ތޮއްޑޯ އޯޕަންސް 2020 ބެޑްމިންޓަން މުބާރާތުގެ ކުޅުން ފަށައިފިއެވެ.

އއ. ތޮއްޑޫގައި ކުރިއަށްދާ މި މުބާރާތުގެ ކުޅުން ހުކުރު ދުވަހުގެރޭ ފައްޓަވައިދެއްވީ އެ ރަށު ކައުންސިލުގެ ނައިބު ރައީސް ހަސަން އިބްރާހިމެވެ. މި މުބާރާތަކީ ބެޑްމިންޓަން ވޯލްޑް ފެޑެރޭޝަނާއި، ބެޑްމިންޓަން އޭޝިއާ އަދި މޯލްޑިވްސް ބެޑްމިންޓަން އެސޯސިއޭޝަނުގެ އެހީތެރިކަމާއެކު ތޮއްޑޫ ކައުންސިލް އަދި އަސްކަނި ސްޕޯޓްސްއިން އިންތިޒާމުކޮށްގެން ކުރިއަށްގެންދާ މުބާރާތެކެވެ.

މި މުބާރާތަކީ އަންހެން އަދި ފިރިހެން ކުޅުންތެރިންނަށްވެސް ހުޅުވާލައިގެން ކުރިއަށްގެންދާ މުބާރާތެކެވެ. އެގޮތުން ދެ ޖިންސުގައި ޖުމްލަ 53 ކުޅުންތެރިން މި މުބާރާތުގައި ބައިވެރިވެފައިވާއިރު، ކޮންމެ ޑިވިޝަނަކު ތިން ކެޓަގަރީއަކުން މެޗުތައް ކުޅޭނެ ކަމަށް ތޮއްޑޫ ކައުންސިލުން މައުލޫމާތުދެއެވެ.

އަދި މި މުބާރާތް ބޭއްވުމުގެ މައިގަނޑު މަގުސަދަކީ ތޮއްޑޫގައި ބެޑްމިންޓަން ކުޅޭ ޒުވާނުންގެ މެދުގައި އެކުވެރި މާހައުލެއް ގާއިމުކޮށް، ވާދަވެރި މެޗުތަކެއް ކުޅެ، މި މުބާރާތުގެ ސަބަބުން ހުނަރުވެރި ކުޅުންތެރިންތަކެއް އުފެއްދުން ކަމަށްވެސް އެ ކައުންސިލުން މައުލޫމާތުދެއެވެ.

މުބާރާތުގެ ކުޅުން ހުކުރު ދުވަހުގެރޭ ފެށިއިރު، މި މުބާރާތުގެ ފައިނަލް މެޗުތައް ކުޅުމަށް ހަމަޖެހިފައިވަނީ މި މަހުގެ 31 ވަނަ ދުވަހުއެވެ.