ރާއްޖޭގެ ރަށްތަކަށް ކަރަންޓު ފޯރުކޮށްދިނުމަށް ސަރުކާރުން ކުރަމުންދާ މަސައްކަތުގެ ތެރެއިން، ޅ.ކުރެންދޫގައި އަލަށް ހެދުމަށް ހަމަޖެހިފައިވާ ފެނަކައިގެ އިމާރާތްތަކެއްގެ ބިންގާ އަޅައިފި އެވެ.

ކުރެންދޫގައި އަލަށް އިމާރާތްކުރާ ފެނަކަ އިންޖީނުގެ އާއި އޮފީސް އިމާރާތުގެ ބިންގާ އަޅުއްވައިދެއްވީ ހުކުރު ދުވަހު މެނޭޖިން ޑިރެކްޓަރު އަހުމަދު ސައީދާއި ކުރެންދޫ ދާއިރާގެ މެންބަރު ޢަބްދުލް ޣަނީ އެވެ.

މިމަޝްރޫއާއި ބެހޭ ގޮތުން ފެނަކައިން ބުނީ އަލަށް އިމާރާތް ކުރެވޭ އޮފީހުގެ ސަބަބުން ކުރެންދޫގެ އިތުރުން އެސަރަހައްދުގެ ރަށްތަކަށް ޚިދުމަތް ހޯދުމަށް ގިނަ ލުއިތަކެއް ލިބިގެންދާނެ ކަމަށެވެ. އަދި މިހާރު ދިމާވާ މައްސަލަތަކަށް ހައްލު ލިބިގެންދާނެ ކަމަށެވެ.

އަތޮޅުތެރޭގައި ދެވޭ ކަރަންޓުގެ ޚިދުމަތުގެ ފެންވަރު ރަނގަޅު ކުރުމަށް ސަރުކާރުން ދަނީ ގިނަ މަސައްކަތްތައް ކުރަމުންނެވެ. އަދި ކަރަންޓުގެ ޚިދުމަތްތައް ފުޅާކުރުމުގެ ގޮތުން މީހުން ދިރިއުޅޭ ސަރަހައްދުތަކުގައި ހުންނަ އިންޖީނުގެ ގެތަށް މީހުން ދިރިނޫޅޭ ސަރަހައްދުތަކަށް ބަދަލު ކުރުމުގެ މަސައްކަތް ވެސް ދަނީ ކުރަމުންނެވެ.

ފެނަކައިން އަންނަނީ މިއަހަރު ނިމެންވާއިރަށް 28 ރަށެށްގެ އިންޖީނުގެ އައުކޮށް ޒަމާނީ ފެންވަރަށް ބަދަލުކޮށް، ކުރިއަށް އޮތް 3 އަހަރު ތެރޭގައި 56 ރަށެއްގެ އިންޖީނުތައް އަޕްގްރޭޑުކޮށް އިންޖީނުގެތައް ރީލޮކޭޓުކުރުމުގެ މަސައްކަތް އެއްކޮށް ނިމާލުމަށް އަމާޒު ހިފާފަ އެވެ.

މީގެ އިތުރުން އެ ކުންފުނިން އަންނަނީ އިންޖީނުގެތަކާއިއެކު އޮފީސް އިމާރާތްތަކަށްވެސް ބޮޑެތި ބަދަލުތަކެއް ގެންނަމުންނެވެ.