މޯލްޑިވްސް މީޑިއާ ކައުންސިލް (އެމްއެމްސީ) އިން ކޮންމެ އަހަރަކުވެސް ބާއްވާ ނޫސްވެރިކަމުގެ އިނާމުގެ 2019 އަށް ލިބިފައިވާ ހުށަހެޅުންތައް އިންސާފު ކުރުމަށް ޓަކައި ފަނޑިޔާރުންގެ ޕެނަލެއް ކަނޑައަޅައި އެ ފަރާތްތަކާ އެ މަސައްކަތް ހަވާލުކޮށްފިއެވެ.
ފަނޑިޔާރުންގެ ޕެނަލްގައި ހިމެނިވަޑައިގަންނަވާ 5 ބޭފުޅުންނަކީ ސަރުކާރުގައި 25 އަހަރު ޚިދުމަތް ކުރައްވާފައިވާ އަދި ހާރިޖީ ދާއިރާގައި 18 އަހަރު ހޭދަކުރައްވައިފާ ޢަބްދުالله ނާޝިދާއި، ފޮޓޯ ޖާނަލިސްޓެއްގެ ގޮތުގައި ގިނަ ދުވަސްތަކެއްގައި މަސައްކަތް ކުރައްވައި ތަޖުރިބާ ހޯދާފައިވާ ޢަލީ ނިޝާން އާއި، ޓީވީ މޯލްޑިވްސްގައި ސީނިއަރ އެޑިޓަރެއްގެ ގޮތުގައި ގިނަ ދުވަސްތަކެއް ހޭދަކުރައްވައި ބްރޯޑްކާސްޓިންގ ދާއިރާއިން ގިނަ ތަޖުރިބާތަކެއް ހޯދާފައިވާ މުޙައްމަދު އަފްރާހް އާއި، އިނގިރޭސިވިލާތުގެ ދި މޮންޓްފޯޑް ޔުނިވަރސިޓީއިން ފޮޓޯގްރަފީގެ ދާއިރާއިން މާސްޓަރޒް ހާސިލް ކުރައްވައިފައިވާ އަޝްވާ ފަހީމްއެވެ.
އެމްއެމްސީން ބުނީ އިނާމަށް ނަން ހުށަހެޅުމުގެ މުއްދަތު ހަމަވިއިރު 11 ދާއިރާއަކަށް 80 ހުށަހެޅުން ހުށަހަޅާފައިވާ ކަމަށެވެ. މި ފަހަރުގެ އިނާމަށް އެމްއެމްސީން ހުޅުވާލާފައިވަނީ އަލަށް 2 ދާއިރާއެއް އިތުރު ކުރުމަށްފަހުއެވެ. މި ފަހަރު އަލަށް އިތުރު ކޮށްފައިވަނީ ތަޙްޤީގީ ނޫސްވެރިކަން ނުވަތަ އިންވެސްޓިގޭޓިވް ޖާރނަލިޒަމް އާއި ތިމާވެއްޓާއި ދެމެހެއްޓެނެވި ތަރައްޤީ މި 2 ދާއިރާއެވެ.
ޕްރިންޓް ނުވަތަ އޮންލައިނާއި ބްރޯޑްކާސްޓިންގގެ ކެޓަގަރީ ވަކިން ކުރިޔަށްގެންދާ ގޮތަށް ހަމަޖެހިފައިވާއިރު އެންމެ ގިނަ ހުށަހެޅުން ހުށަހަޅާފައިވަނީ ޕްރިންޓް ނުވަތަ އޮންލައިން ކެޓަގަރީއަށެވެ. މުޅި ޖުމްލަ އެކެޓަގަރީއަށް 61 ހުށަހެޅުމެއް ހުށަަހަޅާފައިވާއިރު ބްރޯޑްކާސްޓިންގ ކެޓަގަރީއަށް 14 ހުށަހެޅުމެއް ވަނީ ހުށަަހަޅާފައެވެ.
ދާއިރާތަކަށް ބަލާއިރު އެންމެ ގިނަ ނޫސްވެރިން ނަން ހުށަހަޅާފައިވާ ދާއިރާ އަކީ ފީޗަރ ނުވަތަ ރިޕޯޓެވެ. އެދާއިރާއަށް އޮންލައިން ނުވަތަ ޕްރިންޓް ކެޓެގަރީން 24 ހުށަހެޅުމެއް ހުށަހެޅިއިރު ބްރޯޑްކާސްޓިންގ ކެޓަގަރީން 5 ނޫސްވެރިއަކު ވަނީ އެދާއިރާއަށް ކުރިމަތިލާފައެވެ. ދެން އެންމެ ގިނަ ނޫސްވެރިން ކުރިމަތިލާފައިވަނީ އިޖުތިމާއީ ދާއިރާއަށެވެ.
އެ ދާއިރާއަށް އޮންލައިން ނުވަތަ ޕްރިންޓްގެ ކެޓަގަރީން 10 ނޫސްވެރިއަކު ކުރިމަތިލާފައިވާއިރު ބްރޯޑްކާސްޓިންގ ކެޓަގަރީން އެއް ނޫސްވެރިއަކު ވަނީ ކުރިމަތިލާފައެވެ. ތިން ވަނަ އަށް އެންމެ ގިނަ ނޫސްވެރިން ކުރިމަތިލާފައިވަނީ ސިޔާސީ ދާއިރާއަށެވެ. އެދާއިރާއަށް އޮންލައިން ނުވަތަ ޕްރިންޓްގެ ކެޓަގަރީން 6 ނޫސްވެރިއަކު ކުރިމަތިލާފައިވާއިރު ބްރޯޑްކާސްޓިންގ ކެޓަގަރީން 3 ނޫސްވެެރިއަކު ވަނީ ކުރިމަތިލާފައެވެ.
މީގެ އިތުރުން ތަހުގީގީ ނޫސްވެރިކަމުގެ ދާއިރާއަށް ބްރޯޑްކާސްޓިންގ ކެޓަގަރީން އެއްވެސް ނޫސްވެރިއަކު ނަން ހުށަހަޅާފައި ނުވާއިރު ޝަރުޢީ އަދި ޤާނޫނީ ދާއިރާއަށް ވެސް ބްރޯޑްކާސްޓިންގ ކެޓަގަރީން އެއްވެސް ނޫސްވެރިއަކު ކުރިމަތިލާފައިނުވެއެވެ. މި ފަހަރު އެންމެ އުންމީދީ ނޫސްވެރިޔާއަށް 5 ނޫސްވެރިއެއް ވަނީ ކުރިމަތިލާފައެވެ. ނޫސްވެރިންގެ އަގު ވަޒަން ކުރުމުގެ ގޮތުން އެމްއެމްސީން އަންނަނީ 2014 ވަނަ އަހަރުން ފެށިގެން ނޫސްވެރިކަމުގެ އިނާމް ދެމުންނެވެ.
