ފުލުހުންގެ އިންޓެލިޖެންސް ކަމަށް ބުނެ، ފޭރުނު މައްސަލާގައި މީހަކު ހައްޔަރުކޮށްފައިވާ ކަމަށް ފުލުހުން ބުނެފި އެވެ.
މިމަހުގެ 11 ވީ ބުދަ ދުވަހުގެ ހެނދުނު ވަގުތެއްގައި މާލެ މަޖީދީމަގު ފަރިވާ ސްޓޭއަށް ވަން ތިން މީހަކު ވަނީ ތިމަންނާމެންނަކީ ޕޮލިސް އިޓެލިޖެންސުގެ ބަޔެއް ކަމަށް ބުނެ އެތަނުގައި ތިބި ތިން މުވައްޒަފުންގެ ކްލިޕް އަޅުވާ ބަނދެފަ އެވެ. އަދި އެތަނުގެ ބައެއް ތަކެތި ފޭރިގަނެގެން ގޮސްފައިވެ އެވެ.
މިމައްސަލައާއި ގުޅިގެން ފުލުހުން ބުނީ ތުހުމަތު ކުރެވޭ މީހަކު ކޯޓު އަމުރެއްގެ ދަށުން ބުރާސްފަތި ދުވަހުގެ ހެނދުނުގެ ވަގުތުގައި ހައްޔަރުކޮށްފައިވާ ކަމަށެވެ. އެއީ 42 އަހަރުގެ ދިވެހި ފިރިހެނެއް ކަމަށެވެ ފުލުހުން ބުންޏެވެ.
އޭނާގެ ބަންދާއި މެދު ގޮތެއް ނިންމުމަށް ކޯޓަށް ހާޒިރު ކުރުމުން މިނިސްޓްރީ އޮފް ހޯމް އެފެއަރޒް އިން ކަނޑައަޅާ ތަނެއްގައި ބަންދުގައި ބަހައްޓައިގެން ކުރިއަށް ގެންދިއުމަށް 15 ދުވަހުގެ މުއްދަތެއް ވަނީ ދީފައިވާ ކަމަށް ފުލުހުން ބުންޏެވެ. މިމައްސަލަ ފުލުހުން ދަނީ އިތުރަށް ތަހުގީގު ކުރަމުންނެވެ.
