ރާއްޖޭގެ ކިޔަވާ ކުދިންގެ ތެރެއިން ފަންސާސް އިންތައްސަ ކުދިންނަކީ ކުދި ސްކޫލުތަކުގައި ތައުލީމް ހާސިލްކުރަމުންދާ ކުދިން ކަމަށާއި މިކުދިންގެ ފެންވަރު މަތިކުރުމުގެ ގޮތުން ވާރޗުއަލް ޓީޗިން މިއަހަރުގެ ތެރޭގައި ތަޢާރަފްކުރުމަށް ވިސްނަމުންދާ ކަމަށް އެޑިޔުކޭޝަން މިނިސްޓަރ އައިޝަތު ޝިހާމްވިދާޅުވެއްޖެ އެވެ.
މިނިސްޓަރ އައިޝަތު ޝިހާމް މިހެން ވިދާޅުވީ ހޯމަ ދުވަހު ބޭއްވި ނޫސްވެރިންގެ ބައްދަލުވުމުގައެވެ. މިގޮތަށް ނިންމާ ވާރޗުއަލް ޓީޗިން ތައާރަފްކުރުމަށް ނިންމީ މިފަދަ ކުދިންނަށް ވެސް ރަނގަ ތައުލީމެއް ފޯރުކޮށްދިނުމުގެ ބޭނުމުގައި ކަމަށާއި ރާއްޖޭގެ ބޮޑު އާބާދީއެއްގެ ގިނަ ސްކޫލުތަކުގައި ކިޔަވަމުންދަނީ މަދު ކުދިން ކަމަށެވެ..
އެހެންކަމުން ކުދިންނަށްވެސް ކިޔަވައިދިނުމުގައި އައު އީޖާދީ ގޮތްތަކެއް ވިސްނާ މިއަހަރު ނިމުމުގެކުރިން ވާރޗުއަލް ޓީޗިންގެ ހިދުމަތް ފޯރުކޮށްދޭން ފަށާނެ ކަމަށް މިނިސްޓަރ ވިދާޅުވިއެވެ.
މިނިސްޓަރ ޝިހާމް ވިދާޅުވީ އެންމެ ކުއްޖެއްވެސް ބާކީ ނުކުރުމުގެ ސިޔާސަތުގެ ދަށުން ޚާއްޞަ އެހީއަށް ބޭނުންވާ ކުދިންނަށް ޚާއްޞަ ސަމާލުކަމެއްދީ، ހުރިހާ ކުދިން ޝާމިލްވާގޮތަށް ތަޢުލީމީ ހަމަހަމަ ފުރުޞަތުތަކެއް ފޯރުކޮށްދިނުމަށް ހަރުދަނާ ނިޒާމެއްގެ ދަށުން ގިނަގުނަ މަސައްކަތްތަކެއް ކުރަމުންދާ ކަމަށެވެ.
އެގޮތުން ރާއްޖޭގެ 193 ސްކޫލެއްގައި އިންކްލޫސިވް އެޑިޔުކޭޝަން ޕްރޮގްރާމްތައް ދަނީ ހިންގެމުން ކަމަށާއި އަދި މާލެއާއި އަތޮޅުތަކުގައި ޚާއްޞައެހީއަށް ބޭނުންވާ ދަރިވަރުންނަށް ތިން ސްޕެޝަލައިޒްޑް ސެންޓަރެއް ވަނީ ހުޅުވާފައި ކަމަށް ވިދާޅުވި އެވެ.
މީގެ އިތުރުންވެސް 39 ސްކޫލެއްގައި އިންކްލޫސިވް ޔުނިޓްތައް ހަދާ ޚާއްޞައެހީއަށް ބޭނުންވާ ދަރިވަރުންނަށް ބޭނުންވާ އެހީތެރިކަން ދަނީ ފޯރުކޮށް ދެމުން ކަމަށް މިނިސްޓަރ ވިދާޅުވި އެވެ.
އަދި ދަރިވަރުންގެ އާބާދީ މަދު ސްކޫލްތަކުގައި ރަނގަޅު ފެންވަރެއްގައި ދަރިވަރުންނަށް މަންފާ ކުރުވަނިވި ތައުލީމެއް ފޯރުކޮށްދިނުމަށް، ގިނަ ގްރޭޑްތަކެއް އެއްކޮށް އެއްކުލާސްރޫމެއްގައި ކިޔަވައިދިނުމަށް 39 ރަށެއްގައި މަލްޓި ގްރޭޑް އުސޫލުން ކިޔަވައިދޭން ވަނީ ފަށާފައި ކަމަށް ވިދާޅުވި އެވެ.
