ރައީސުލްޖުމްހޫރއިއްޔާ އިބްރާހިމް މުހައްމަދު ސޯލިހުގެ ސަރުކާރަކީ ތަރައްގީގެ މަޝްރޫއުތަކުގެ ބިންގާ އަޅާ، ހަމަ އެ ބާރުމިނުގައި އެ މަޝްރޫއުއެއް ނިންމާ ސަރުކާރެއް ކަމަށް ޓްރާންސްޕޯޓު މިނިސްޓަރ އައިޝަތު ނަހުލާ ވިދާޅުވެއްޖެއެވެ.
ހއ. ހޯރަފުށި އެއަރޕޯޓު ހުޅުވުމަށްޓަކައި ބުރާސްފަތި ދުވަހު ބޭއްވުނު ރަސްމިއްޔާތެއްގައި ވާހަކަދައްކަވަމުން ނަހުލާ ވިދާޅުވީ މި ސަރުކާރަކީ ތަރައްގީގެ މަޝްރޫއުތަކުގެ ބިންގާ އަޅާ، ހަމަ އެ ބާރުމިނުގައި އެ މަޝްރޫއުއެއް ނިންމާ ސަރުކާރެއް ކަމަށެވެ. އަދި މި ސަރުކާރު ދެމި ތިބޭނީ އިގްތިސާދީ އަދި އިޖްތިމާއީ ކުރިއެރުމަށް ދާއިމީ އަދި ދެމެހެއްޓެނިވި ހައްލު ހޯދާދޭ ބައެއްގެ ގޮތުގައި ކަމަށެވެ.
މީގެ އިތުރުން އޭނާ ވިދާޅުވީ ހޯރަފުއްޓާއި އަދި މި ސަރަހައްދުގެ އެންމެހާ ރައްޔިތުންގެ ހުވަފެންތައް ހަގީގަތަކަށް ވެގެން ދިޔައީ އަތޮޅުތައް ތަރައްގީ ކުރުމަށް ރައިސް ސޯލިހު ދެއްވާ އިސްކަމެއްގެ ސަބަބުން ކަމަށެވެ. އަދި ދިވެހިރާއްޖޭގެ އެންމެ އުތުރުގެ އިގްތިސާދީ ނާރެހަކަށް ހޯރަފުށީގައި ހުޅުވިގެންދިޔަ އެއައރޕޯޓު ވެގެންދާއިރު، މި ކަންކަން ތަންފީޒުކޮށްދެއްވާ، ފުރިހަމަ އެއަރޕޯޓެއްގެ ގޮތުގައި އެއަރޕޯޓު ހުޅުވާދެއްވީތީ އޭނާ ވަނީ ރައީސަށް ޝުކުރު ދަންނަވާފައެވެ.
މިފަދަ އެއަރޕޯޓެއް ހުޅުވިގެން ދިޔައީ ދުނިޔެއަށް މިހާރު ކުރިމަތިވެފައިވާ ކޮވިޑުގެ ބަލިމަޑުކަމާ ގުޅިގެން މުޅި ދުނިޔެއަށް ހީނަރުކަމެއް އައިސްފައިވާ ދަނޑިވަޅެއްގައިކަން ފާހަގަކުރައްވާ މިނިސްޓަރ ވިދާޅުވީ އެކަމުގެ ސަބަބުން އެ ސަރަހައްދުގެ ރައްޔިތުންނަށް އިތުރު ފުރުސަތުތަކެއް ތަނަވަސް ވެގެންދާނެ ކަމަށެވެ. އަދި މިކަމުގެ ސަބަބުން، އިގްތިސާދީ އަދި ސިނާއީ މަސައްކަތްތައް ފަށައިގަންނަން ރައްޔިތުންނަށް އިތުރު ބާރަކަށް ވެގެންދާނެ ކަމަށެވެ.
