ރާއްޖޭގެ އެކި ކަންކޮޅުތަކަށް މިހާރު ކުރަމުންދާ ވިއްސާރަ އާއި ގުޅިގެން ހއ. އަތޮޅުން ފެށިގެން ތ. އަތޮޅާއި ދެމެދު ވައިޓް އެލާޓް މޫސުމާއި ބެހޭ ގައުމީ އިދާރާއިން ނެރެފިއެވެ.

މޫސުމާއި ބެހޭ ގައުމީ އިދާރާއިން ބުނީ ރާއްޖޭގެ އެކި ކަން ކޮޅުތަކަށް މިހާރު ކުރަމުންދާ ވިއްސާރަ އާއި ގުޅިގެން ބުރާސްފަތި ދުވަހުގެރޭ 19:45 އިން ފެށިގެން މެންދަމު 01:45 އާއި ދެމެދު ހއ. އަތޮޅުން ފެށިގެން ތ. އަތޮޅާއި ދެމެދު ވައިޓް އެލާޓް ނެރެފައިވާ ކަމަށެވެ.

މޫސުމާއި ބެހޭ ގައުމީ އިދާރާއިން އިތުރަށް ބުނީ މިހާރު ކުރަމުންދާ ވިއްސާރައިގައި ބޯކޮށް ވާރޭވެހި ގަޑިއަކު 19 މޭލާއި 24 މޭލާއި ދެމެދު ބާރުމިނެއްގައި ވައި ޖެހޭނެ ކަމަށެވެ. އަދި ވިލާގަނޑުގައި 50 މޭލުގެ ބާރު މިނަށް ވައި ގަދަވެ، ކަނޑުތައް ގަދަވާނެ ކަމަށެވެ.

އެހެން ކަމުން ކަނޑު ދަތުރު ކުރާ ފަރާތްތަކުން މޫސުމަށް ހާއްސަ ސަމާލުކަމެއް ދިނުމަށް މޫސުމާއި ބެހޭ ގައުމީ އިދާރާއިން ވަނީ ގޮވާލާފައެވެ.