ކޮވިޑް-19 ގެ ބަލި މީހުންނަށް ފަރުވާދޭން ރާއްޖެއަށް ވެންޓިލޭޓަރުތައް ގަތުމުގައި ކޮރަޕްޝަންގައި ބައިވެރިވާ ފަރާތްތައް ކަނޑައެޅިގެން ހޯދި އެ ފަރާތްތަކަށް ހައްގު އަދަބު ދެވި އަދި ދައުލަތަށް ގެއްލުންވި ފައިސާ އަނބުރާ ހޯދެން ދެން ރައްޔިތުންގެ މަޖިލިސް މި މަ އްސަލާގައި ފާރަވެރިވުމަކީ މަޖިލީހުގެ ޤާނޫނީ ވާޖިބެއް ކަމަށް ދެކެވަޑައިގަންނަވާ ކަމަށް ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު ވިދާޅުވެއްޖެއެވެ.
ބުދަ ދުވަހުގެ ޖަލްސާ ފައްޓަވަމުން މި މައްސަލައާއި ގުޅިގެން ވާހަކަ ދައްކަވަމުން ރައީސް ނަޝީދު ވިދާޅުވީ އެންޓި ކޮރަޕްޝަން ކޮމިޝަން (އޭސީސީ) އާއި ޕޮލިސް ގުޅިގެން މިނިސްޓްރީ އޮފް ހެލްތަށް ވެންޓިލޭޓަރު ގަތުމާއި ގުޅޭގޮތުން ހިންގި ތަހުގީގުގަށް ފަހު، ޕްރޮސިކިއުޓަރ ޖެނެރަލް މިވަނީ ޚިލާފު އުފެދިފައި ކަމަށެވެ. އެގޮތުން އޭސީސީ އާއި ޕޮލިސް ގުޅިގެން ހިންގި ތަހުގީގުގައި ޕީޖީއަށް ދައުވާ އުފުލާނެ މިންވަރަށް ގަރީނާއެއް ނެތްކަމަށް ޕީޖީ ވިދާޅުވެފައިވާ ކަމަށް ރައީސް ނަޝީދު ވިދާޅުވިއެވެ. އެހެންކަމުން މި ޚިލާފު އުފެދިފައިވާތީ މަޖިލީހުގެ ޖުޑީޝަރީ ކޮމިޓީން މި މައްސަލަ އިތުރަށް ބެއްލުވުމަށް ރައީސް ނަޝީދު އެދިވަޑައިގެންނެވިއެވެ.
ޤާނޫނު އަސާސީ މި މަޖިލީހާއި ހަވާލުކޮށްފައިވާ ފުޅާ މަސައްކަތް އަދި މަޖިލީހުގެ ހިންގާ ގަވާއިދު ބަޔާންކުރާ ފުޅާ މަސައްކަތް. އަދި ތިޔަ އިއްޒަތްތެރި މެމްބަރުން މަޖިލީހަށް އިންތިޚާބުވެ ވަޑައިގަތުމަށްޓަކައި ރައްޔިތުން ގާތުގައި ތަކުރާރުކޮށް ވިދާޅުވަމުން ގެންދެވި ވާހަކަތަކުގެ އަސާސް. ޚިޔާނާތާއި ވައްކަމާއި މި ބާވަތުގެ ކަންކަން ދައުލަތުގެ އެއްވެސް މުއައްސަސާއެއްގައި އަށަގަނެ ހިނގައި ނުދިޔުމަށް ތިޔަ މެމްބަރުން އަބަދު ވެސް ތިތިއްބަވަނީ ކަމަރު ބަންނަވައިގެން. އެއީ އަޅުގަނޑަށް ލިބޭ ވަރަށް ބޮޑު އުފަލެއް. އަޅުގަނޑު ދެކޭ ގޮތުގައި ރާއްޖޭގެ ރައްޔިތުން 19 ވަނަ މަޖިލިސް މިއީ ތަފާތު މަޖިލީހެއްގެ ގޮތުގައި ދެކެނީ ވެސް މި ސަބަބަށްޓަކައި.ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު
ވެންޓިލޭޓަރު ގެނައުުމުގައި ހެލްތް މިނިސްޓްރީން ގޯސްތަކެއް ހަދާފައިވާ ކަމަށް އޮޑިޓް ރިޕޯޓުން ފާހަގަކޮށްފައިވާ އިރު އެ މައްސަލަ ބެލުމަށް ފަހު އޭސީސީން ދައުވާކުރުމަށް ޕީޖީ އޮފީހަށް ފޮނުވުމުން ޕީޖީ އޮފީހުން ބުނެފައި ވަނީ ޖިނާއީ ދައުވާއެއް ކުރެވޭ ވަރަށް ހެކި ނެތްކަމަށެވެ. އެހެންކަމުން ވެންޓިލޭޓަރު މައްސަލާގައި އެއްވެސް މީހެއްގެ މައްޗަށް ދައުވާ ނުއުފުލުމަށް ޕީޖީ ވަނީ ނިންމާފައެވެ. ނަމަވެސް، އޭސީސީން ބުނެފައި ވަނީ އެ މައްސަލާގައި ދައުވާ ކުރުމަށް ޕީޖީ އޮފީހަށް ފޮނުވީ އެކަށީގެންވާ ވަރަށް ހެކި ހުރެގެން ކަމަށެވެ.
ވެންޓިލޭޓަރުތައް ގަތުމުގައި ހިނގާފައިވާ ކޮރަޕްޝަން މައްސަލާގައި ހެލްތު މިނިސްޓަރ އަބްދުﷲ އަމީންގެ އިތުބާރު ނެތްކަމުގެ މައްސަލަ އެމްޑީޕީގެ 24 މެމްބަރަކު ސޮއިކުރައްވާ މަޖިލީހަށް ހުށަހަޅުއްވާފައި ވަނިކޮށް މިނިސްޓަރ ވަނީ އިސްތިއުފާ ދެއްވާފައެވެ. އަމީންގެ އިސްތިއުފާގެ ސިޓީގައި ވިދާޅުވީ، މިއީ "އަޅުގަނޑަށް އަމާޒުވީ ހަމަލާއެއް" ނޫން ކަމަށާއި، އިސްތިއުފާ ދެއްވަން ނިންމެވީ މަސްލަހަތަށްޓަކައި ކަމަށެވެ.
