ކަރަންޓީނުވުމަށް ދިއުމުގެ ކުރިން ހަދާފައިވާ ޕީސީއާރު ޓެސްޓްގެ ނަތީޖާ ނެގެޓިވްވި ކަމުގައިވިއަސް ރަށަށް ދިއުމަށްފަހު ކަރަންޓީނު ވުމުގެ އާންމު އުސޫލާއި އެއްގޮތަށް 14 ދުވަސް ފުރިހަމަކުރަންޖެހޭނެ ކަމަށް ހެލްތު ޕްރޮޓެކްޝަން އެޖެންސީ (އެޗްޕީއޭއީ)ން ބުނެފި އެވެ.

ކަރަންޓީނުގެ 14 ދުވަސް ފުރިހަމަވުމުން ޕީސީއާރު ޓެސްޓް ހަދާ ނަތީޖާ ނެގެޓިވްވުމުން އޮންނަ އުސޫލުގެ މަތިން ދޫކޮށްލެވޭނެކަމަށް ދިހަ މީހުން ނުވަތަ އެއަށްވުރެ ގިނަ މީހުން އެއް ކޮޓަރިއެއްގައި ނުވަތަ ޑޯރމިޓަރީއެއްގައި ނުވަތަ ބެރެކްސްއެއްގައި ފުރަބަންދުގެ ކަރަންޓީނުވުމުގައި އަމަލު ކުރަންވީ ގޮތް ބަޔާންކޮށް އެޗްޕީއޭއިން އެކުލަވާލާފައިވާ އުސޫލުގައި ވަނީ ބުނެފައެވެ.

މިއުސޫލު ބުނާގޮތުން ރާއްޖެއިން ބޭރުން އަންނަ ދިވެހިންނާއި ވޯކްޕާމިޓް އޮންނަ ފަރާތްތައް ފިޔަވައި ރާއްޖެއަށް އަންނަ ބިދޭސީންގެ ނެގެޓިވް ޕީސީއާރު ރިޒަލްޓެއް އޮންނަންވާނެ އެވެ. އަދި މިގޮތަށް ހަދާ ޕީސީއާރު ޓެސްޓްގެ ސާމްޕަލް ނަގަންވާނީ ރާއްޖެއައުމަށް ފުރާ ފުރަތަމަ ބަނދަރުން ފުރުމުގެ 96 ގަޑީއިރުގެ ތެރޭގައެވެ.

ރާއްޖެއައުމަށް ކުރާ ދަތުރުމަތީގައި ޓްރާންސިޓް ކުރަންޖެހޭނަމަ ޕީސީއާރު ޓެސްޓްގެ ނަތީޖާ ގަބޫލުކުރާނީ ޓްރާންސިޓްގައި 24 ގަޑިއިރަށްވުރެ އިތުރުނުވާ ކަމަށްވާނަމަ ކަމަށް އެޗްޕީއޭއިން ބުނެއެވެ. ރާއްޖެއައުމަށް ކުރާ ދަތުރުގައި 24 ގަޑީއިރަށްވުރެ ދިގު ޓްރާންސިޓެއް ކުރާނަމަ ޓްރާންސިޓް ކުރި ތަނުން ފުރުމުގެ 96 ގަޑީއިރު ތެރޭގައި އަލުން ޕީސީއާރު ޓެސްޓް ހަދަންވާނެ ކަމަށް މިއުސޫލުގައި ބުނެފައިވެ އެވެ.

ރާއްޖެއިން ބޭރުން އަންނަ ބައެއްނަމަ އެންމެ އެދެވިގެންވަނީ މާލެ ނުވަތަ ކޮމިއުނިޓީ ސްޕްރެޑް އޮތް އެހެން ތަނެއްގައި މަޑުނުކޮށް ވީހާވެސް އަވަހަށް ކަރަންޓީނުވާން ދާ ރަށަށް ދަތުރުކުރުން ކަމަށާއި ދަތުރުކުރެވެންދެން މަޑުކޮށްގެން ތިބޭ މުއްދަތުގައިވެސް ތިބެންވާނީ ކަރަންޓީނުވެގެން ކަމަށް އުސޫލުގައި ބުނެފައިވެ އެވެ.

ރާއްޖޭގައި އުޅޭ ދިވެހިންނާއި ބިދޭސީން ކޮމިއުނިޓީ ސްޕްރެޑެއް އޮތް ރަށަކުން ކޮމިއުނިޓީ ސްޕްރެޑެއް ނެތް ރަށަކަށް ދާނަމަ އެރަށަކަށް ފުރުމުގެ 72 ގަޑީއިރުތެރޭގައި ޕީސީއާރު ޓެސްޓެއް ހަދަންވާނެ ކަމަށާއި އަދި މިގޮތަށްދާނަމަ ނެގެޓިވް ޕީސީއާރު ނަތީޖާ އެއް އޮންނަންވާނެ ކަމަށް އުސޫލުގައި ބުނެފައިވެ އެވެ.

އަދި ރާއްޖެއިން ބޭރުން އަންނަ ބިދޭސީން ރާއްޖެއަށް އަންނައިރު ނެގެޓިވް ޕީސީއާރު ރިޒަލްޓެއް އޮތްނަމަ ރާއްޖެ އައުމަށްފަހު ކޮމިއުނިޓީ ސްޕްރެޑް އޮތް ރަށެއްގައި 72 ގަޑީއިރު ނުވާނަމަ ފުރަބަންދު ކަރަންޓީނަށް ދާން ޕީސީއާރު ޓެސްޓް އަލުން ހަދާކަށް ނުޖެހޭނެ އެވެ. އެހެންނަމަވެސް 72 ގަޑީއިރަށްވުރެ ގިނައިރު މަޑުކުރަންޖެހޭނަމަ ފުރަބަންދު ކަރަންޓީނަށް ދާން ފުރުމުގެ ކުރިން އަލުން ޕީސީއާރު ޓެސްޓް ހަދަންވާނެ ކަމަށް އުސޫލުގައި ބުނެފައިވެ އެވެ. އަދި މިހެން ހުންނައިރުވެސް ކަރަންޓީނު އުސޫލާ އެއްގޮތަށް އަމަލުކުރަންވާނެ ކަމަށް ބުނެފައިވެ އެވެ.

ހުން އައުން، ކެއްސުން ފަދަ ކޮވިޑް-19 ގެ އަލާމާތްތައް ހުރި ފަރާތެއްނަމަ ޕީސީއާރު ޓެސްޓްގެ ނަތީޖާ ނެގެޓިވްވި ކަމުގައިވިއަސް ދަތުރުނުކޮށް މަޑުކުރަންވާނެ ކަމަށާއި އަދި ދަތުރުކުރަންވާނީ އަލާމާތްތައް އެއްކޮށް ރަނގަޅުވުމަށްފަހު މަދުވެގެން 48 ގަޑީއިރު ވުމަށްފަހު ކަމަށް އުސޫލުގައި ބުނެފައިވެ އެވެ.

މީގެއިތުރުން މިއުސޫލުގައި ދަތުރުކުރާ ފަރާތްތަކުން ހުއްދަ ހޯދުމުގައި އަމަލުކުރާނެ ގޮތްވެސް ވަނީ ބަޔާންކޮށްފައެވެ. އެގޮތުން ކަރަންޓީނުވާންދާ ފަރާތްތަކުގެ ބެލެނިވެރި، ކުންފުނި ނުވަތަ މުއައްސަސާއިން [email protected] އަށް ދަތުރުކުރަން ބޭނުންވާ މީހުންގެ ތަފްސީލާއި ޕީސީއާރު ޓެސްޓްގެ ނަތީޖާ އަދި ދަތުރުކުރުމުގެ ކުރިން ފުރަބަންދު ހާލުބެލުން ޕޯޓަލް ގައި ރަޖިސްޓްރީވެ ފުރަބަންދު ކަރަންޓީނު ދިއުމަށް ހޯދަންޖެހޭ ހުއްދަތައް އޮންނަ އުސޫލުގެ ދަށުން ހޯދަންޖެހޭނެ އެވެ.

ކަރަންޓީނުވާން ދާ ފަރާތްތަކަށް ދަތުރުމަތީގައި އާއި ކަރަންޓީނުގައި ތިބޭއިރު އަމަލުކުރަންޖެހޭ ގޮތުގެ މައުލޫމާތު ފުރުމުގެ ކުރިން ވަޒީފާދިން ފަރާތުން ނުވަތަ އެބައެއްގެ ބެލެނިވެރި ފަރާތުން ފޯރުކޮށްދޭންޖެހޭނެ އެވެ. އަދި ކަރަންޓީނުވާން ޖެހޭ ތަންތަނުގައި ހުންނަންޖެހޭ މިންގަނޑުތައް ފުރިހަމަވެފައިހުރިތޯ ބެލެނިވެރި ފަރާތުން ކަށަވަރުކުރަން ޖެހޭނެ އެވެ.