ގެސްޓްހައުސްތަކުގެ ގައިޑްލައިންތަކާއި ހިލާފުވެ ރަށެއްގައި ކޮވިޑު ފެތުރިގެން ގޮސްފިކަމުގައިވާނަމަ އެކަމުގެ ނޭދެވޭ އަސަރު މުޅި ރާއްޖެއަށް ކުރާނެ ކަމަށް ހެލްތު އިމަރޖެންސީ އޮޕަރޭޝަން ސެންޓަރ (އެޗްއީއޯސީ)ން ބުނެފިއެވެ.

ހޯމަ ދުވަހުގެ ރޭ އެޗްއީއޯސީން ބޭއްވި ނޫސްވެރިންގެ ބައްދަލުވުމުގައި އެސެންޓަރުގެ ތަރުޖަމާނު ޑރ. ނަޒްލާ ރަފީގު ވިދާޅުވީ ގެސްޓުހައުސްތަކަށް ފަތުރުވެރިން ގެނައުމުގައި ގެސްޓުހައުސްތަކުގެ ވެރިންނާއި، ޓްއަރ އޮޕަރޭޓަރުންގެ ވަރަށް ބޮޑު ޒިންމާއެއް އެބަ އޮތް ކަަމަށެވެ. އެގޮތުން ރާއްޖެއަށް ފަތުރުވެރިން އަންނައިރު އަމަލުކުރަންޖެހޭ އުސޫލާއި، ޓެސްޓު ހަދަން ޖެހޭނީ ކޮންކޮން ހާލަތްތަކުގައިކަން ބުނެދޭން ޖެހޭ ކަމަށް ޑރ. ނަޒްލާ ވިދާޅުވިއެވެ. އަދި ވިދާޅުވީ ރައްކާތެރިވުމުގެ ގޮތުން އަޅާފައިވާ ފިޔަވަޅުތަކާއި، ފަތުރުވެރިން ރާއްޖެއަށް އައުމުގެ ކުރިން އެފަތުރުވެރިންނަށް އަމަލުކުރަން ޖެހޭ ގޮތް އެނގެން ޖެހޭ ކަމަށެވެ.

ރަށުގެ ޓާސްކްފޯސްއާއި ކައުންސިލްގެ ދައުރު ވަރަށް ބޮޑުކަން ފާހަގަކުރައްވައި ޑރ. ނަޒްލާ ވިދާޅުވީ ގެސްޓްހައުސްތައް ހިންގާ ރަށްރަށުގައި އަމަލުކުރަމުން ދަނީ އުސޫލާ އެއްގޮތަށްތޯ ބަލައި ވަރަށް ރަނގަޅަށް މޮނިޓަރކުރަން ޖެހޭ ކަމަށެވެ.

ޑރ. ނަޒްލާ ވިދާޅުވީ ގެސްޓްހައުސްތައް ހުޅުވުމުގެ ހުއްދަ ލިބިގެންދަނީ ވެސް އެ ގެސްޓްހައުސްގެ އޮޕަރޭޓް ކުރާނެގޮތުގެ ކޮވިޑް ސޭފް އޮޕަރޭޝަން ޕްލޭން ހުށަހެޅުން ކަމަށްވާއިރު، އެއާ އެއްގޮތަށް އަމަލުކުރަން ޖެހޭ ކަމަށެވެ. އަދި އެއާ އެއްގޮތަށް އަމަލު ނުކުރާ ކަމަށްވާނަމަ ޓޫރިޒަމް މިނިސްޓްރީގެ އިތުރުން ކަމާބެހޭ އެންމެހާ ފަރާތްތަކުގެ ސަމާލުކަމަށް ގެނައުމަށް ޑރ. ނަޒްލާ ވަނީ އިލްތިމާސްކޮށްފައެވެ.

މީގެ އިތުރުން ޑރ. ނަޒްލާ ވިދާޅުވީ މިބަލިމަޑުކަމާއެކު އިޖްތިމާއި، އިގްތިސާދީ ގެއްލުންތައް ލިބެމުންދާ ކަމަށާއި، ރައްކާތެރިކަމުގެ ފިޔަވަޅުތަކާއެކު ރާއްޖޭގެ އިގްތިސާދު ހުޅުވާލީ މިކަމުން އަރައިގަތުމަށް ކަމަށެވެ.

ޖުލައިމަހުގެ 15 ގައި ރިސޯޓުތައް ހުޅުވާލާފައިވާތީ އެކަމަށް އަލިއަޅުއްވާލައްވާ ޑރ. ނަޒްލާ ވިދާޅުވީ ރިސޯޓުތަކަށް އަންނަ ބައެއް ފަތުރުވެރިން އެރައިވަލްގައި އަދި ބައެއް ހާލަތްތަކުގައި ޑިޕަރޗާ ސާންޕަލްގައި ވެސް ޕޮޒިޓިވްވާ ކަމަށެވެ. ނަމަވެސް ލޯކަލް ޓްރާންސްމިޝަންއަކަށް ނުދާކަން ޑރ. ނަޒްލާ ފާހަގަކުރެއްވިއެވެ.

ޑރ. ނަޒްލާ ވިދާޅުވީ އިތުރު ބަޔަކު ނުރައްކަލަކަށް ހުށަހެޅިގެން ނުދަނީ އުސޫލުގެ ތެރެއިން ކަންކަން ކުރެވިގެންދާތީ ކަމަށެވެ. އަދި ގެސްޓްހައުސްތައް ހުޅުވާލުމުގެ ފުރުސަތު ވެސް ލިބިގެންދިޔައީ ހަރުދަނާ އުސޫލުގެ ތެރެއިން ފަތުރުވެރިކަމުގެ ރިސޯޓުތަކުން އަމަލު ކުރުމުން ކަމަށް ޑރ. ނަޒްލާ ވިދާޅުވިއެވެ.

ރާއްޖޭގައި ބަލި ކޮންޓްރޯލް ކުރުމަށް އަޅާފައިވާ ފިޔަވަޅުތަކާއެކު ކުރަމުންދާ މަސައްކަތްތައް ވަރަށް ގިނަ އިންޓަރނޭޝަނަލް ކޮމިއުޓީތަކުން ބަލައިގަންނަކަން ފާހަގަކުރައްވައި ޑރ. ނަޒްލާ ވިދާޅުވީ ގެސްޓްހައުސްތަކުން ގައިޑްލައިންއާ ހިލާފުވެ ރަށެއްގައި ބަލި ފެތުރިއްޖެކަމުގައިވާނަމަ، އެއިތުބާރު ގެއްލިގެންދާނެ ކަމަށާއި، ވަރަށް ބައިވަރު ނުރަނގަޅު ނަތީޖާތައް ފެނިގެންދާނެ ކަމަށެވެ. އަދި މިއީ ފަތުރުވެރިކަމުގެ ސިނާއަތުގެ އިތުރުން މުޅި ރާއްޖެއަށް ލިބޭނެ ބޮޑު ގެއްލުމެއް ކަމަށް ޑރ.ނަޒްލާ ވިދާޅުވިއެވެ.