އެއިޖިއަން ސީ ސަރަހައްދަށް އައި ބިންހެލުމާއި ގުޅިގެން ތުރުކީވިލާތަށާއި ގްރީސްއަށް ފޮރިންގ މިނިސްޓަރ އަބްދުﷲ ޝާހިދު ހަމްދަރުދީގެ މެސެޖެއް ފޮނުއްވައިފިއެވެ.
ފޮރިންގ މިނިސްޓްރީ އިން މައުލޫމާތުދިން ގޮތުގައި އެއިޖިއަން ސީ އަށް އައި ބާރުގަދަ ބިންހެލުމާއި، އަދި ބިންހެލުމާއި ގުޅިގެން އުފެދުނު ސުނާމީގައި ގިނަ ބަޔަކު މަރުވެ، ބޮޑެތި ގެއްލުންތަކެއް ލިބުމާއި ގުޅިގެން ތުރުކީ ވިލާތަށާއި، ގްރީސްއަށް މިނިސްޓަރ ޝާހިދު ވަނީ ހުކުރު ދުވަހު ހަމްދަރުދީގެ މެސެޖެއް ފޮނުއްވައިފައެވެ.
މިނިސްޓްރީ އިން ބުނީ މިނިސްޓަރ ޝާހިދު، ދެގައުމުގެ ހާރިޖީ ވަޒީރުންނަށް ހުކުރު ދުވަހުގެ ރޭ ވަކިވަކިން މެސެޖް ފޮނުވާފައިވާ ކަމަށެވެ.
އެގޮތުން މި މެސެޖްގައި މިކާރިސާތަކުގައި މަރުވި މީހުންގެ އާއިލާތަކަށް ތައުޒިޔާ ރައްދުކޮށްދެއްވުމަށް މިނިސްޓަރ އެދިވަޑައިގެންފައިވާ ކަމަށް ފޮރިން މިނިސްޓްރީ އިން މައުލޫމާތުދީފައި ވެއެވެ. އަދި މި ހިތާމަވެރި ހަބަރު އެއްސެވީ ފުން ހިތާމަޔާއެކުގައި ކަމަށް ވިދާޅުވެ، ހިތާމައިގެ މި ދަނޑިވަޅުގައި ދިވެހި ސަރުކާރާއި ރައްޔިތުން ތިބީ ގްރީސް އަދި ތުރުކީވިލާތުގެ ސަރުކާރާއި ރައްޔިތުންނާއެކުގައި ކަމަށް ވެސް މިނިސްޓަރ ވަނީ ވިދާޅުވެފައެވެ.
މިނިސްޓަރ ޝާހިދު ވަނީ މީހުން ސަލަމާތްކުރުމުގެ މަސައްކަތް ވީހާވެސް އޮމާންކޮށް، އަވަސް މިނެއްގައި ކުރިއަށްދާނެކަމަށް އުއްމީދުކުރައްވާކަމަށް ވިދާޅުވެފައެވެ.
