ރާއްޖޭގެ ބޯޑަރުތައް ޖުލައި މަހު ހުޅުވާލިފަހުން 100ށް ވުރެ ގިނަ ރިސޯޓުތަކަށް އަލުން ހުޅުވާލުމުގެ ހުއްދަ ދީފައިވާ ކަމަށް ޓުއަރިޒަމް މިނިސްޓްރީން ބުނެފިއެވެ.

ޓުއަރިޒަމް މިނިސްޓްރީގެ ތަފާސް ހިސާބުތައް ދައްކާގޮތުގައި މިނިސްޓްރީން ވަނީ މިހާތަނަށް 104 ރިސޯޓެއް އަލުން ހުޅުވުމުގެ ހުއްދަދީފައެވެ.

ރިސޯޓުތަކާއި ގުޅިގެން އެމްއެމްޕީއާރުސީން އާއްމުކޮށްފައިވާ ބައެއް މައުލޫމާތުތަކަށް ބަލާއިރު، އަންނަ އޮކްޓޯބަރު މަހުގެ ނިޔަލަށް 94 އިންސައްތަ ރިސޯޓް އަލުން ހުޅުވިގެންދާނެއެވެ.

ޓުއަރިޒަމް މިނިސްޓްރީން ބުނެފައިވަނީ ރާއްޖޭގެ ބޯޑަރުތައް ހުޅުވާލިފަހުން ސެޕްޓެމްބަރު މަހުގެ 15 ވަނަ ދުވަހުގެ ނިޔަލަށް 73 ރިސޯޓެއް އަލުން ހުޅުވުމުގެ ހުއްދަ ދީފައިވާ ކަމަށެވެ. އަދި ސެޕްޓެމްބަރު މަހުގެ 28 ވަނަ ދުވަހު އެއް ރިސޯޓަކަށް އަލުން ހުޅުވާލުމުގެ ހުއްދަދީފައިވާއިރު އޮކްޓޯބަރު މަހުގެ 1 ވަނަ ދުވަހު 18 ރިސޯޓެއް ހުޅުވާލުމުގެ ހުއްދަ މިނިސްޓްރީން ވަނީ ދީފައެވެ.

ކޮވިޑް-19 ޕެންޑަމިކްއާ ގުޅިގެން ދުނިޔޭގެ އިގްތިޞާދު ދަށަށް ގޮސް، ދަތުރުފަތުރު ކުރުމުގެ ނިޒާމަށް ބޮޑެތި ޖޮންޖެހުންތަކެއް ކުރިމަތިވެ، ގައުމުތަކުގެ ބޯޑަރުތައް ބަންދު ކުރުމަށްފަހު، އަލުން ބައެއް ގައުމުތަކުން ވަނީ ބޯޑަރުތައް ހުޅުވާފައެވެ. އެގޮތުން ކޮވިޑް-19 އާގުޅިގެން ރާއްޖޭގެ ބޯޑަރު ބަންދު ކުރީ މިއަހަރުގެ މާރޗު މަހުގެ 27 ވަނަ ދުވަހު އެވެ. އަލުން ބޯޑަރު ހުޅުވީ މިދިއަ ޖުލައި މަހުގެ 15 ވަނަ ދުވަހުއެވެ.