ރާއްޖޭގައި ކޮވިޑް-19 ގެ ބަލި މީހުންގެ އަދަދު 900ށް ވުރެ ދަށްވެއްޖެއެވެ.

ހެލްތު ޕްރޮޓެކްޝަން އެޖެންސީ (އެޗްޕީއޭ) ގެ ތަފާސް ހިސާބުތަކުން ދައްކާގޮތުގައި ކޮވިޑް-19 ގެ އެކްޓިވް ކޭސްގެ އަދަދު 900ށް ވުރެ ދަށްވެފައިވަނީ މިމަހުގެ 27 ވަނަ ދުވަހު އެވެ. އެދުވަހު އަލަށް 35 މީހުންނަށް ވައިރަސް ޖެހުނުއިރު، 54 މީހުން ވަނީ ބަލިން ރަނގަޅުވެފައެވެ.

ރާއްޖޭގައި މިވަގުތު ކޮވިޑް-19 ޖެހިގެން ރިޕޯޓުކޮށްފައިވާ ޖުމްލަ އަދަދަކީ 11،591 އެވެ. މީގެތެރެއިން 10،685 މީހުން ވަނީ ބަލިން ރަނގަޅުވެފައެވެ. އެހެންކަމުން މިހާރު އެކްޓިވް ކޭސްތަކުގެ ގޮތުގައި ގުނަމުންދަނީ 862 މީހުންނެވެ. މިވަގުތު ހޮސްޕިޓަލްގައި އެޑްމިޓްކޮށްގެން ފަރުވާދެމުން އަންނަނީ 52 މީހަކަށެވެ. އަދި 277 މީހަކު ތިބީ ކަރަންޓީނު ފެސިލިޓީތަކުގައެވެ.

ކޮވިޑް-19 ގެ ބަލި މީހުންގެ އަދަދު ހާހަކަށްވުރެ ދަށްވެފައިވަނީ އޮކްޓޯބަރު މަހުގެ 19 ވަނަ ދުވަހުއެވެ.

ރާއްޖެއިން އެންމެ ފުރަތަމަ ކޮވިޑް-19 ގެ ކޭހެއް ރިކޯޑުކޮށްފައިވަނީ މާޗު މަހުގެ ހަތްވަނަ ދުވަހު އެވެ. އަދި މާލެއިން ކޮވިޑް-19 ގެ ކޭހެއް ރިކޯޑުކޮށްފައިވަނީ އޭޕްރީލް މަހުގެ 15 ވަނަ ދުވަހުއެވެ. އެއާއެކު ވައިރަސް ފެތުރުން ކޮންޓްރޯލް ކުރުމަށް މާލެ ސަރަހައްދު ލޮކްޑައުން ކުރިއެވެ.

ލޮކްޑައުންގައި ގާތްގަނޑަކަށް ދެ މަސް ދުވަސް އޮތުމަށްފަހު ފިޔަވަޅުތަކަށް ލުއިތައް ދޭން ފެށީ މެއި މަހުގެ ފަހުކޮޅުއެވެ. އެއާއެކު މަޑުމަޑުން އަނެއްކާވެސް ކޭސްތައް އިތުރުވާން ފެށިއެވެ. އަދި އޮގަސްޓް މަހު ރިކޯޑިު މިންވަރަކަށް މީހުންނަށް ކޮވިޑް-19 ޖެހުނެވެ. އެގޮތުން އޮގަސްޓް މަހު އެކަނިވެސް 3،900 މީހުންނަށް ކޮވިޑް-19 ޖެހުނެވެ.

ކޮވިޑް-19 ގެ ކޭސްތައް އިތުރުވާން ފެށުމުން ވައިރަސް ފެތުރުން ކޮންޓްރޯލް ކުރުމަށް އިތުރު ފިޔަވަޅުތައް އެޅިއެވެ. އެގޮތުން ރޭގަނޑު 8ން ފެށިގެން ފަތިހު 5ށް ކާފިޔު ގަޑި އިއުލާންކޮށް، ފިހާރަތަކާއި ރެސްޓޯރެންޓްތައް ރޭގަނޑު 10 ޖަހާއިރު ބަންދުކުރާގޮތަށް ހަމަޖެއްސިއެވެ.

އެއާއެކު ކޮވިޑް-19 ގެ ކޭސްތައް ވަނީ ދަށަށްދާން ފަށާފައެވެ. އަދި ސެޕްޓެމްބަރު މަހުން ފެށިގެން ކޭސްތައް ފެންނަ މިންވަރު ދަށަށްގޮސްފައިވާއިރު، އަޅާފައިވާ ފިޔަވަޅުތަކަށްވެސް ވަނީ ލުއިތައް ދީފައެވެ. އެގޮތުން މިހާރު ރޭގަނޑު ކާފިއު ހިންގަނީ 11ން ފެށިގެން ފަތިހު 5ށެވެ.

ސެޕްޓެމްބަރު މަހު ވައިރަސް ޖެހިފައިވަނީ 2،298 މީހަކަށެވެ. އަދި އޮކްޓޯބަރު މަހުގެ މިހާތަނަށް އައިއިރު މި މަސްތެރޭގައި އަލަށް ވައިރަސް ޖެހިފައިވަނީ 122،3 މީހުންނަށެވެ.

ރާއްޖެއިން ކޮވިޑް-19 ޖެހިފައިވާ މީހުންގެ ތެރެއިން 7,395 މީހުންނަކީ ދިވެހިންނެވެ. މިހާތަނަށް އައިއިރު މިބަލީގައި 37 މީހަކު ވަނީ ރާއްޖޭގައި ނިޔާވެފައެވެ.