ބިގު ކުންފުނިން ބޭންކް އޮފް ސިލޯނުގައި ހުރި އެކައުންޓަކަށް ޖަމާކޮށްފައިވާ ފައިސާގެ އަސްލު ކަށަވަރުކުރެވިފައި ނުވާ މައްސަލައާއި ގުޅިގެން އެންޓި ކޮރަޕްޝަން ކޮމިޝަން (އޭސީސީ) އިން އެކުލަވާލި ރިޕޯޓު މަޖިލީހުގެ ޖުޑިޝަރީ ކޮމިޓީއަށް ފޮނުވައިފިއެވެ.

ހޯމަ ދުވަހުގެ ޖަލްސާގައި ވާހަކަ ދައްކަވަމުން ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވީ މޯލްޑިވްސް މަނިޓަރީ އޮތޯރިޓީ (އެމްއެމްއޭ) ގެ ފައިނޭންޝަލް އިންވެސްޓިގޭޝަން ޔުނިޓުގެ ސަސްޕިޝަސް ޓްރާންސެކްޝަން ރިޕޯޓާއި ގުޅިގެން ބަލަން ފެށި މައްސަލައިގައި ހިމެނޭ ކަންތައްތައް އެންޓި ކޮރަޕްޝަން ކޮމިޝަނުން ބަލާ ތަހުގީގު ކުރުމަށް ފަހު އެ ކޮމިޝަނުން އުފައްދާފައިވާ ރިޕޯޓެއް މަޖިލީހަށް ލިބިފައިވާ ކަމަށެވެ.

މި މައްސަލައިގެ ތަފްސީލްތައް ހިއްސާ ކުރައްވަމުން ނަޝީދު ވިދާޅުވީ މިއީ 2020 ވަނަ އަހަރުގެ މާޗް މަހުގެ 16 ވަނަ ދުވަހު ބިގު ކުންފުނިން 2،158،000ރ. (ދެ މިލިއަން އެއްލައްކަ ފަންސާސް އަށްހާސް) ރުފިޔާ ޖަމާ ކުރުމަށް ބީއެމްއެލްއަށް ދިއުމުން އެ ފައިސާގެ އަސްލު، އަދި އެއީ ކޮން ގޮތަކުން ލިބުނު ފައިސާއެއްކަން ހާމަކުރުމަށްޓަކައި ބޭންކަށް ހިއްސާ ކުރެވުނު މައުލޫމާތުތަކުން އެ ބޭންކަށް އެކަށީގެންވާ މިންވަރަށް އެ ފައިސާގެ އަސްލު އެ ލިޔެކިއުންތަކުން ޔަގީން ނުވާތީ އެ ފައިސާ ޖަމާކޮށްދީފައި ނުވާ ކަމަށެވެ.

އެހެންނަމަވެސް ބޭންކް އޮފް ސިލޯނުގައި ހުޅުވާފައިވާ އެކައުންޓަށް 18 މާޗް 2020 ގައި އެ ފައިސާ ޖަމާކޮށްފައިވާކަން ލިޔުންތަކުން އެނގެން އޮތް ކަމަށެވެ. އަދި ޕޮލިޓިކަލީ އެކްސްޕޯސްޑް ޕަރސަންސް، (ޕީއީޕީ) އަކާއި ގުޅުން ހުރި ކުންފުންޏެއްގެ އެކައުންޓަކަށް ބޮޑު އަދަދެއްގެ ނަގުދު ފައިސާ ޖަމާކޮށްފައިވާ ކަމަށް ރައީސް ނަޝީދު ވިދާޅުވިއެވެ.

އެ ނަގުދު ފައިސާ ދިން ކަމަށް ބިގުން ބުނެފައިވާ ސިންގަޕޫރުގެ ކުންފުނީގެ އަސްލު ނޭގޭތީއާއި އެ ނަގުދު ފައިސާގެ އަސްލު ޔަގީން ނުވާތީ އެ މުއާމަލާތާއި ގުޅިގެން އެމްއެމްއޭގެ އެފްއައިޔޫއިން އެކުލަވާލި ސަސްޕިޝަސް ޓްރާންސެކްޝަން ރިޕޯޓުގައި ފާހަގަކޮށްފައިވާ ކަންތައްތަކުގައި މަނީ ލޯންޑަރިންގގެ ކުށުގެ ކަންތައްތައް ހިމެނޭތޯ ބެލުމަށް އެ ރިޕޯޓު މޯލްޑިވްސް ޕޮލިސް ސަރވިސްގެ ސަމާލުކަމަށް ގެނައުމަށް ނިންމާފައިވާ ކަމަށް ރިޕޯޓުގައި ވާކަން އެ މަނިކުފާނު ފާހަގަކުރެއްވިއެވެ.

ރައީސް ނަޝީދު ވަނީ މި ރިޕޯޓު ދިރާސާ ކުރުމަށް މަޖިލީހުގެ ޖުޑިޝަރީ ކޮމިޓީއަށް ފޮނުވާފައެވެ.