ޤާނޫނާއި ގަވާއިދުތަކާ އެއްގޮތްވާގޮތުގެ މަތިން، އެންމެ ފުރިހަމަގޮތުގައި ވޯޓްލުމުގެ ޙައްޤުގެ ބޭނުންހިފުމަށް ހިއުމަން ރައިޓްސް ކޮމިޝަން އޮފް ދަ މޯލްޑިވްސްއިން ގޮވާލައިފި އެވެ.
އެކޮމިޝަނުން އާންމުކުރި ބަޔާނުގައި ބުނެފައިވަނީ ޤައުމު ހިންގުމުގެ ނިޒާމުގައި ފަރުދީގޮތުން ބައިވެރިވެ، އިންތިޚާބުތަކުގައްޔާއި ރައްޔިތުންގެ ޚިޔާލު ހޯދުމުގެ ޢާންމު ވޯޓުތަކުގައި ވޯޓު ދިނުމާއި، އެމީހަކު އަމިއްލައަށް، ނުވަތަ އެމީހަކު މިނިވަންކަމާއެކު އިޚްތިޔާރުކުރާ މަންދޫބުން މެދުވެރިކޮށް ރައްޔިތުންގެ ކަންތައްތައް ހިންގުމުގައި ބައިވެރިވުމަކީ ކޮންމެ ފަރުދަކަށްމެ ލިބިގެންވާ އަސާސީ ޙައްޤެއް ކަމަށެވެ.
އެގޮތުން މެއި މަހުގެ 6، ވަނަ ދުވަހު ބޭއްވުމަށް ހަމަޖެހިފައިވާ ލޯކަލް ކައުންސިލް އިންތިޚާބުގައި، ޒިންމާދާރުކަމާއި، މިނިވަންކަމާއެކު ނުފޫޒުން އެއްކިބާވެތިބެ ވޯޓް ލުމަށް އެކޮމިޝަނުން ބުންޏެވެ.
އަދި މިއިންތިޚާބަކީ އިތުބާރުލިބިގެންވާ ކާމިޔާބު އިންތިޚާބަކަށް ހެދުމަށްޓަކައި މުޖުތަމަޢުގެ އަމާންކަން ދަމަހައްޓައި، ހަމަނުޖެހުމަކަށް މަގުފަހިވެދާނެ އެއްވެސް ޢަމަލެއް އެއްވެސް ފަރާތަކުން ނުހިންގުމަށް ވެސް އިލްތިމާސްކޮށްފައިވެ އެވެ.
އަދި ޤާނޫނާއި ގަވާއިދާއި، ދިވެހިރާއްޖެ ބައިވެރިވެފައިވާ ބައިނަލްއަޤްވާމީ މުޢާހަދާތަކާއި، ޤަރާރުތަކުން ރައްޔިތުންނަށް ލިބިދީފައިވާ ވޯޓު ދިނުމުގެ ޙައްޤު އެންމެ ފުރިހައަށް ލިބިދެވޭތޯ ކަށަވަރުކުރުމުގެގޮތުން މި އިންތިޚާބުގެ ކަންކަން އެ ކޮމިޝަނުން އޮބްޒާވްކުރަމުން ގެންދާނެކަށްވެސް ވަނީ ބުނެފައެވެ.
