ރައްޔިތުންގެ މަޖިލީހަށް އެންމެ ރަނގަޅަށް ޖަވާބުދާރީވާ ސަރުކާރަކަށް މިސަރުކާރު ވާނެ ކަމަށް ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ވިދާޅުވެއްޖެ އެވެ.
ރާއްޖެޓީވީގެ ފަށާއިރު ޕްރޮގްރާމްގައި ރައްޔިތުންގެ މަޖިލީހުން ސަރުކާރުގެ ތެރެއަށް މާބޮޑަށް ވަނުމަށް މަސައްކަތްކުރާކަމަށް ދެކެވޭ ވާހަކަތަކާއި ގުޅޭގޮތުން އެއްސެވި ސުވާލަށް ޖަވާބުދެއްވަމުން ރައީސް ވިދާޅުވީ ޤާނޫނު އަސާސީގައި ވަރަށް ސާފުކޮށް ތިން ބާރުގެ އިން ވަކިކޮށްފައިވާ ކަމަށެވެ. ދެކެވަޑައިގަންނަވަން ބޭނުންފުޅުވަނީ ކޮންމެ ބާރެއްވެސް އެބާރެއްގެ އިމުގެ ތެރޭގައި މަސައްކަތްކުރަމުން އަންނަތަން ކަމަށް ރައީސް ވިދާޅުވިއެވެ.
އަދި އެމަނިކުފާނަކީ ގިނަ ދުވަސްތަކެއްވަންދެން ރައްޔިތުންގެ މަޖިލީހުގައި މަސައްކަތް ކުރި މީހަކަށްވާއިރު އެހޭދަކުރެއްވި ދުވަސްތަކުގެ ތެރޭގައި އެންމެ ރަނގަޅަށް މަސައްކަތްކުރުމުގެ ފުރުސަތު ލިބިގެންގޮސްފައިނުވާ ކަމަށް ރައީސް ވިދާޅުވިއެވެ. އޭރު ވެރިކަމުގެ ނުފޫޒު ވަރަށް ބޮޑަށް މަޖިލީހުގެ ތެރެއަށް ވެރިވެފައިއޮތް ކަމަށް ރައީސް ވިދާޅުވިއެވެ.
ޤާނޫނީ ގޮތުން ލިބިފައި އޮތް މަސައްކަތް ނުކުރެވޭ ހިސާބަށް ބައެއް ވަގުތުދިޔަ. އެހެންނަމަވެސް އަޅުގަނޑު ފާހަގަކޮށްލާނަން އަޅުގަނޑުމެން 2008 ގައި ވެރިކަމުގައި އޮތްއިރުގައި ރައްޔިތުންގެ މަޖިލީހުގެ ރައީސަކަށް އިންނެވީ އަބްދުﷲ ޝާހިދު. އޭރު މަޖިލީހުގެ ގަވައިދާ އެއްގޮތަށް ސަރުކާރަށް ނިސްބަތްވަނީ އޭރު. އެހެންވިއަސް ވަރަށް ރަނގަޅަށް އެމަސައްކަތް ކުރައްވަމުން ގެންދެވިތަން އަޅުގަނޑު ދުށިން ގަވާއިދުގެ އިމުގެ ތެރޭގައި. އަދި މިހާރު އިންނެވީ ކުރީގެ ރައީސް ، ރައީސް މުހައްމަދު ނަޝީދުވެސް ބުރަ މަސައްކަތްތަކެއް އެބަކުރައްވާ . އަޅުގަނޑު ހަމަ ދެކެން ބޭނުންވޭ ރައްޔިތުންގެ މަޖިލިސް ވަރަށް ރަނގަޅަށް ޕާރފޯމްކުރާ ތަން. އެގޮތުން ވަރަށް ގިނަ ރަނގަޅު މަސައްކަތްތަކެއް އެބަކުރޭ. އެހެންނަމަވެސް އަދި މިއަށްވުރެ ރަނގަޅު މަސައްކަތްތަކެއް ކުރެވޭނެކަމަށް އަޅުގަނޑު ގަބޫލުކުރަން.ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު
ރައީސް ވިދާޅުވީ މަޖިލީހުގެ މަސައްކަތްތައް ހުންނަ ގޮތުން ބައެއް ފަހަރު ދަތިއުނދަގޫވާ ކަންކަން ހުންނަ ކަމަށެވެ. އެކަންކަން މަޖިލިސް ކުރިއަށްދާވަރަކަށް ހަމަޖެހިގެންދާނެ ކަމަށް ރައީސް ވިދާޅުވިއެވެ. އަދި ސަރުކާރު ޖަވާބުދާރީ ކުރުމަށްޓަކައި ކުރަންޖެހޭ މަސައްކަތްތައް ވަރަށް ބާރަށް ކުރައްވާ ކަމަށް ރައީސް ވިދާޅުވިއެވެ.
އަޅުގަނޑުމެން ވާނެ މިސަރުކާރުވާނެ އެންމެ ރަނގަޅަށް ޖަވާބުދާރީވާ ސަރުކާރަށް ރައްޔިތުންގެ މަޖިލީހަށް. އަދި ރައްޔިތުންނަށްވެސް. މިސާލަކަށް ބައެއް ދުވަސްވަހު ބައެއް ވަޒީރުން މަޖިލީހަށް އެންމެ ސުވާލަކަށް ވަޑައިގެން ދޮޅުގަޑީއިރު ފްލޯރގައި އެބަ ހޭދަކުރައްވާ. ވަށައިގެން ހުރި ހުރިހާ ސުވާލުތަކަށް ޖަވާބު ދެއްވާފައި އެބަ ވަޑައިގަންނަވާ. އެހެންވީމާ އަޅުގަނޑު ދަންނަވާނީ ރައްޔިތުންގެ މަޖިލިސް އަދި މިހާރަށް ވުރެ ރަނގަޅަށް ސަރުކާރުވެސް މިހާރަށްވުރެ ރަނގަޅަށް މަސައްކަތްކުރެވޭނެ އަދިވެސް.ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު
19 ވަނަ ރައްޔިތުންގެ މަޖިލީހަކީ ސަރުކާރު ހިންގާ މައި ޕާޓީ އެމްޑީޕީގެ ސުޕަރ މެޖޯރިޓީ އޮތް މަޖިލީހެކެވެ. އެއާއެކުވެސް މަޖިލީހުން އަންނަނީ ސަރުކާރު ޖަވާބުދާރީ ކުރުވުމަށް ގިނަ މަސައްކަތްތަކެއް ކުރަމުންނެވެ.
