ރައީސް އޮފީހުގެ ކުރީގެ ލީގަލް އެފެއާޒް މިނިސްޓަރ އައިޝަތު އާޒިމާ ޝަކޫރުގެ މައްޗަށް އުފުލާފައިވާ މަނީ ލޯންޑާކުރުމާ ގުޅޭ ދެ ދައުވާގެ ޝަރީއަތުގެ އަޑުއެހުމެއް އާދިއްތަ ދުވަހަށް ކްރިމިނަލް ކޯޓުގައި ތާވަލް ކޮށްފިއެވެ.

އާޒިމާގެ ޝަރީއަތުގެ އަޑުއެހުމެއް ކްރިމިނަލް ކޯޓުގައި އާދިއްތަ ދުވަހަށް ތާވަލް ކޮށްފައިވަނީ މެންދުރުފަހު 13:30 އަށެވެ.

އާޒިމާގެ މައްޗަށް ދައުލަތުން އުފުލާފައިވާ މަނީ ލޯންޑާކުރުމާ ގުޅޭ ދެ ދައުވާގެ ޝަރީއަތުގެ އަޑުއެހުމެއް އެންމެފަހުން ބާއްވާފައިވަނީ މިދިއަ ސެޕްޓެމްބަރު މަހުގެ 27 ވަނަ ދުވަހު އެވެ. އެ ދުވަހުގެ އަޑުއެހުން ބޭއްވި ނަމަވެސް 15 ވަރަކަށް މިނެޓަށް ކުރިއަށް ގެންދިއުމަށްފަހު ނިންމާލާފައިވަނީ އާޒިމާ އެ ދުވަހު 14:00 އަށް ހޮސްޕިޓަލަށް ވަޑައިގަންނަވަން ޖެހޭކަން ކޯޓަށް އަންގާފައިވާތީ އެވެ. ހޮސްޕިޓަލަށް ވަޑައިގެންނެވުމުގެ ފުރުސަތު އާޒިމާއަށް ދެއްވުމުގެ ގޮތުންނެވެ.

އެ ދުވަހުގެ ޝަރީއަތް ފެށުމުގެ ގޮތުން މައްސަލަ ބައްލަވާ ގާޒީ ހަސަން ސައީދު ވިދާޅުވީ، އެ އަޑުއެހުމަށް ވަޑައިގަންނަވަން އުޒުރުވެރިވާ ކަމަށް ވިދާޅުވެ، އާޒިމާގެ ފަރާތުން ކޯޓަށް ސިޓީއެއް ފޮނުވާފައިވާ ކަމަށެވެ. އެކަމާ ގުޅޭ ގޮތުން ދައުލަތުން ވިދާޅުވަނީ ކީކޭތޯ ގާޒީ އެއްސެވުމުން ދައުލަތުގެ ވަކީލާ ވިދާޅުވީ، ސިޓީގައި ވާއެއްޗެއް އެނގިގެން ނޫނީ ދައުލަތަށް ޖަވާބުދޭން ދަތި ކަމަށެެވެ.

އާޒިމާ ގާނޫނީ ވަކީލު، ކުރީގެ ޕްރޮސެކިއުޓަރ ޖެނަރަލް (ޕީޖީ) އޮފީހުގެ އެސިސްޓެންޓް ޕްރޮސެކިއުޓަރ އައިޝަތު ފަޒުނާ އަހުމަދު ވިދާޅުވީ، އޭނާ އާޒިމާގެ ގާނޫނީ ވަކީލުކަމާ ހަވާލުވީ ވަރަށް ފަހުން ކަމަށާއި އެހެންކަމުން، ދެން ބޭއްވޭ ޝަރީއަތުގެ އަޑުހުމަށް ތައްޔާރުވުމަށް ދުވަސްކޮޅެއް ބޭނުންވާ ކަމަށެވެ ނަމަވެސް މި އަހަރުގެ މާރޗު މަހުގެ 8 ވަނަ ދުވަހު ބޭއްވި، އެންމެފަހު އަޑުއެހުމުގައި އާޒިމާއަށް ގާނޫނީ ވަކީލެއް އައްޔަން ކުރުމަށް، މަރޗު މަހުގެ 26 ވަނަ ދުވަހުގެ ނިޔަލަށް ވަނީ ފުރުސަތު ދެއްވާފައެވެ.

ގާޒީ ވިދާޅުވީ، މިހާރުވެސް މި ޝަރީއަތުގެ އަޑުއެހުން ކުރިއަށް ނުގެންދެވި ވަރަށް ގިނަ ދުވަސް ވެފައިވާ ކަމަށެވެ. އާޒިމާގެ ވަކީލު ފަޒްނާ ވިދާޅުވީ 15 ދުވަސް ދެއްވުން އެދޭ ކަމަށެވެ. އަދި އަންނަ އޮކްޓޯބަރު މަހުގެ 11 ވަނަ ދުވަހު ޝަރީއަތުގެ އަޑުއެހުމެއް އޮންނާނެ ކަމަށާއި ދެފަރާތުން ވެސް ތައްޔާރުވެގެން ވަޑައިގެންނެވުމަށެވެ.

އާޒިމާގެ މައްޗަށް ދައުލަތުން އުފުލާފައިވަނީ، ރަސްމީ އިދާރާތަކަށް ދޮގު މައުލޫމާތު ދިނުމުގެ ދައުވާއަކާއި މަނީ ލޯންޑަރިންގއަށް މަގު ފަހިކޮށްދިނުމުގެ ދައުވާ އެކެވެ. މިދެ ދައުވާ ކްރިމިނަލް ކޯޓަށް ބަލައިގެންފައިވަނީ 2019 ފެބްރުއަރީ 17 ވަނަ ދުވަހު އެވެ. މި މައްސަލަ ކްރިމިނަލް ކޯޓުގައި އެކަށީގެންވާ ގޮތެއްގައި ކުރިއަށް ނުގެންދެވި ގޮތެއް ނުނިންމި އޮންނަތާ 19 މަސް ދުވަހަށް ވުރެ ގިނަ ދުވަސް ވެއްޖެ އެވެ. ދޭތެރެއަކުން އަޑުއެހުމެއް ތާވަލް ކުރި ނަމަވެސް އަޑުއެހުން އެކަށީގެންވާ ގޮތެއްގައި ކުރިއަށް ގެންދެވޭ ތަނެއް ނުފެނެއެވެ.