ތ. ވިލިފުށީ ސިއްޚީ މަރުކަޒުގައި ޓެލެކޮންސަލްޓޭޝަން ޚިދުމަތް ތަޢާރަފް ކުރުމަށް ނިންމައިފިއެވެ.
އަންނަ މަހުގެ 1ން ފެށިގެން މި ޚިދުމަތް ސެންޓަރުގައި ދިނުމަށް ނިންމާފައި މިވަނީ ހުޅުމާލެ ހޮސްޕިޓަލާއި ގުޅިގެންނެވެ.
މި ޚިދުމަތާއި އެކު ހުޅުމާލެ ހޮސްޕިޓަލުގައި ތިއްބަވާ އެކިއެކި ބަލިތަކުގެ ސްޕެޝަލިސްޓް ޑޮކްޓަރުންނަށް ކޮންމެ ހަފްތާއަކު ވިލިފުށީ ހެލްތް ސެންޓަރުގައި ތިބެގެން ދެއްކޭނެގޮތް ވަނީ ހަމަޖެހިފައެވެ.
"ރާއްޖެ އެމްވީ" އަށް މައުލޫމާތު ދެއްވަމުން ފިލުފުށީ ހެލްތް ސެންޓަރުގެ މެނޭޖަރ ސިއުތް އިބްރާހިމް ވިދާޅުވީ ޓެލެކޮންސަލްޓޭޝަން އެ ސެންޓަރުގައި ތަޢާރަފް ކުރުމަށް ނިންމާފައި މިވަނީ ކޮވިޑް-19 ގެ ސަބަބުން ސިއްހީ ޚިދުމަތް ހޯދުމަށް އެއްރަށުން އަނެއް ރަށަށް ދަތުރުކުރުމަށް ދަތިވެފައި ވުމާއި ގުޅިގެން ރަށުގައި ތިބެގެން އެކިއެކި ބަލިތަކުގެ ޙާއްސަ ޑޮކްޓަރުންނަށް ދެއްކުމުގެ ފުރުސަތު ހޯދައިދިނުމަށް ކަމަށެވެ.
ޚާއްސަ ޑޮކްޓަރުންނަށް ދެއްކުމުގެ ފުރުސަތު ހުޅުވާލެވިފައިވާ ދާއިރާތަކުގެ ތެރޭގައި ހިމެނެނީ އަންހެނުންގެ ޚާއްސަ ޑޮކްޓަރު، ކަށީގެ ޙާއްސަ ޑޮކްޓަރު، އެތެރެހަށީގެ ޑޮކްޓަރު، ހަމުގެ ބަލިތަކުގެޙާއްސަ ޑޮކްޓަރ، ކުޑަކުދިންގެ ޙާއްސަ ޑޮކްޓަރު، ކަރުންމަތީގެ ޙާއްސަ ޑޮކްޓަރު އަދި ހިތުގެ ބަލީގެ ޙާއްސަ ޑޮކްޓަރެވެ.
ޑޮކްޓަރަށް ދެއްކުމަށް ބޭނުންވާ ފަރާތްތަކުން އެޕޮއިންޓްމަންޓް ހެދުމަށް 6780043 ގުޅުމަށް ވަނީ އެދިފައެވެ.
ސިއުތް ވިދާޅުވީ ކޮންމެ ދުވަހަކު ވެސް 5 ވަރަކަށް ބަލިމީހުން ޑޮކްޓަރަށް ދެއްކުމަށް ކޮންމެ ޑިޕާޓްމަންޓްކުން އަންނާނެ ކަމަށް ބެލެވޭ ކަމަށެވެ. ވިލުފުށީ ސިއްޚީ މަރުކަޒުން ފަރުވާ ހޯދުމަށް ކައިރި ރަށްރަށުގެ މީހުންވެސް އެ ސެންޓަރަށް ދާކަން ފާހަގަ ކުރައްވާ އޭނާ ވިދާޅުވީ އެފަރާތްކަށް ވެސް ހަފްތާއެއް ކުރިން އެޕޮއިންޓްމަންޓް ހެއްދުމުން އޮންލައިން ކޮންސަލްޓޭޝަން ދެވޭނެކަމަށެވެ.
