ހޯރަފުށި އެއާޕޯޓުގެ މަޝްރޫއު އަކިީ ގައުމީ ރޫހާއި ގައުމީ ޖޯޝް އެކުލެވޭގޮތަށް ފުރިހަމަވެގެން ދިޔަ މަޝްރޫއެއް ކަމަށް ވިދާޅުވެ، ރައީސް އިބްރާހިމް މުހައްމަދު ސޯލިހު ހޯރަފުށީގެ ރައްޔިތުންނަށް ތައުރީފް ކުރައްވައިފިއެވެ.

މި ސަރުކާރުން ފުރަތަމަ ހުޅުވި އެއާޕޯޓް ''ހޯރަފުށި އެއާޕޯޓް'' ހުުޅުވުމުގެ ރަސްމިއްޔާތުގައި ވާހަކަ ދައްކަވަމުން ރައީސް ސޯލިހު ވިދާޅުވީ، އެއާޕޯޓުގެ މަސައްކަތް ކުރިޔަށް ދިޔައިރު އެ މަސައްކަތް ހަވާލުކުރި އެމްޓީސީސީގެ ފަރާތުން އެދުނު ކޮންމެ ކަމެއްގައި، އެ ރަށު ރައްޔިތުންގެ އެހީތެރިކަމާއި އެއްބާރުލުން ލިބިގެން ދިޔަ ކަމަށެވެ. އެކަންކަމަށް ބަލާއިރު، އެއީ ހޯރަފުށީ ރައްޔިތުންގެ ވަރަށް ބޮޑު ބައިވެރިވުމެއް އޮވެގެން ތަރައްގީކުރި އެއާޕޯޓެއް ކަމަށް އެމަނިކުފާނު ވިދާޅުވިއެވެ.

ހޯރަފުށީގެ ތާރިހަށް އަލިއަޅުއްވާލައްވަމުން ރައީސް ވިދާޅުވީ، ހޯރަފުއްޓަކީ އާދަޔާ ހިލާފު އުފެއްދުންތެރި ވިސްނުމެއް ގެންގުޅޭ ބަޔަކު ދިރިއުޅޭ ރަށެއް ކަމަށެވެ. އަދި އިލްމީ ގޮތުން ކުރިއަރައި ތަހުޒީބާއި ކުރިއެރުމަށް އަބަދުވެސް ވަރަށް ލޯބިކުރާ ބަޔަކު އުޅޭ ރަށެއް ކަމަށެވެ.

ހޯރަފުށީގެ މަޝްހޫރު މަރްހޫމް އާދަމް ސަލީމްގެ ދަރިކަލުން އަދި ރައްޔިތުންގެ މަޖިލީހުގެ ހޯރަފުށީ ދާއިރާގެ މެމްބަރު އަހުމަދު ސަލީމް އަށް ތައުރީފް ކުރައްވާ ރައީސް ވިދާޅުވީ، މަޝްރޫއުގެ އެކި ކަންކަމުގައި އަމަލީ ގޮތުން ސަލީމް ބައިވެރިވަޑައިގެން އެކަމަށް ދެއްވި ސަމާލުކަމަކީ، މަޝްރޫއު ފުރިހަމަކުރުމަށް ލިބުނު ވަރަށް ބޮޑު ބާރެއް ކަމަށެވެ. އާދަމް ސަލީމްގެ އާއިލާ އަށް ރައިސް ވަނީ ހާއްސަ ޝުކުރެއް އަދާކުރައްވާފައެވެ.

ރައީސް ސޯލިހު ވަނީ އެއާޕޯޓް މަޝްރޫއު ފުރިހަމަ ކުރުމަށްޓަކައި ޓްރާންސްޕޯޓް މިނިސްޓްރީން ދެއްވި ހާއްސަ ސަމާލުކަމަށްޓަކައި، މިނިސްޓަރު އާއިޝަތު ނަހުލާއަށާއި، އެ މިނިސްޓްރީގެ މުވައްޒަފުންނަށް ވެސް ޝުކުރު އަދާކުރައްވާފައެވެ. ޕްލޭނިންގ މިނިސްޓްރީން ކުރި މަސައްކަތްތައް ފާހަގަކޮށް، ޕްލޭނިންގ މިނިސްޓަރު މުހައްމަދު އަސްލަމަށްވެސް ރައީސް ވަނީ ޝުކުރު އަދާކުރައްވާފައެވެ.

ހޯރަފުށި އެއާޕޯޓް ބުދަ ދުވަހު ރަސްމީކޮށް ހުޅުވާފައިވާއިރު، އެއާޕޯޓަށް ޝެޑިއުލް ދަތުރުކުރަން ބާއްވަން ހަމަޖެހިފައިވަނީ މި މަހުގެ 26 ވަނަ ދުވަހު އެވެ. މި އެއާޕޯޓަކީ އެ ސަރަހައްދުގެ ގިނަ ރައްޔިތުންތަކަކަށް ލިބިގެން ދިޔަ ވަރަށް ބޮޑު އުފަލެކެވެ.