޖެއެވެ.

ކޮވިޑް-19 ރާއްޖެއިން ފެނުމާ ގުޅިގެން ގިނަ ފަރާތްތަކަކުން ދަނީ ސްކޫލްތައް ބަންދުކުރަން ސަރުކާރަށް ގޮވާލަމުންނެވެ. އޭގެ ތެރޭގައި މޯލްޑިވްސް މެޑިކަލް އެސޯސިއޭޝަން އަދި ޓީޗަރސް އެސޯސިއޭޝަން ހިމެނެއެވެ. އަދި ބައެއް ބެލެނިވެރިިން ވެސް ދަނީ ސްކޫލްތައް ބަންދުކުރަމަށް ސަރުކާރަށް ގޮވާލަމުންނެވެ.

މިކަމާއި ގުޅިގެން ނޫސްވެރިޔަކު ކުރި ސުވާލަކަށް ޖަވާބުދެއްވަމުން މަބްރޫކް ވިދާޅުވީ، އެއްވެސް އިރެއްގައި ސްކޫލްތައް ބަންދުނުކުރަން ނިންމާފައިވާ ނުވާނެ ކަމަށެވެ. އަދި ސްކޫލްތައް ބަންދުކުރުމާ ގުޅޭގޮތުން މަޝްވަރާތައް ކުރިޔަށްދާ ކަމަށާއި، އެއަށް ފަހު އެކަމާއިމެދު ގޮތެއް ނިންމުމަށް ފަހު އިއުލާންކުރާނެ ކަމަށެވެ.

ވެރިރަށް ބާލިންގައި ބޭއްވި ނޫސްވެރިންގެ ބައްދަލުވުމެއްގައި، ޖަރުމަންވިލާތުގެ ޗާންސެލަރ އެންގެލަރ މާރކެލް ވިދާޅުވީ އެޤައުމުގެ އާބާދީގެ 70 އިން ސައްތައަށް ކޮވިޑް-19 ގެ އަސަރު ކުރާނެކަމަށް ލަފާކުރެއްވޭ ކަމަށެވެ. އެޤައުމުގައި މިހާތަނަށް އައިއިރު 1،300 މީހުން ވައިރަސްއަށް ޕޮޒިޓިވްވެ، 2 މީހުން ވަނީ ވައިރަސްގައި މަރުވެފައެވެ.

މާރކެލް ވިދާޅުވީ، ވައިރަސް ޖަރުމަނަށް އައިއިރު، އެއިން ސަލާމަތްވާނެ ގޮތެއް ނެތް ކަމަށެވެ. މިކަމަށް ވަކި ފަރުވާއެއް އަދި ވެކްސިން އެއް ނުވަތަ ތެރަޕީއެއް ނެތްކަމީ އެންމެން ޤަބޫލުކުރަން ޖެހޭ ޙަޤީޤަތެއްކަން ފާހަގަކުރައްވާ މަރކެލް ވިދާޅުވީ، އެޤައުމުގެ އާބާދީގެ 60-70 އިން ސައްތަ މީހުން މި ވައިރަސްޖެހޭނެ ކަމަށް ޤަބޫލުފުޅުކުރައްވާކަމަށެވެ. އެހެންކަމުން މިދަނޑިވަޅު އަހައްމިއްޔަތުކަން ދެނީ ވައިރަސްފެތުރޭ މިންވަރު ދަށްކުރުމަށް ކަމަށެވެ.

ޖަރުމަނު ސަރުކާރުން ވަނީ 1،000އަށް ވުރެ ގިނަ މީހުން ބައިވެރިވާ އެއްވުންތައް ނުބާއްވަން އަންގާ އިއުލާންކޮށްފައެވެ.

މިކަން ހާމަަކޮށް، ކުވައިތުގެ ހެލްތު މިނިސްޓްރީން އާންމުކޮށްފައިވާ ބަޔާނުގައި ބުނެފައިވަނީ މިއަދު އެކަނިވެސް 3 މީހުން ވައިރަސްއަށް ޕޮޒިޓިވްވެފައިވާކަމަށެވެ. މިއާއެކު، އެޤައުމުގައި ވައިރަސްއަށް ޕޮޒިޓިވްވީ މީހުންގެ އަދަދު ވަނީ 72 އަރާފައެވެ. މީގެތެރެއިން 5 މީހެއްގެ ޙާލަތު ވަރަށް ނާޒުކުކަމަށް ބަޔާނުގައި ވެއެވެ.

ފިލިޕީންސްގެ ޑިޕާރޓްމަންތް އޮފް ހެލްތާއި ޙަވާލާދީ އަލްޖަޒިރާއިން ރިޕޯޓުކުރާގޮތުގައި މިއަދު އެޤައުމުން 16 މީހުން ވަނީ ވައިރަސްއަށް ޕޮޒިޓިވްވެފައެވެ. މިއާއެކު، އެޤައުމުގައި ވައިރަސް ޖެހުނު މީހުންގެ ޖުމުލަ އަދަދަކީ 49އެވެ.

ދުނިޔޭގެ އެކި ކަންކޮޅުތަކައް ކޮވިޑް-19 ފެތުރިފައިވާއިރު، އެޤައުމުތަކަށް އެކި ގޮތްގޮތުން އެހީތެރިވުމަށް ދުނިޔޭގެ ޞިއްޙަތު ޖަމްޢިއްޔާއިން ކުރަމުންދާ މަސައްކަތައް އެހީތެރިވެދިނުމުގެ ގޮތުން ޗައިނާއިން ޑަބްލިއުއެޗްއޯއަށް 20 މިލިއަން ޑޮލަރު ހަދިޔާކޮށްފިއެވެ. މިއެހީއާއި ގުޅޭ ފަހުމުނާމާގައި މިއަދު ވަނީ ސޮއިކޮށްފައެވެ.

ދުނިޔޭގެ އެކި ކަންކޮޅުތަކައް ކޮވިޑް-19 ފެތުރިފައިވާއިރު، އެޤައުމުތަކަށް އެކި ގޮތްގޮތުން އެހީތެރިވުމަށް ދުނިޔޭގެ ޞިއްޙަތު ޖަމްޢިއްޔާއިން ކުރަމުންދާ މަސައްކަތައް އެހީތެރިވެދިނުމުގެ ގޮތުން ޖަޕާނުން ޑަބްލިއުއެޗްއޯއަށް 46 މިލިއަން ޑޮލަރު ހަދިޔާކޮށްފިއެވެ.

ޑަބްލިއުއެޗްއޯއިން ވަނީ ކޮވިޑް-19 އަށް ޚާއްޞަކޮށް އެމަރޖެންސީ ރެސްޕޮންޒް ޕްލޭނެއް އެކުލަވާލާފައެވެ. މި ޕްލޭންގެ ދަށުން އެންމެ އަހަމިއްޔަތުކަން ދެނީ ޞިއްޙީ ނިޒާމު ބަލިކަށި ޤައުމުތަކަށެވެ. މި ޕްލޭން ތަންފީޒު ކުރުމަށް މެންބަރު ޤައުމުތަކުގެ އެހީތެރިކަމަށް ޑަބްލިއުއެޗްއޯއިން ވަނީ ގޮވާލާފައެވެ.

ޑަބްލިއުއެޗްއޯގެ ޑިރެކްޓަރ ޖެނެރަލް ވަނީ މެންބަރު ޤައުމުތަކުން އިޖާބަދޭ މިންވަރުދަށް ކަމުން އެކަމާއި ކަންބޮޑުވުން ފާޅުކުރައްވާފައެވެ.

ކޮވިޑް-19 ފެތުރެމުންދާއިރު، އެ ވައިރަސްއިން ސަލާމަތްވުމަށް އަމިއްލަގޮތުން ގިނަ ކަންތައްތަކެއް ކުރެވިދާނެއެވެ. ދިވެހިރާއްޖެއަކީ މުސްލިމް ޤައުމެއްކަމުން، ގާތްތިމާގެ މީހަކު، ނުވަތަ އަޚަކާއި ދިމާވާ ހިނދު ސަލާމްކުރުމަކީ އަޅުގަނޑުމެންގެ މުޖުތަމަޢުތެރޭގައި އާދަވެފައިވާ ރީތި ސިފައެެކެވެ. އެހެންނަމަވެސް މިދުވަސްވަރު، ވައިރަސް އިން ސަލާމަތްވުމަށް އެޅިދާނެ ފިޔަވަޅުތަކުގެ ތެރޭގައި ސަލާމް ކުރުމުން ދުރުހެލިވުން ހިމެނެއެވެ. ދުނިޔޭގެ ޞިއްޙަތު ޖަމްޢިއްޔާއިން އިރުޝާދު ދީފައިވަނީ މިހެންނެވެ.

ޕާކިސްތާނުގެ ޞިއްޙަތާއި ބެހޭ އިސް މަސްއޫލުވެރިންނާއި ޙަވާލާދީ ބޭރުގެ މީޑިއާތަކުން ރިޕޯޓުކުރާގޮތުގައި، މިހާތަނަށް އައިއިރު 20 މީހުން އެޤައުމުން ކޮވިޑް-19 އަށް ވަނީ ޕޮޒިޓިވްވެފައެވެ. އެންމެ ގިނަ މީހުން ޕޮޒިޓިވްވެފައިވަނީ ކަރާޗީންނެވެ. އެއީ 15 މީހުންނެވެ.

ބައިނަލްއަޤުވާމީ މީޑިއާތަކުން ރިޕޯޓުކުރާގޮތުގައި، ހޮންޑިއުރާސްގައި ދެމީހަކު މިއަދު ވަނީ ވައިރަސްއަށް ޕޮޮޒިޓިވްވެފައެވެ. ފުރަތަަމަ މީހާއަކީ އުމުރުން 42 އަހަރުގެ އަންހެނެއްކަމަށާއި، އޭނާ ޓްރެކް ކުރީ ސްޕެއިން އިން އެނބުރި ޤައުމަށް އައި ދުވަހު އެއަރޕޯޓުންނެވެ. އޭނާއަށޤ މިހާރު ހޮސްޕިޓަކުގައި ފަރުވާދެމުންދާއިރު، ޙާލަތު ރަނގަޅުކަމަށް ހޮންޑިއުރާސްގެ ޞިއްހީ މަސްއޫލުވެރިންނާއި ޙަވާލާދީ ރޮއިޓަރސް އިން ބުނެއެވެ.

ދެވަނަ މީހާއަކީ އުމުރުން 37 އަހަރުގެ ފިރިހެނެއް ކަމަށާއި، އޭނާއަކ އަމިއްލަ ބޭނުމުގައި ސްވިޓްޒަރލޭންޑަށް ދަތުރުކުރުމަށް ފަހު އެނބުރި ޤައުމަށް އައި މީހެއްކަމަށް ރިޕޯޓުތައް ބުނެއެވެ. އޭނާއަށް ފަރުވާދެމުންދަނީ ގޭގައި އެކަހެރިކޮށް ބަހައްޓައިގެން ކަމަށްވެސް ރިޕޯޓުތައް ބުނެއެވެ.

އިންޑިއާއިން މިއަދު 2 މީހަކު ވައިރަސް އަށް ޕޮޒިޓިވްވެފައިވާކަމަށް ހެލްތު މިނިސްޓްރީން ވިދާޅުވެއެވެ. މިއަދުގެ ކޭސްތައް ފެނުނީ ރާޖެސްތާން ސްޓޭޓުންނާއި، ވެރިރަށް ނިއުދިއްލީންނެވެ.

މިއާއެކު، އިންޑިއާއިން މިހާތަނަށް ކޮވިޑް-19 އަށް ޕޮޒިޓިވްވި މީހުންގެ ޖުމުލަ އަދަދަކީ 60އެވެ.

"ރަށްވެހި ފަތިސް" ކެމްޕޭނުގެ ޢަމަލީ މަސައްކަތް ހުއްޓާލާފައިވާކަމަށާއި، ކޮވިޑް-19 ފެތުރުމަށް މަގުފަހިވާނެ އެއްވެސް ޙަރަކާތެއް އެމްޑީޕީން ނުހިންގާނެކަމުގެ ޔަޤީންކަން ކެމްޕޭނުގެ ތަރުޖަމާނު އަފްޝަން ލަޠީފު ދެއްވައިފިއެވެ.

މީހުން އެއްވެގެން ބާއްވާ ހުރިހައި ޙަރަކާތެއް ކެންސަލްކޮށްފައިވާކަން ފާހަގަކުރައްވާ އަފްޝަން ވިދާޅުވީ އެމްޑީޕީގެ 90،000 އަށްވުރެ ގިނަ މެންބަރުންނާ މުވާޞަލާތްކުރެވޭނެ ވިއުގައެއް އެމްޑީޕީން ޤާއިމުކޮށްފައިވާކަމަށެވެ. އަދި އެ ވިއުގައިގެ ޒަރީއާއިން ކޮވިޑް-19 އަށް ހޭލުންތެރިކުރުވުމުގެ މަސައްކަތް އެމްޑީޕީން ކުރަމުންދާކަމަށެވެ.

ކޮރޯނާވައިރަސް (ކޮވިޑް-19) އާ ގުޅިގެން އާސެނަލްގެ ކުޅުންތެރިންނާއި އޮފިޝަލުންތަކެއް ކަރަންޓީނުކޮށް، އިނގިރޭސި ޕްރިމިއާ ލީގުގައި ބުދަ ދުވަހުގެރޭ އެ ޓީމާއި މެންޗެސްޓާ ސިޓީ ކުޅެން އޮތް މެޗު ފަސްކޮށްފި އެވެ.

އާސެނަލުން ޔުރޮޕާ ލީގުގައި މީގެ ދެ ހަފުތާ ކުރިން ގްރީސްގެ އޮލިމްޕިއާކޯސްއާ ބައްދަލުކުރިއިރު، ދާދި ފަހުން އޮލިމްޕިއާކޯސްގެ ވެރިޔާ އެވަންޖެލޯސް މަރިނާކިސް ވަނީ ކޮރޯނާވައިރަސް (ކޮވިޑް-19) އަށް ޕޮޒިޓިވްވެފައެވެ.

ރިޕޯޓުތައް ބުނާގޮތުން ލަންޑަނުގައި ކުޅުނު މި މެޗަށްފަހު އާސެނަލްގެ ބައެއް ކުޅުންތެރިން ވަނީ އޭނާއާ ބައްދަލުކޮށްފައެވެ.

އެހެންކަމުން އާސެނަލްގެ ކުޅުންތެރިން ކަރަންޓީނުކުރިއިރު، ކަރަންޓީނުގައި އެޓީމުގެ ކުޅުންތެރިން 14 ދުވަސް ވަންދެން ބަހައްޓާނެއެވެ.

ނޭޝަނަލް އެމަރެޖެންސީ އޮޕަރޭޝަންސް ސެންޓަރުގައި މީޑިއާތަކަށް މަޝްވަރާ ކުރުމަށް އަދި ސުވާލު ކުރުމަށް ފުުރުސަތު ދިނުމަށް މީޑިއާ ރޫމްއެއް ތައްޔާރު ކުރެވެމުންދޭ، މިއަދު އެކަން ހަމަޖެހޭނެ ކަމަށް މަބްރޫކް ވިދާޅުވި.

ކުރަމަތީގެ މެނޭޖްމަންޓުން ފަތުރުވެރިން ބިރުގަންނާނެތީ މާސްކް އަދި އަންގި ނުލުމަށް އަންގާފައިވާ ކަމަށް ދެކެވޭ ވާހަތަކާ ގުޅޭގޮތުން މަބްރޫކް ވިދާޅުވީ، އެއްވެސް ބައެއްގެ އިހުމާލެއް އޮތް ކަމެއް ނަމަ އެކަން ބަލާނެ ކަމަށް

މަބްރޫކް ވިދާޅުވީ، މާސްކް އަޅަންޖެހޭ މީހުން ފިޔަވައި އިތުރު މީހުން މާސްކް އަޅަން ކޮންމެހެން ނުޖެހޭކަން މި ވައިރަސްއިން ސަލާމަތް ވުމަށް، ކްލޯސް ކޮންޓެކްޓް އެއް ގޮތަށް އައިޑެންޓިފައި ނުވާނަމަ ކޮންމެހެން ނުޖެހޭ. ދިވެއްސަކަށް މެނޭޖްމަންޓުން އިހުމާލު ވުމުގެ ފުރުސަތެއް ނުދޭނަން،

ޑޮކްޓަރު: ކެއްސާ ކިނބިހި އަޅާ މީހުންނާއި، އޭނާގެ އެހީތެރިންނާއި، ސިއްޙީ އެހީތެރިން މާސްކް އަޅަން އެދެނީ، ރަށުގެ އެންމެން މާސްކް އަޅައިގެން އުޅުން އެއީއެއް ނޫން ކަމަށް އެންމެ އެދެވޭ ގޮތަކީ، ގިނަ ފަހަރު އެންމެ އެކަށީގެންވާ ގޮތުގައި މާސްކް ނައްތާ ނުލެވޭތީ އިތުރު މައްސަލަތައް ފެންމަތިވޭ،