ޒުވާނުންގެ ރައްކާތެރިކަމާއި ގުޅިގެން ރައީސް މަޢުމޫން ޢަބްދުލް ގައްޔޫމުގެ ދަރިކަލުން އަދި ތ. ގުރައިދޫ ދާއިރާގެ މެމްބަރު ޣައްސާން މައުމޫން ދެއްކެވި ވާހަކައަށް ހެންވޭރު ދެކުނު ދާއިރާގެ މެމްބަރ ހުސެއިން ޝަހީމް (އަނދުން ހުސެއިން) ވަރުގަދަ ރައްދެއް ދެއްވައިފިއެވެ.
މެމްބަރު ޝަހީމް ޣައްސާނަށް ރައްދުދެއްވީ 'ވިސްލް ބްލޯވަރ' ގާނޫނުގެ ދަށުން ރައްކާތެރިކަން ލިބެންޖެހޭ ކޮރަޕްޝަން ފަދަ މައްސަލަތައް ފަޅާ އަރުވާލާ ޒުވާނުން ރައްކާތެރި ކުރުމުގައި މި ސަރުކާރުން ފެއިލް ވެފައިވާ ކަމަށް ޢައްސާން ކުރެއްވި ޓްވީޓަކަށެވެ.
ރައްދުގައި ރައީސް މައުމޫންގެ ވެރިކަމުގައި އެމަނިކުފާނު 'މަރަން އޯޑަރު' ދެއްވި ބައެއްގެ ފޮޓޯތަކެއް ހިއްސާ ކުރައްވާ މެމްބަރު ޝަހީމް ވިދާޅުވީ ޒުވާނުންގެ ވާހަކަ ދައްކަވަން ޢައްސާން ލަދުގަންނަން ޖެހޭނެ ކަމަށެވެ.
މިކަން ދޮގުކުރައްވަމުން ޣައްސާން ވަނީ، މިއީ އެމްޑީޕީން ރާއްޖޭގައި ވެރިކަން ކުރާ ދެވަނަ ފަހަރު ކަން ފާހަގަ ކޮށް ރައީސް މައުމޫންގެ މައްޗަށް ކުރެވޭ ތުހުމަތުތައް ތެދު ކަމަށްވާ ނަމަ، ގާނޫނީ ފިޔަވަޅު ނާޅުއްވާނީ ކީއްވެގެންތޯ ސުވާލު އުފައްދަވާފައެވެ.
މިއަށް ރައްދު ދެއްވައި މެމްބަރު ޝަހީމް ވަނީ ޖަލުގައި އަނިޔާވެރި ކޮށް މަރާލާފައިވާ އީވާން ނަސީމްގެ މައްސަލައާއި ގުޅިގެން ރައީސް މައުމޫން ދެއްކެވި ވާހަކަފުޅު ޓުވީޓު މެދުވެރިކޮށް ހިއްސާ ކުރައްވާފައެވެ.
