ރާއްޖޭގެ ކޮންމެ އަތޮޅަކުން ތިމާވެށީގެ ގޮތުން ހިމާޔަތް ކުރާނެ ސަރަހައްދުތައް ކަނޑައެޅުމުގެ މަސައްކަތްތައް ކުރިއަށްދާ ކަމަށާއި، މިހާތަނަށް 23 ސަރަހައްދެއް ހިމާޔަތް ކުރެވިފައިވާ ކަމަށް އެންވަޔަރަމަންޓް މިނިސްޓަރު ޑރ. ހުސެއިން ރަޝީދު ހަސަން ވިދާޅުވެއްޖެއެވެ.

އައްޑޫ ސިޓީ އަދި ފުވައްމުލަކު ސިޓީ ބަޔޮސްފިޔަރ ރިޒާވްގެ ގޮތުގައި ކަނޑައެޅިކަން ޔުނެސްކޯއިން އިއުލާން ކުރުމާއި ގުޅިގެން ބުދަ ދުވަހުގެ ރޭ ބޭއްވި ނޫސްވެރިންގެ ބައްދަލުވުމުގައި މިނިސްޓަރު ވިދާޅުވީ ކޮންމެ އަތޮޅަކުން އެއްރަށް އެއްފަރު އެއްކަނޑޫފާ މަދުވެގެން ހިމާޔަތް ކުރުމަކީ ރައީސް އިބްރާހިމް މުހައްމަދު ސޯލިހުގެ ވައުދުފުޅެއް ކަމަށާއި، އެސިޔާސަތު ތަންފީޒު ކުރުމުގެ މަސައްކަތްތައް ކުރިއަށްދާ ކަމަށެވެ.

މިނިސްޓަރު ވިދާޅުވީ މިހާރު ބޮޑުތިލަދުންމައްޗާއި ހއ. ހދ. ށ. އަދި ނ އަތޮޅު ހިމެނޭ ގޮތުން އަދި ޅ.އަތޮޅުގެ ވެސް ބައެއް ސަރަހައްދުތައް ހިމާޔަތް ކުރެވިފައިވާ ކަމަށެވެ. އެގޮތުން ޖުމްލަ ގޮތެއްގައި 22 ނުވަތަ 23 ސަރަހައްދެއް ހިމާޔަތް ކުރެވިފައިވާކަން މިނިސްޓަރު ފާހަގަކުރެއްވިއެވެ. އަދި މިސަރަހައްދުތަކަކީ މިސަރުކާރުގައި ހިމާޔަތް ކުރެވުނު ސަރަހައްދުތައް ކަމަށް މިނިސްޓަރު ވިދާޅުވިއެވެ.

މިނިސްޓަރު ވިދާޅުވީ ހިމާޔަތް ކުރާ ހުރިހާ ސަރަހައްދެއް ހިމާޔަތް ކުރަނީ ވަރަށް ގިނަ ދިރާސާތައް ކުރުމަށްފަހު ކަމަށާއި، ކަމާބެހޭ ވަރަށް ގިނަ ފަރާތްތަކާއި މަޝްވަރާ ކުރުމަށް ފަހު ކަމަށެވެ.

މީގެ އިތުރުން މިނިސްޓަރު ވިދާޅުވީ މީހުން ދިރިއުޅޭ ރަށެއްގެ ސަރަހައްދެއް ހިމާޔަތް ކުރިކަމުގައިވީ ނަމަވެސް އެރަށެއްގެ ރައްޔިތުންނާއި މަޝްވަރާ ކުރާ ކަމަށެވެ. އަދި ފަޅު ރަށެއް ނަމަވެސް އެރަށް ހިމެނޭ އަތޮޅެއްގެ އަތޮޅު ކައުންސިލްގެ ހިޔާއި މަޝްވަރާ ހޯދާކަން މިނިސްޓަރު ފާހަގަކުރެއްވިއެވެ.