ލަންކާގައި އެންމެ ފަހުން ކޮވިޑް-19 ކޭސް ފެނުނު މިނުވަންގޮޑާ އާއި ޕެލިޔަގޮޑާ ކްލަސްޓާ އާއި ގުޅުންހުރި 23 ޑިސްޓްރިކްޓަކުން މީހުން ޕޮޒިޓިވް ވެފައިވާ ކަމަށް ރިޕޯޓްތައް ބުނެފިއެވެ.

މިނުވަންގޮޑާ އަދި ޕެލިޔަގޮޑާގެ މަސް މާރުކޭޓުން ފެނުނު ކްލަސްޓާއާއި ގުޅުންހުރި 5731 އަށް މީހަކު ވަނީ ޕޮޒިޓިވް ވެފައެވެ.

ދަ ނެޝަނަލް އޮޕަރޭޝަން ސެންޓަރ ފޯ ދަ ޕްރިވެންޝަން އޮފް ކޮވިޑް-19 (އެންއޯސީޕީސީ) އިން ހާމަކޮށްފައިވާގޮތުން އެންމެ ގިނަ އަދަދެއްގެ މީހުން ޕޮޒިޓިވް ވެފައި ވަނީ ގަމްޕަހަ އަދި ކޮލޮމްބޯ ޑިސްޓްރިކްޓުންނެވެ.

މިހާތަނަށް މި 23 ޑިސްޓްރިކްޓުން 5097 މީހަކު ވަނީ ކޮވިޑް-19 އަށް ޕޮޒިޓިވްވެފައެެވެ. ކަރަންޓީން ސެންޓަރު ތަކުގައި ތިބި 634 މީހަކު ޕޮޒިޓިވް ވެފައިވާ ކަމަށްވަނީ ރިޕޯޓްކޮށްފައެވެ. ލަންކާއިން މީހާތަނަށް ކޮވިޑް-19 އަށް ޕޮޒިޓިވްވި ޖުމްލަ މީހުންގެ އަދަދު ވަނީ 9619 އަށް އަރާފައެވެ.

އެކްޓިވް ކޭސްގެ ގޮތުގައި 5458 ކޭސްއެއް ރިޕޯޓްކޮށްފައިވާއިރު ބަލިން ރަނގަޅުވި މީހުންގެ އަދަދަކީ 4142 އެވެ. އެގަމުން މިހާތަނަށް 19 މީހަކު ވަނީ ވައިރަސްގެ ސަބަބުން މަރުވެފައެވެ.