ބާސެލޯނާގެ ކެޕްޓަން ލިއޮނެލް މެސީގެ ކުޅުން އަދި އިތުރަށް ރަނގަޅު ކުރެވިދާނެ ކަމަށް އެ ޓީމުގެ ކޯޗު ރޮނާލްޑް ކޫމަން ބުނެފިއެވެ.

މި ނިމުނު ޓްރާންސްފާ ބާޒާރުގައި މެސީ ބާސާ ދޫކޮށްލަން ނިންމި ނަމަވެސް، އޭނާ އެއްބަސްވުމަށް ލުއި ދިނުމަށް ބާސާގެ މެނޭޖުމަންޓުން އެއްބަސްނުވުމާ ގުޅިގެން، މެސީ ވަނީ ނިންމުން ބަދަލުކޮށް މި ސީޒަނުގައި ބާސާގައި މަޑުކޮށްފައެވެ. އަދި ފަހުން މެސީ ވަނީ ބާސާ ދޫކޮށްލަން ކުރި މަސައްކަތުގެ ތެރޭގައި ގޯހެއް ހެދިފައިވާނަމަ އެކަމަކަށް ކުލަބު އެންމެންގެ ކިބައިން މާފަށް އެދި، ބާސާއާއެކު ސުލްޙަވެފައެވެ.

މި ސީޒަނުގައި މިހާތަނަށް ބާސާއިން ސްޕެނިޝް ލީގުގައި ހަތަރު މެޗު ކުޅެފައިވާއިރު، މެސީއަށް ކާމިޔާބުކުރެވިފައިވަނީ އެންމެ ލަނޑެކެވެ. އެ ލަނޑު އޭނާ ކާމިޔާބުކޮށްފައިވަނީ ޕެނަލްޓީއަކުންނެވެ.

ޔުއެފާ ޗެމްޕިއަންސް ލީގުގައި ފެރެންސްވަރޯސްއާ ދެކޮޅަށް ބާސާ ކުޅޭ މެޗުގެ ކުރިން ކޫމަން ބުނީ މެސީއާ މެދު އެއްވެސް ޝަކުވާއެއް ނެތް ކަމަށާއި، އެކަމަކު މި ދަނޑިވަޅުގައި މެސީގެ ކުޅުން އަދި އިތުރަށް ރަނގަޅު ކުރެވިދާނެ ކަމަށެވެ. އަދި މެސީ ކުލަބުގައި ހުރީ އުފަލުން ކަމަށާއި، ކެޕްޓަނެއްގެ ދައުރު އޭނާ އެންމެ ފުރިހަމައަށް އަދާކުރަމުން އަންނަ ކަމަށްވެސް ކޫމަން ވަނީ ބުނެފައެވެ.

ކޫމަން އިތުރަށް ބުނީ ބާސާއަށް ދިމާވެފައިވާ އުނދަގޫ ހާލަތާއެކު މި ސީޒަނުގެ ޗެމްޕިއަންސް ލީގުގައި އެ ޓީމަކީ ފޭވަރިޓުންނެއް ނޫން ކަމަށާއި، އެކަމަކު މުބާރާތުގައި ދެވެން އޮތް އެންމެ ދުރަކަށްދާން މަސައްކަތް ކުރާނެ ކަމަށެވެ. އަދި ޗެމްޕިއަންސް ލީގުގެ ފުރަތަމަ މެޗުގައި ފެރެންސްވަރޯސްއާ ދެކޮޅަށް ނުކުންނައިރު، މި މެޗު އެއްވެސް ހާލަތެއްގައި ފަސޭހަކޮށް ނުނަގާނެ ކަމަށްވެސް ކޫމަން ބުންޏެވެ.

ބާސާގެ ދަނޑުގައި އަންގާރަ ދުވަހުގެރޭ ފެރެންސްވަރޯސްއާ ދެކޮޅަށް ކުޅޭ މެޗު ފަށާނީ ރާއްޖެ ގަޑިން 12:00 ގައެވެ.