ކުރިއަށް އޮތް ފަސްއަހަރުގެ މަދަނީ ވައިގެ ދަތުރުފަތުރުގެ ސިޔާސަތު "ފްލައިޓް ޕްލޭން 2020-2025" އެކުލަވާލައި އެއްބަސްވުމުގައި ޓްރާންސްޕޯޓު މިނިސްޓަރު އައިޝަތު ނަހުލާ ސޮއި ކުރައްވައިފިއެވެ.
ބުދަ ދުވަހު ސޮއި ކުރެވުނު މި ސްޓްރެޓެޖިކް ޕްލޭނަކީ ރާއްޖޭގެ މަދަނީ ވައިގެ ދަތުރުފަތުރު ދެމެހެއްޓެނިވި ގޮތެއްގައި ކުރިއެރުވުމަށް ދުރު ރާސްތާ ސިޔާސަތުތަކެއް އެކުލަވާލެވި ކަރުދާހަށް ތިރި ކުރެވުނު ފުރަތަމަ ފަހަރެވެ.
މިއީ އޭވިއޭޝަން ސިނާއަތަށް ލިބުނު ތާރީޚީ ކުރިއެރުމެއް ކަމަށް ޓްރާންސްޕޯޓު މިނިސްޓްރީން ބުނެއެވެ.
ފުރަތަމަ ފަހަރަށް، މަދަނީ ވައިގެ ދަތުރު ފަތުރުގެ ސިނާއަތު ކުރިއެރުވުމަށް ސަރުކާރުންނާއި ވައިގެ ދަތުރުފަތުރުގެ ސިނާއަތުގެ ސިވިލް އޭވިއޭޝަން އޮތޯރިޓީން އިސްކަންދީގެން ކުރާނެ މުހިންމު މަސައްކަތްތަކުގެ މަގު ޗާޓެއް އެކުލަވާލެވިފައިވާކަން ފާހަގަކޮށް މިނިސްޓްރީން ބުނީ އެކުލަވާލެވުނު ޕްލޭންއާއެކު ބައިވެރިންނަށް އެއް މިސްރާބަކަށް ދަތުރު ކުރެވޭނެ މަގު ފަހިކޮށްދޭ ކަމަށެވެ.
ފަސް ތަނބެއްގެ މައްޗަށް ބިނާވެގެން ވާ "ފްލައިޓް ޕްލޭން 2020-2025" ގެ މަގްސަދަކީ ސަލާމަތްތެރިކަމާއެކު ތިމާވެއްޓަށް ރައްކާތެރި ގޮތެއްގައި އަދި އިގްތިސާދީ ގޮތުން ދެމެހެއްޓެނެވި ގޮތެއްގައި ދިވެހިން އެކަކު އަނެކަކާ އަދި ދުނިޔެއާ ގުޅުވާދިނުމެވެ.
