މާލޭގައި ދުއްވާ ބާ ޓެކްސީތައް އައު ޓެކްސީތަކަށް ބަދަލުކުރަން ބޭނުންވާ ފަރާތްތަކަށް ލޯނުގެ އެހީ ލިބޭނެ ގޮތް ހަމަޖެއްސުމާއި ގުޅޭ ގޮތުން މަޝްވަރާ ކުރެވެމުންދާ ކަމަށް ޓްރާންސްޕޯޓް މިނިސްޓަރު އައިޝަތު ނަހުލާ ވިދާޅުވެއްޖެ އެވެ.
ޓްރާންސްޕޯޓް މިނިސްޓްރީގެ މަސައްކަތްތަކާއި ގުޅޭ ގޮތުން ''ރާއްޖެޓީވީ'' އަށް ދެއްވި ހާއްސަ އިންޓަވިއުއެއް ގައި ނަހުލާ ވިދާޅުވީ، މާލޭ ސަރަހައްދުގައި ދުއްވާ ގިނަ ޓެކްސީތަކަކީ ދުވަސްވެ ބާވެފައި ހުރި ޓެކްސީތައް ކަމަށެވެ. އެހެންކަމުން ބާ ޓެކްސީތައް ނައްތާލުމަށް ފަހު އައު ޓެކްސީތައް ގަންނަން ބޭނުންވާ ފަރާތްތަކަށް ފަސޭހަ ގޮތްތަކެއް ހަމަޖެއްސުމުގެ މަސައްކަތް ކުރެވެމުންދާ ކަމަށް ވިދާޅުވި އެވެ.
އެބޭފުޅުން އައު ޓެކްސީ ގަތުމަށްޓަކައި ކުރިން ގެންގުޅޭ ބާ ޓެކްސީ ނައްތާލުމަށް އައު ޓެކްސީ ގަންނަ ފަރާތްތަކަށް ލޯނުގެ އެހީ ލިބޭނެ ގޮތަކަށް އަޅުގަނޑުމެން އިކޮނޮމިކް މިނިސްޓްރީއާ ވާހަކަ ދެކެވެިފައިވަނީއައިޝަތު ނަހުލާ - ޓްރާންސްޕޯޓް މިނިސްޓަރު
ނަހުލާ ވިދާޅުވާ ގޮތުގައި މާލެއަށް ދިމާވެފައިވާ ވެހިކަލްގެ މައްސަލަ ހައްލު ކުރުމާއި ދިމާލަށް ދިޔުމުގެ ކުރިން ރައްޔިތުންނަށް ފަސޭހަވާ ގޮތަށް ޕަބްލިކް ޓްރާންސްޕޯޓް އެއް ގާއިމްކޮށްދޭނެ ޖެހެއެވެ.
އެ ނިޒާމަކީ ރައީސް އިބްރާހިމް ސޯލިހުގެ ވައުދުތަކުގެ ތެރޭގައި ހިމެނިގެން ޓްރާންސްޕޯޓް މިނިސްޓްރީ އަށް ހަވާލުކުރެވިފައިވާ މިނީ ބަހުގެ ހިދުމަތް ތައާރަފް ކުރުމެވެ. ނަހުލާ ވިދާޅުވީ، މިނީ ބަހުގެ ހިދުމަތް ފެށޭނެ ކަމަށް ލަފާކުރަނީ އަންނަ އަހަރުގެ ކުރީކޮޅު ކަމަށެވެ. އެކަން ނުކުރެވުނު މައިގަނޑު ސަބަބެއް ކަމުގައި އޭނާ ވިދާޅުވީ، އެކަމަށް ބޭނުންވާ ބަޖެޓް ނުލިބުމެވެ.
ފާއިތުވި ދެ އަހަރު މިނިސްޓްރީން ކުރެވިފައިވާ މަސައްކަތްތަކާއި މެދު ދެކެވަޑައިގަންނަވަނީ ކިހިނެއްތޯ ސުވާލު ކުރުމުން ނަހުލާ ވިދާޅުވީ، ކުރެވުނު މަސައްކަތްތަކާއި މެދު ހިތްހަމަޖެހިވަޑައިގަންނަވާ ކަމަށެވެ. ސަބަބެއް ކަމަށް ނަހުލާ ފާހަގަކުރެއްވި ބޭނުންވާ ވަރަށް މުވައްޒަފުން ނުލިބުމުގެ އިތުރުން ބައެއް މަސައްކަތްތައް ލަސްވުން ކަމަށެވެ. ނަމަވެސް އިތުރު މުވައްޒަފުން ހޯދަން ބަޖެޓް ހަމަޖެހިގެން ދިޔުމުން އަންނަ އަހަރު އެކަންތައްތަކަށް ހައްލެއް އަންނާނެކަން ނަހުލާ ފާހަގަކުރެއްވި އެވެ.
