އެމެރިކާގެ ތިރިގެ ޗެމްބަރަށް ވަންނައިރު މެޓަލް ޑިޓެކްޓަރސް އިން ބެލުމަށް ދެކޮޅު ހަދާ މެމްބަރުން ބޮޑު އަދަދުން ޖޫރިމަނާ ކުރުމަށް ނިންމާފައިވާ ކަމަށް ހައުސްގެ ސްޕީކަރ ނެންސީ ޕެލޯސީ ވިދާޅުވެއްޖެއެވެ.
ޕެލޮސީ ވިދާޅުވީ ހައުސްގެ ގާނޫނަށް ގެނެވުނު ބަދަލާއިއެކު، ޖަނަވަރީ މަހުގެ 21 އިން ފެށިގެން މެޓަލް ޑިޓެކްޓަރސްއިން ބެލުމަށްފަހު ނޫން ގޮތަށް ޗެމްބަރަށް ވަދެވަޑައިގަންނަވާ މެމްބަރުން 5000 ޑޮލަރާއި 10000 ޑޮލަރާއި ދެމެދު އަދަދަކުން ޖޫރިމަނާ ކުރުމަށް ނިންމާފައިވާ ކަމަށެވެ. އަދި މި ޖޫރިމަނާ މެމްބަރުންގެ މުސާރައިން ކެނޑޭނެ ކަމަށް ވެސް އެކަމަނާ ވަނީ ވިދާޅުވެފައެވެ.
ޕެލިސީ ވިދާޅުވީ މިއީ ހައުސްގެ ޗެމްބަރުގެ ރައްކާތެރިކަމަށްޓަކައި އެޅުނު ފިޔަވަޅެއް ކަމަށާއި، ހައުސްވާން ޖެހޭނީ ހުރިހާ ގޮތަކުންވެސް ރައްކާތެރި ތަނަކަށް ކަމަށެވެ.
ހައުސް އިން ސަލާމަތީ ފިޔަވަޅުތައް ވަރުގަދަ ކޮށްފައި މިވަނީ ޓްރަމްޕްގެ ސަޕޯޓަރުން ހައުސްގެ ތެރެއަށް ވަދެ ހަމަނުޖެހުން ހިންގުމާއިއެކުގައެވެ. ހައުސްއިން އެޅި ސަލާމަތީ ފިޔަވަޅުތަކުގެ ތެރޭގައި ހައުސްގެ ބޭރާއި އެތެރެ ބަލަހައްޓަމުން އަންނަ ފުލުހުންގެ އަދަދު އިތުރު ކުރުމާއި ހައުސްގެ ވަށައިގެންވާ ސަރަހައްދުތަކުން ހައުސްއަށް އާންމުނަށް ނުވަދެވޭނެހެން ސަލާމަތީ ފިޔަވަޅުތައް ވަރުގަދަ ކުރުން ހިމެނެއެވެ.
