އައްޑޫ ސިޓީގައި ގާއިމްކުރާ ގޭދޮށު މަސްޕްލާންޓްގެ އަމަލީ މަސައްކަތް ކުރިއަށް އޮތް ދެމަސްދުވަހުގެ ތެރޭގައި ފެށޭނެ ކަމުގެ އުންމީދު އެބައޮތް ކަމަށް މޭޔަރު އަބްދުﷲ ސޯދިގު (ސޯބެ) ވިދާޅުވެއްޖެއެވެ.
މަސްވެރިންނަށް ފަހިފުރުސަތުތައް ހޯދައިދިނުމަށް އައްޑޫސިޓީގައި ގާއިމް ކުރާ މަސްޕްލާންޓްގެ މަސައްކަތްތައް ކުރުމަށް ކޮންޓްރެކްޓަރާއެކު ވަނީ އެއްބަސްވުމުގައި ސޮއިކޮށްފައިއެވެ. އެގޮތުން މަރަދޫގައި ގާއިމްކުރާ ގޭދޮށު މަސްޕްލާންޓްގެ މަސައްކަތް ހަވާލު ކޮށްފައިވަނީ ވަނީ ޓްރައިޑެންޓް ޕްރައިވެޓް ލިމިޓެޑާ އެވެ. ހުޅުދޫމީދޫގައި ގާއިމްކުރާ ގޭދޮށު މަސްޕްލާންޓްގެ މަސައްކަތް ހަވާލު ކޮށްފައިވަނީ މެކޯ ޕްރައިވެޓް ލިމިޓެޑާ އެވެ. އަދި ހިތަދޫގައި ގާއިމުކުރާ ގޭދޮށު މަސް ޕްލާންޓް ހަވާލުކޮށްފައިވަނީ އެލްނާތު މޯލްޑިވްސް ޕްރައިވެޓް ލިމިޓެޑާއެވެ.
މިމަޝްރޫއުގެ މަސައްކަތްތައް ތަފްސީލް ކޮށްދެއްވައި ރާއްޖެޓީވީގެ "ފަލަސުރުހީ" ޕްރޮގްރާމްގައި މޭޔަރު ސޯބެ ވިދާޅުވީ އިންޑިއާ ސަރުކާރުގެ ހައި އިމްޕެކްޓް ކޮމިޔުނިޓީ ޑިވެލޮޕްމަންޓް ޕްރޮޖްކްސް ހިންގުމަށް ދެވޭ އެހީގެ ދަށުން އައްޑޫގެ ތިން ސަރަހައްދެއްގައި މަސްޕްލާންޓް ގާއިމް ކުރެވިގެންދާނެ ކަމަށެވެ.
ސޯބެ ވިދާޅުވީ މަސްޕްލާންޓް ގާއިމް ކުރުމުގެ މަސައްކަތްތައް ކުރިއަށްދާ ކަމަށާއި، މިހާރު ކުރިއަށްދަނީ ޑިޒައިނިންގގެ މަސައްކަތްތައް ކަމަށެވެ. އަދި ކުރިއަށް އޮތް މަހެއް ނުވަތަ ދެމަސް ދުވަހުގެ ތެރޭގައި އަމަލީ މަސައްކަތް ފެށިގެންދާނެ ކަަމަށް އުންމީދު ކުރާ ކަމަށް ސޯބެ ވިދާޅުވިއެވެ.
ތިން ސަރަހައްދެއްގައި ގާއިމް ކުރުމަށްޓަކައި ތިން މަޝްރޫއެއް ފެށިފައިވަނީ، އިންޑިއާ ހިލޭ އެހީގެ ދަށުން ކުރިއަށް ގެންދާ މިމަޝްރޫއުގެ ކޮންޓްރެކްޓަރުން ހޯދި ޑީޒައިން ކުރުމުގެ މަސައްކަތްތައް ކުރިއަށް ގެންދަނީ. އަމަލީ މަސައްކަތް ކުރިއަށް މިއޮތް މަހެއް ދެމަހެއްގެ ތެރޭގައި ފެށޭނެ ކަމަށް އަޅުގަނޑުމެން ދެކެނީ. މިކަމުގެ ސަބަބުން ވަޒީފާ އިތުރުވުމާއި މަސްގަނެ ރަށުގައި މަސް ޕްރޮސެސް ކުރުމުގެ އިތުރު ފުރުސަތުތަކެއް ފަހިވެގެންދާނެ.މޭޔަރު އަބްދުﷲ ސޯދިގު
ސޯބެ ވިދާޅުވީ މި މަޝްރޫއުގެ ސަބަބުން މަސްވެރިކަމުގެ ނަފާ އިތުރުވެ މަސްވެރިކަމުގެ ސިނާއަތް އިތުރަށް ފުޅާވެގެންދާނެ ކަމަށެވެ. މިމަޝްރޫއިން މަސްވެރިންނަށް ލިބެމުންދާ އާމްދަނީ އިތުރުކުރުމަށް ފުރުސަތުތަކެއް ފަހިވެގެންދާއިރު، ވަޒީފާގެ ފުރުސަތުތައް ވެސް އިތުރުވެގެން ދާނެ ކަމަށް މޭޔަރު ވިދާޅުވިއެވެ.
މި މަޝްރޫއަކީ އައްޑޫސިޓީގެ އިގްތިސާދު އިތުރަށް ފުޅާކުރުމަށް ކުރެވޭ މަސައްކަތުގެ ތެރެއިން ކުރިއަށް ގެންދާ މަޝްރޫއެކެވެ. މި މަޝްރޫއުގެ ދަށުން މަސް ޕްލާންޓްތަކުން ކަނޑުމަސް ގަނެ، ޕްރޮސެސްކޮށް، އަގު އެއްކުރެވޭ މަހުގެ އުފެއްދުންތައް އިތުރުވެގެން ދާނެއެވެ. އަދި މި މަސްޕްލާންޓްތައް ގާއިމުކުރެވޭނީ އައިސް އުފައްދައި މަސް ފިނިކޮށް ބެހެއްޓޭނެ ވަސީލަތްތައް ހިމެނޭ ގޮތަށެވެ. މި މަސްޕްލާންޓުތަކުން މަސް ކިރުމާއި ސާފުކުރުމާއި ފިނިކުރުމާއި ގަނޑުކުރުމާއި ވެކިއުމް ޕެކް ކުރުމާއި ޕެކޭޖް ކުރުމާއި ކޮލިޓީ ޓެސްޓުކުރުމާއި ތަފާތު ވައްތަރުގެ މަސް ޕްރޮސެސްކުރުމުގެ މަސައްކަތްވެސް ކުރެވޭނެއެވެ.
