ލޮނުޒިޔާރަތް ކޮޅު ''ލޮނު ޒިޔާރަތް'' ބަގީޗާ ހުޅުވުން ލަސްވަނީ ކޮވިޑް-19 ގެ ހާލަތާއި ގުޅިގެން ކަމަށް މާލެ ސިޓީ ކައުންސިލުން ބުނެފިއެވެ.
ސިޓީ ކައުންސިލުން ކުރިން ނިންމާފައި އޮތީ ޖުލައި މަހު ބަގީޗާ ހުޅުވުމަށެވެ. އެކަމަކު އެ މުއްދަތު ފަހަނަ އަޅާ ދިޔައިރުވެސް ''ލޮނި ޒިޔާރަތް'' ބަގީޗާއެއް ނުހުޅަވައެވެ.
ހޮނިހިރު ދުވަހު ''ރާއްޖެ.އެމްވީ'' އަށް ދެއްވި އިންޓަވިއުގައި މާލެ ސިޓީ ކައުންސިލްގެ ޑެޕިއުޓީ މޭޔަރު ޝަމާއު ޝަރީފް ވިދާޅުވީ، ބަގީޗާގެ ހުރިހާ މަސައްކަތެއް މިހާރު ނިމިފައިވާ ކަމަށެވެ. މިހާރު ކުރިޔަށް ދަނީ ކުދި ކުދި މަސައްކަތްތައް ކަމަށް އޭނާ ވިދާޅުވިއެވެ.
އެކަމަކު އަދިވެސް ކޮވިޑުގެ ބިރުވެރިކަން އޮތުމުން ބަގީޗާ ހުޅުވަން ލަސް ކުރަން ޖެހުނީ ކަމަށާއި ބަގީޗާ ހުޅުވޭނެ ދުވަހެއް އަދި ވިދާޅުވަން ދަތި ކަމަށް ޝަމާއު ވިދާޅުވިއެވެ.
އަޅުގަނޑުމެން މަސައްކަތް މިކުރަނީ މާލޭގައި ކޮވިޑުގެ ހާލަތު ރަނގަޅުވެ ރައްޔިތުންނަށް ޕާކްތަކަށް ވަދެ އުޅުން ރައްކާތެރި ޔަގީންވާ ދުވަސް ވަރަކަށް. އަޅުގަނޑު ގަބޫލްކުރާ ގޮތުން މާ ގިނަ ދުވަސްތަކެއް ނުވާނެޝަމާއު ޝަރީފް - މާލެ ސިޓީ ކައުންސިލްގެ ޑެޕިއުޓީ މޭޔަރު
"ލޮނުޒިޔާރަތް ބަގީޗާ"އަކީ ގިނަ އަދަދެއްގެ ގަސްތައް ހިމެނޭ ގޮތަށް ތަރައްގީ ކޮށްފައިވާ ރާއްޖޭގައި މިވަގުތު ހުރި އެންމެ ބޮޑު ބަގީޗާއެވެ. އަދި ބަގީޗާގެ ހިތްގައިމުކަން އިހުސާސް ކުރެވޭނީ، އެތަން ޒިޔާރަތް ކޮށްލުމުން ކަމަށާއި، އެ ބަގީޗާގައި ތިބޭއިރު، ބޭރުން ދުއްވާ ވެހިކަލްތަކުގެ އަޑުތައް ކޮންޓްރޯލް ކުރުމަށް ސައުންޑް ޕްރޫފް ކުރުމުގެ ގޮތުން ވެސް ބައެއް ކަންކަން ކޮށްފައިވާނެ ކަމަށް ޝަމާއު ވިދާޅުވި އެވެ.
ބަގީޗާ ބެލެހެއްޓުމުގެ މަސައްކަތަށް މިހާރު ދިވެހި މުވައްޒަފުން ހޯދައި އެކަމަށް އަހުލުވެރި ކުރުމުގެ މަސައްކަތް ކުރަމުންދާ ކަމަށް ސިޓީ ކައުންސިލުން ވަނީ ބުނެފައެވެ. އަދި އެތަނުގެ ސެކިއުރިޓީން 24 ގަޑިއިރު ތިބޭނެ ކަމަށާއި، އެކި ފަރާތުން އެ ބަގީޗާއަށް ވަދެވޭ ގޮތަށް ގޭޓްތައް ހުންނާނެ ކަމަށް ސިޓީ ކައުންސިލުން ބުންޏެވެ.
ލޮނު ޒިޔާރަތްކޮޅުގައި ޕާކެއް ގާއިމު ކުރުމުގެ މަސައްކަތް ފެށީ، މާލެ-ހުޅުމާލެ ބްރިޖްގެ މަސައްކަތް ނިމި، ހުޅުވި ފަހުންނެވެ. ބްރިޖްގެ މަސައްކަތް ކުރިއަށް ދިޔައިރު، އެތަނަކީ، ކޮންޓްސްޓްރަކްޝަން ސައިޓެކެވެ. އެތަން ޕާކެއްގެ ގޮތަށް ތަރައްގީ ކުރުމުގެ މަސައްކަތް ފެށީ މިދިއަ އަހަރުން ފެށިގެންނެވެ.
