ފާއިތުވި ދެ އަހަރަށްފަހު މިހާރު މޮނާކޯ ފެންނަނީ ތަފާތު މޮޅުކޮށް ކަމަށާއި އެޓީމުން ޔުވެންޓަސްއާ ދެކޮޅަށް ނުކުންނަ މެޗު ފަސޭހަ ނުވާނެ ކަމަށް ޔުވެންޓަސްގެ ކޯޗު މަސިމިލިއާނޯ އެލެގްރީ ބުނެފިއެވެ.
ދެހާސް ފަނަރަ ވަނަ އަހަރު ޗެމްޕިއަންސް ލީގްގެ ފައިނަލާ ހަމަޔަށް ޔުވެންޓަސް ދަތުރު ކުރީ ކްއާޓާ ފައިނަލުގައި މޮނާކޯ ބަލި ކުރުމަށްފަހު އެވެ. އޭގެ ދެ އަހަރު ފަހުން މޮނަކޯ ކުރިއަށް ޖެހިލައި މިރޭ އެ ޓީމުން ޔުވެންޓަސްއާ ދެކޮޅަށް ނިކުންނަނީ ސެމީ ފައިނަލުގަ އެވެ.
އެލެގްރީ ބުނީ ޔުވެންޓަސް އިން އަންނަނީ އެކި މެޗުތަކުގައި ކުރިއެރުންތައް ހޯދަމުން ކަމަށާއި އަދި އެޓީމުގެ ވަކިވަކި ޑިޕާޓްމެންޓްތަކުން ވެސް ބޮޑު ބޮޑު ކުރި އެރުންތަކެއް ހޯދަމުން އަންނަކަން ގަބޫލުކުރެވޭ ކަމަށެވެ.
އެލެގްރީ ބުނީ މޮނާކޯ އިން ކުޅެފައިވާ މެޗުތަކުގެ ތަފާތު ހިސާބުތައް ދައްކާ ގޮތުން އެޓީމުން ހަމަލާ އުފެއްދުމުގަ އާއި ޑިފެންސްގައި ބަދަލުތަކެއް ގެނެސްފައިވާކަން ފާހަގަ ކުރެވޭ ކަމަށާއި އަދި އެ ޓީމުން ގޯލް ޖެހުމަށްޓަކައި ވަރަށް ބޮޑަށް މަސައްކަތް ކުރާ ކަމަށެވެ.
މިރޭގެ މެޗުގައި ޔުވެންޓަސް އަށް ކުރިމަތިވާނެ އެއް މައްސަލައަކީ، ދެ ކާޑު ހަމަވުމުގެ ސަބަބުން ސާމީ ކެދީރާއަށް ސަސްޕެންޝަނެއް އައިސްފައިވުމެވެ. އެހެން ކަމުން އޭނާގެ ބަދަލުގައި ސެންޓަރަލް މިޑްފީލްޑަރަކަށް ކުޅެނީ ކްލައުޑިއޯ މަރުކީސިއޯ އެވެ.
އަންނަ ސީޒަންގައި، ޔުވެންޓަސްގެ ކޯޗްގެ ގޮތުގައި ހުންނާނަންތޯ އެހުމުން، އެލެގްރީ ބުނީ ސީޒަންގެ ފަހުން އެކަމާ ވާހަކަ ދައްކަން ކުލަބުގެ މެނޭޖްމެންޓާ ވާހަކަ ދައްކާނެ ކަމަށެވެ.
