އިންޑިއާއިން ރާއްޖެއަށް ދިން ޑޯނިއަރގެ މަތިންދާ ބޯޓުން އެމްއެންޑީއެފްގެ މަސައްކަތްތަކަށް އިތުރު ލުއި ފަސޭހަކަން ލިބިގެންދާނެ ކަަމަށް ޑިފެންސް މިނިސްޓަރ މާރިޔާ އަހުމަދު ދީދީ ވިދާޅުވެއްޖެއެވެ.
2016 ވަނަ އަހަރުން ފެށިގެން އިންޑިއާ އިން ރާއްޖެއަށް ހޯދުމަށް މަސައްކަތް ކުރި ޑޯނިއަރ މަތިންދާ ބޯޓު އަންގާރަ ދުވަހު ރާއްޖެ އައުމާ ގުޅިގެން މިނިސްޓަރު މާރިޔާ ވިދާޅުވީ ޑޯނިޔަރ މަތިން ބޯޓުގެ ސަބަބުން ރާއްޖޭގެ އިގްތިސާދީ ސަރަހައްދު ބެލެހެއްޓުމަށް ކުރާ މަސައްކަތްތައް އިތުރަށް ފުޅާ ކުރެވިގެންދާނެ ކަމަށެވެ.
މިނިސްޓަރު މާރިޔާ ވިދާޅުވީ އެއްތަނުން އަނެއްތަނަށް ބަލިމީހުން އުފުލުމަށާއި އަދި އެހެނިހެން އިންސާނީ އެހީ ފޯރުކޮށް ދިނުމުގެ މަސައްކަތަށް ލިބުނު ކުރިއެރުމެއް ކަމަށެވެ.
މިއީ އެމްއެންޑީއެފުން ކުރަމުންދާ މަސައްކަތްތަކަށް ލިބުނު އިތުރު ބާރެއް ކަމަށް ވެސް މިނިސްޓަރު މާރިޔާ ވިދާޅުވިއެވެ.
އެމްއެންޑީއެފުން ބުނީ މި މަތިންދާ ބޯޓު ބޭނުން ކުރުމަށް ހަމަޖެހިފައިވަނީ އެމްއެންޑީއެފްގެ ކޯސްޓްގާޑްގެ ބެލުމުގެ ދަށުން، ރާއްޖޭގެ ކަނޑުގެ ސަރަޙައްދު ބެލެހެއްޓުމަށާއި، ރާއްޖޭގެ މަސްކަނޑުތަކުން ގަވާއިދާ ޚިލާފަށް މަސްވެރިކަން ކުރާ ފަރާތްތައް މޮނިޓަރ ކުރުމަށާއި، ރާއްޖޭގެ ކަނޑުގެ ސަރަޙައްދު ބޭނުންކޮށްގެން ކުރެވޭ ޑްރަގްސް އާއި މަނާ އެހެނިހެން ތަކެތީގެ ވިޔަފާރިއާއި އިންސާނީ ވަގުފާރި ހުއްޓުވުމަށާއި، ކަނޑުމަތީގައި ޙާލުގައި ޖެހޭ ފަރާތްތައް ހޯދުމަށް ކަމަށެވެ.
މި ފްލައިޓް ރާއްޖޭގައި އުދުހޭނީ ރާއްޖޭގެ ދިދައާއި ކުލަތަކާއެކު، އެމްއެންޑީއެފްގެ ޕައިލެޓުން ވެސް ޙަރަކާތްތެރިވާ ގޮތަށް ކަމަށް އެމްއެންޑީއެފުން މައުލޫމާތު ދެއެވެ.
