މޯލްޑިވްސް ކަރެކްޝަނަލް ސާވިސްގެ ގައިދީން ބަލަހައްޓާ ހުރިހާ އޮފިސަރުންނަށް ދި ނެލްސަން މަންޑޭލާ ރޫލްސްގެ ތަމްރީނު ޕްރޮގްރާމުތައް އާދިއްތަ ދުވަހު ފެށުމަށް ހަމަޖެހިފައިވާ ކަމަށް އެސިސްޓެންޓް ކޮމިޝަނަރ އޮފް ޕްރިޒަން މުހައްމަދު އާސިފް ވިދާޅުވެއްޖެއެވެ.
"ނެލްސަން މަންޑޭލާ ރޫލްސް،" މި ފޮތަކީ ދެކުނު އެފްރިކާގެ ކަޅު ނަސްލުގެ ފުރަތަމަ ރައީސްކަމުގައިވާ ނެލްސަން މަންޑޭލާގެ ޝަރަފުގައި ލިޔެފައިވާ، އެއިރު ދެކުނު އެފްރިކާގައި ހިނގަމުންދިޔަ ނަސްލީ ތަފާތު ކުރުންތަކާއި ދެކޮޅަށް އޭނާ ކުރެއްވި ބުރަ މަސައްކަތްތައް ފާހަގަކުރުމުގެ ގޮތުން ލިޔެފައިވާ ފޮތެކެވެ.
ނެލްސަން މަންޑޭލާ ރޫލްސްގެ ތަމްރީނު ޕްރޮގްރާމުގެ މައުލޫމާތު ދެއްވަމުން އޭސީޕީ އާސިފް ވިދާޅުވީ، މި ޕްރޮގްރާމަކީ ހޯމް މިނިސްޓްރީގެ އިސްނެންގެވުމާއެކު، ޔުނައިޓެޑް ނޭޝަންސް އޮފީސް އޮން ޑްރަގް އެންޑް ކްރައިމްސް (ޔޫއެންއޯޑީސީ) ގެ ކޮންސަލްޓެންޓެއްގެ އެހީގައި ކުރިއަށް ގެންދެވޭ ޕްރޮގްރާމެއް ކަމަށެވެ. އަދި މި ޕްރޮގްރާމު ކުރިއަށް ގެންދިއުމަށް ނިންމާފައިވަނީ އޮންލައިންކޮށް ކަމަށާއި ފުރަތަމަ ބުރުގައި 30 މުވައްޒަފުން ބައިވެރިވާނެ ކަމަށް އޭނާ ވިދާޅުވިއެވެ.
އާސިފް ވިދާޅުވީ މި ތަމްރީނުތައް ފުރިހަމަކުރުމުން މުވައްޒަފުންގެ ހިތުގައި އުފެދިފައި ހުރި ގިނަ ސުވާލުތަކަށް ޖަވާބު ލިބިގެންދާނެ ކަމަށެވެ. އޭނާ ވިދާޅުވީ ކަރެކްޝަންގެ އޮފިސަރުން ތަމްރީނުކުރަމުންދަނީ ޔޫއެންގެ މިހާރު ހެދިފައިހުރި އުސޫލުތަކާ އެއްގޮތަށް ކަމަށެވެ. ނަމަވެސް އެފަދަ ތަމްރީނުތަކުގައި އޮފިސަރުން ބޭނުންވާ މައުލޫމާތު އެންމެ ފުރިހަމަ ގޮތުގައި ލިބެމުން ގޮސްފައިނުވާ ކަމަށް އޭނާ ވިދާޅުވިއެވެ.
"މުވައްޒަފުން ތަމްރީނުކުރަމުން މިދަނީ ޔޫއެންގެ ހެދިފައިހުރި އުސޫލުތަކާ އެއްގޮތަށް. ނަމަވެސް އޮފިސަރުން ބޭނުންވާ ޑީޓެއިލްސް އަޅުގަނޑުމެންނަށް ނުދެވޭ. ބައެއް ކަހަލަ ސުވާލުތައް އެބަހުރި ޖަވާބު ނުދެވޭ. އެ ޖަވާބުތައް ދިނުން އުނދަގޫ. އަޅުގަނޑު ގަބޫލުކުރަނީ މި ތަމްރީނުތަކުގެ ސަބަބުން އެކަމަށް ހައްލު ލިބޭނެ ކަމަށް."އެސިސްޓެންޓް ކޮމިޝަނަރ އޮފް ޕްރިޒަން މުހައްމަދު އާސިފް
އާސިފް ވިދާޅުވީ ކަރެކްޝަންގެ އަމާޒަކީ މިއަހަރު ނިމުމުގެ ކުރިން ހުރިހާ އޮފިސަރުންނަށް ނެލްސަން މަންޑޭލާ ރޫލްސްއާ ގުޅޭ ތަމްރީނުތައް އެންމެ ފުރިހަމައަށް ފޯރުކޮށްދިނުމަށް މަސައްކަތް ކުރާ ކަމަށެވެ.
ޖަލުތަކުގައި ގައިދީންނާ މެދު އަމަލު ކުރާނެ ގޮތުގެ އެންމެ ދަށް މިންގަނޑުތައް ކަނޑައަޅާފައިވާ ދި ޔުނައިޓެޑް ނޭޝަނަލް ސްޓޭންޑަޑް މިނިމަމް ރޫލްސް ފޯރ ދި ޓްރީޓްމަންޓު އޮފް ޕްރިޒަންސް، ދި ނެލްސަން މަންޑޭލާ ރޫލްސް ފޮތުގެ ދިވެހި ތަރުޖަމާ ރަސްމީކޮށް ކަރެކްޝަނަލް ސާވީސްއާ ހަވާލުކޮށްފައިވަނީ މިދިޔަ ހަފްތާގެ ބުރާސްފަތި ދުވަހުއެވެ. މި ފޮތް ދިވެހި ބަހަށް ތަރުޖަމާ ކޮށްފައިވަނީ ހޯމް މިނިސްޓްރީއާއި ޔޫއެންއޯޑީސީ ގުޅިގެންނެވެ. މިފޮތުގެ ދިވެހި ތަރުޖަމާ ރަސްމީކޮށް ކަރެކްޝަނާ ހަވާލު ކޮށްދެއްވި ހޯމް މިނިސްޓަރު އިމްރާން އަބްދުﷲ އެވެ.
