އަތޮޅުތެރޭގެ ރަށްތަކުން ކޮވިޑް-19 އަށް މިވަގުތު ފަރުވާ ހޯދަމުން ދަނީ 69 ދިވެހިން ކަމަށް ހެލްތު ޕްރޮޓެކްޝަން އެޖެންސީ (އެޗްޕީއޭ) އިން ބުނެފިއެވެ.

އެޗްޕީއޭ އިން އެންމެ ފަހުން އާންމު ކޮށްފައިވާ މައުލޫމާތުތައް ދައްކާގޮތުން އަތޮޅުތަކުން ކޮވިޑްގެ ކޭސްތައް ފެނިފައިވާ 21 ރަށުގެ ތެރެއިން 20 ރަށެއްގައި ދިވެހިން ދަނީ ކޮވިޑަށް ފަރުވާ ހޯދަމުންނެވެ.

އެގޮތުން މާލެ ފިޔަވައި އެންމެ ގިނަ އަދަދަކަށް މިވަގުތު އެކްޓިވް ކޭސްތައް ފެނިފައިވާ، ލ. އަތޮޅު ކައްދޫ އިން 33 ދިވެހިން ދަނީ ކޮވިޑަށް ފަރުވާ ހޯދަމުންނެވެ. މީގެ އިތުރުން ލޯކަލް ޓްރާންސް މިޝަންއެއް ފެނިފައިވާ ކުޅުދުއްފުށީ ސިޓީ އިން މިވަގުތު ކޮވިޑަށް ޕޮޒިޓިވްވެފައި ވަނީ އަށް ދިވެހިންނެވެ.

ހއ. ހޯރަފުށިން ދެ މީހުން ޕޮޒިޓިވްވެފައިވާއިރު، އެއަތޮޅު ދިއްދޫއިން މީހަކު، މިވަގުތު ރާއްޖޭގެ އެކްޓިވް ކޭސްތަކުގެ ގޮތުގައި ގުނޭ އިރު، ހދ. ހަނިމާދޫ، ހދ. ނޮޅިވަރަމް އަދި ހދ. ކުރިނބި، މިއިން ކޮންމެ ރަށަކުން މީހަކު މިވަގުތު ކޮވިޑަށް ފަރުވާ ހޯދަމުންދެއެވެ.

މީގެ އިތުރުން ރ. އަތޮޅު ވާދޫ އިން ހަތަރު ދިވެއްސަކާއި އެ އަތޮޅު ރަސްގަތީމުން ދިވެއްސެއް އަދި ދުވާފަރުން ދެ ދިވެހިން ކޮވިޑަށް ފަރުވާ ހޯދަމުންދާއިރު، ބ. ކެންދޫ، ބ. އޭދަފުށި، ޅ. ކުރެންދޫ، ޅ. ނައިފަރު، ގއ. ކަނޑުހުޅުދޫގެ އިތުރުން ގއ. ކޮލަމާފުށިން އެކަކު ދަނީ ކޮވިޑަށް ފަރުވާ ހޯދަމުންނެވެ. ޏ. ފުވައްމުލަކުން ދެ ދިވެހިން ޕޮޒިޓިވްވެފައިވާ އިރު، ގދ. ތިނަދޫ އަދި ތ. މަޑިފުށިން މިވަގުތު ޕޮޒިޓިވްވެފައި ވަނީ ދެ ދިވެހިންނެވެ. ލ. ގަމުން ތިން ދިވެހިން ދަނީ ކޮވިޑަށް ފަރުވާ ހޯދަމުންނެވެ.

އަތޮޅުތެރޭގެ ރަށްތަކުގެ ތެރެއިން ދެ ރަށަކުން ހަތަރު ބިދޭސީން ދަނީ ކޮވިޑަށް ފަރުވާ ހޯދަމުންނެވެ. އެއީ ކުޅުދުއްފުށިން ޕޮޒިޓިވްވެފައިވާ ތިން ބިދޭސީންނާއި ރ. އުނގޫފާރުން ޕޮޒިޓިވްވެފައިވާ ބިދޭސީއެކެވެ.

ރާއްޖެ އިން މިވަގުތު 988 މީހުން ކޮވިޑަށް ފަރުވާ ހޯދަމުންދާ އިރު، އައިސޮލޭޝަން ފެސިލިޓީތަކުގައި ފަރުވާ ހޯދަމުން ދަނީ 340 މީހުންނެވެ. އަދި ހޮސްޕިޓަލްގައި ފަރުވާ ހޯދަމުން ދަނީ 38 މީހުންނެވެ.