ގދ. ތިނަދޫ އައު އިންޖީނު ގޭގެ މަސައްކަތް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކުންފުނި (އެމްޓީސީސީ) ގެ ސަބްސިޑަރީ ކުންފުންޏަކަށް ހަވާލު ކުރީ، އެއީ ފެނަކަ އަށް އެންމެ ރައްކާތެރި ގޮތް ކަމަށްވާތީ ކަމަށް އެ ކުންފުނިން ބުނެފިއެވެ.

އައު އިންޖީނު ގެ އިމާރާތްތަކުގެ ނުނިމި ހުރި މަސައްކަތްތައް އެމްޓީސީސީ ގެ ސަބްސިޑަރީ ކުންފުންޏަކަށް ހަވާލު ކުރުމުގައި، އެ ދެ ކުންފުނިން މަސައްކަތް ހަވާލު ކުރެވިފައިވާ މައުލޫމާތު ސިއްރުކޮށްފައިވާ ކަމަށް ބުނެ ތިނަދޫ އުތުރު ދާއިރާގެ ކުރީގެ މެމްބަރު ސައުދުﷲ ހިލްމީ ރައްޔިތުންގެ މަޖިލީހުގެ ސްޓޭޓް އޯންޑް އެންޓަޕްރައިޒަޒް (އެސްއޯއީ) އަށް ހުށައެޅިފައިވާ ސިޓީއާ ގުޅޭ ގޮތުން މައުލޫމާތު ސާފު ކުރުމަށް ފެނަކަ ކުންފުނީގެ އިސް ބޭފުޅުން ވަނީ ހޯމަ ދުވަހު އެ ކޮމިޓީ އަށް ހާޒިރު ކޮށްފައެވެ.

އެ މައްސަލަ ބަލަން އެކުލަވާލީ ސަބް ކޮމިޓީގައި އެކަމާއި ގުޅޭ ގޮތުން މެންބަރުން ކުރެއްވި ސުވާލަށް ޖަވާބު ދެއްވަމުން ފެނަކަ ކުންފުނީގެ މެނޭޖިން ޑިރެކްޓަރ އަހުމަދު ސައީދު ވިދާޅުވީ، ތިނަދޫ އިންޖީނުު ގޭގެ މަސައްކަތް އެ ކުންފުންޏާ ހަވާލު ކުރި ދުވަހުން ފެށިގެން މިއަދާ ހަމަޔަށްވެސް އޮތީ ބިރުވެރި ކަމެއްގެ ތެރޭގައި ކަމަށެވެ. އެހެންކަމުން ކުންފުނީގެ މެނޭޖްމެންޓުން މަސައްކަތް ކުރީ ހަރުދަނާ ނިޒާމެއްގެ ދަށުން އަލުން އާބާދު ކުރުމަށް ކަމަށެވެ.

ސައީދު ވިދާޅުވީ، ޓެންޑާ ޕްރޮސެސިން ކުރިޔަށް ގެންދިޔުމުގެ މަސައްކަތް ކުންފުނިން ފެށި ކަމަށާއި، ނަމަވެސް ވަގުތަށް ބަލާފައި އެއީ ކުރިޔަށް ގެންދެވޭނެ ކަމަކަށް ނުފެންނާތީވެ އެމްޓީސީސީގެ ސަބްސިޑަރީ ކުންފުންޏަކާއި ހަވާލު ކޮށްގެން ކުރިޔަށް ގެންދަން ނިންމި ކަމަށެވެ. ސައުދުގެ ކުންފުނި, ސްވިފްޓް އިންޖިނިއަރިން ޕްރައިވެޓް ލިމިޓެޑް އަށް މައްސަލައެއްގެ ގޮތުގައި އެ ކުންފުނިން ކުޑަ އަގެއް ހުށައަޅާފައި ވަނިކޮށް ސަރުކާރު ހިއްސާވާ ކުންފުންޏަކަށް މަސައްކަތް ހަވާލު ކުރުމުންނެވެ. ސައީދު ވިދާޅުވީ، ކުންފުނީގެ ނިންމުމަކީ އެއްވެސް ހާލެއްގައި އެއްވެސް ކުންފުންޏެއް ފެއިލް ކޮށްލުމުގެ މަގްސަދުގައި ނިންމި ނިންމުމެއް ނޫން ކަމަށެވެ.

އަލަށް އިންޖީނު ގެ ހަދާ ސަރަހައްދު މިހާރު ހުރި ހާލަތާއި ގުޅޭ ގޮތުން ކޮމިޓީ އަށް މައޫލުމާތު ދެއްވަމުން ފެނަކައިގެ ސީނިއާ އިންޖިނިއަރ އާސިޔަތު އިބްރާހިމް ވިދާޅުވީ، އައު އިންޖީނުގެ މަޝްރޫއު އަކީ އެތައް ފަހަރެއްގެ މަތިން ކުރިޔަށް ގެންދަން ބޭނުންވެ ކުރިޔަށް ނުގެންދެވިފައިވާ މަޝްރޫއެއް ކަމަށާއި، ނަމަވެސް ފެނަކަ އިން މި ފަހަރު ބޭނުންވީ ކޮންމެ ގޮތެއް ހަދާފައި ވެސް މަސައްކަތް ކުރިޔަށް ގެންދަން ކަމަށެވެ.

އިންޖީނުގެ މަޝްރޫއުގެ މަސައްކަތް ކުރިޔަށްދާ ގޮތް ބަލަހައްޓަމުން ގެންދައްވާ އާސިޔާތު ވިދާޅުވީ، އިންޖީނުގެ އިމާރާތް ކުރާ ސައިޓުގައި ކުރިން އެތަނުގެ މަސައްކަތް ހަވާލު ކުރި ފަރާތްތަކުން ގެންދިޔަ ތަކެތި އެބަހުރި ކަމަށެވެ. ނަމަވެސް އެތަކެތި ވެސް ހުރީ ބާވެފައި ކަމަށެވެ. އޭނާ ވިދާޅުވީ، އެހެންކަމުން ސީދާ އެތަނަށް ހޭދަވާނެ ކަމަށް އަންދާޒާކުރި ވަރަށްވުރެ އަގު ބޮޑުވާނެ ކަމަށް ލަފާކުރެވޭ ކަމަށެވެ.

އަގަށް ބަދަލު އައީ ޕްރޮޖެކްޓުގެ ސްކޯޕް އަށް އިތުރު ބަދަލުތަކާއި އެކު ކަމަށެވެ. އަދި އެ މަސައްކަތް ފަހުން ހަވާލުކުރިއިރު ސޭންޑް ވިޗް ޕެނަލްގެ ތިކްނެސް ތަކަށް ބަދަލު ގެނެވިފައިވާ ކަމަށެވެ.

އާސިޔަތު ވިދާޅުވީ، ދެވަނަ ފަހަރު އެ މަސައްކަތް ބަޔަކާއި އިއުލާންކޮށް އެތަނުގެ ސާވޭ ކުރުމަށް ފަހުގައެވެ.

އިންޖީނު ގޭގެ މަސައްކަތް ކުރިޔަށް ނުގޮސް ދިގުލައިގެންދާތީ އެކަމާއި ގުޅޭ ގޮތުން ކޮމިޓީގައި ހިމެނިވަޑައިގަންނަވާ ފޭދޫ ދާއިރާގެ މެމްބަރު ނިހާދު ސުވާލު ކުރެއްވުމުން ސައީދު ވިދާޅުވީ، އިންޖީނު ގޭގެ މަސައްކަތް ނޮވެމްބަރު މަހު ފަށައި، ހަ މަސް ތެރޭގައި މަސައްކަތް ނިންމާލެވޭނެ ކަމަށެވެ.