ގިނަ ސަފާރީތަކެއްގެ އޮޕަރޭޝަން ފެށި، ސަފާރީތަކުގައި ޗުއްޓީ ހޭދަ ކުރަން އަންނަ ފަތުރުވެރިންގެ އަދަދު އިތުރު ވެގެންދާނެ ކަމަށް ލަފާކުރެވެނީ އަންނަ އަހަރުގެ ފަހުކޮޅު ކަމަށް ނޭޝަނަލް ބޯޓިން އެސޯސިއޭޝަން އޮފް މޯލްޑިވްސް (އެންބީއެމް) އިން ބުނެފިއެވެ.

ކޮވިޑް-19 އާ ގުޅިގެން ބޯޑަރުތައް ބަންދު ކުރުމަށް ފަހު އަލުން ހުޅުވާލުމުން މަދު މަދުން ސަފާރީ ތަކުގައި ޗުއްޓީ ހޭދަ ކުރަން އަންނަ ފަތުރުވެރިންގެ އަދަދު ދަނީ އިތުރުވަމުންނެވެ. މި މަހުގެ މިހާތަނަށް 116 ސަފާރީއެއް އޮޕަރޭޓް ކުރުމުގެ ހުއްދަ ޓޫރިޒަމް މިނިސްޓްރީން ވަނީ ދީފައެވެ.

''ރާއްޖެ.އެމްވީ'' އާ ވާހަކަ ދައްކަވަމުން ބޯޓިން އެސޯސިއޭޝަންގެ ރައީސް މުހައްމަދު އަފްރާހު ވިދާޅުވީ، ސަފާރީ ބޯޓުތަކުގައި ޗުއްޓީ ހޭދަ ކުރުމަށް މައިގަނޑު ގޮތެއްގައި އަންނަނީ ޑައިވަރުންގެ އިތުރުން ސާފިން އަށް ދާ މީހުން ކަމަށެވެ.

އަފްރާހު ވިދާޅުވީ، ރާއްޖެ އާދެވެން ފުރުސަތު އޮތިއްޔާ ގިނަ ފަތުރުވެރިންތައް މިހާރު ވެސް އަންނަން ބޭނުންވާ ކަމަށެވެ. ނަމަވެސް ރާއްޖެ އަށް އައުމަށް ފަހު ޕޮޒިޓިވް ވެއްޖެ ނަމަ މަޑުކުރަން ޖެހޭ މުއްދަތާއި އަނބުރާ ގައުމަށް ގޮސް ކަރަންޓީނުވާން ޖެހޭ މުއްދަތުގެ ސަބަބުން ފަތުރުވެރިންނަށް އައުމަށް ދަތިތަކެއް ކުރިމަތިވާ ކަމަށެވެ. އެހެންކަމުން ރާއްޖޭގައި ކަރަންޓީނުވާން ޖެހޭ މުއްދަތަށް ލުޔެއް ހޯދުމަށް ޓޫރިޒަމް މިނިސްޓްރީއާ މަޝްވަރާ ކުރަމުންދާ ކަމަށް ވިދާޅުވިއެވެ.

އަފްރާހު ވިދާޅުވީ، މިހާރު ގިނަ ސަފާރީތައް އޮޕަރޭޓް ކުރަނީ ބޮޑު ޑިސްކައުންޓެއް ދީގެން ކަމަށާއި، ސަފާރީތަކުން ވެސް މަސައްކަތް ކުރަނީ ލިބޭ ބުކިންތައް ކެންސަލްނުކޮށް ކުރިޔަށް ގެންދިޔުން ކަމަށެވެ. މިހާރު އޮޕަރޭޓް ކުރަމުންދަނީ މިދިޔަ އަހަރާއި އަޅައި ބަލާއިރު 50 ޕަސެންޓް ސަފާރީތައްކަން އޭނާ ފާހަގަކުރެއްވިއެވެ.

ކޮވިޑް-19 ގެ ހާލަތާއި ގުޅިގެން ބޯޓިން އިންޑަސްޓްރީ ހިމެނޭ ގޮތަށް ފަތުރުވެރިކަމުގެ ސިނާއަތަށް ވަނީ މީގެ ކުރިން ދުވަހަކުވެސް ދިމާނުވާ ފަދަ ބޮޑު ލޮޅުމެއް އައިސްފައެވެ. އޭގެ ސަބަބުން ގިނަ އަދަދެއްގެ ރިސޯޓްތަކެއް ބަންދުކޮށް ވަޒީފާ އަދާކުރަމުންދާ ފަރާތްތަކަށް އެކަމުގެ އަސަރު ކޮށްފައިވެއެވެ.

އެމްއެމްޕީއާރްސީ އިން ދަނީ ރާއްޖޭގެ ފަތުރުވެރިކަން މިހާރަށްވުރެ ބޮޑަށް ޕްރޮމޯޓް ކުރުމުގެ ގޮތުން ބޮޑެތި ކެމްޕޭނުތައް ހިންގަމުންނެވެ. ނަމަވެސް ފަތުރުވެރިން އައުމުގައި ދިމާވާ އެންމެ ބޮޑު އެއް ގޮންޖެހުމަކީ ކޮވިޑާ ގުޅިގެން ދަތުރުފަތުރުތައް ކުރުމަށް އަޅާފައިވާ ފިޔވަޅުތަކެވެ. އިމިގްރޭޝަންގެ ތަފާސް ހިސާބުތައް ދައްކާ ގޮތުން ބޯޑަރު އަލުން ހުޅުވާލުމަށް ފަހު 26،000 ފަތުރުވެރިން ވަނީ ރާއްޖެ އަށް ޒިޔާރަތް ކޮށްފައެވެ.