ވަޒީފާ އަދާކުރާ ޒުވާނުން ގޭތެރޭގެ މަސައްކަތުގައި ހަރަކާތްތެރި ވަމުން ދަނީ އެންމެ 3 ގަޑިއިރު ކަމަށް ތަފާސް ހިސާބުތަކުން ދައްކައިފިއެވެ.

ނޭޝަނަލް ބިއުރޯ އޮފް ސްޓެޓިސްޓިކްސް (އެންބީއެސް) ގެ ތަފާސް ހިސާބުތައް ދައްކާ ގޮތުން ވަޒީފާގައި މަސައްކަތް ކުރަމުންދާ މީހުން މައިގަނޑު ގޮތެއްގައި ދުވާލަކު 8 ގަޑިއިރު ހޭދަކުރާ އިރު، ގޭތެރޭގައި ހޭދަކުރަނީ 3 ގަޑިއިރު ކަމަށެވެ.

އެންބީއެސްއިން ހާމަ ކޮށްފައިވާ އިތުރު މައުލޫމާތަށް ބަލާ އިރު، ސިވިލް ސާވިސްގެ ވަޒީފާތަކުގައި ގިނައިން ހަރަކާތްތެރި ވަމުން ދަނީ އަންހެނުން ކަމަށެވެ. އެގޮތުން 15-34 އުމުރުފުރައިގެ ސިވިލް ސަރވަންޓުންގެ ޖުމްލަ އަދަދަކީ 2019 ވަނަ އަހަރު 11،671 އެވެ. އަދި އެންމެ ގިނައިން ސިވިލް ސަރވަންޓުގެ ގޮތުގައި މަސައްކަތް ކުރަނީ 30-34 އަހަރާއި ދެމެދުގެ އުމުރުފުރައިގެ މީހުންނެވެ.

ސިވިލް ސަރވިސްގެ ގިނަ ވަޒީފާތަކުގައި މާލެ ސިޓީގެ އިތުރުން އަތޮޅު ތެރޭގައި ގިނައިން ހަރަކާތްތެރި ވަމުން ދަނީ އަންހެން މުއައްޒަފުންނެވެ.