ހއ. އުލިގަމުގައި ތަރައްގީ ކުރުމަށް އެމްޓީޑީސީ އާ ހަވާލުކުރި 100 އެނދުގެ ޓޫރިސްޓް ހޮޓަލުގެ މަޝްރޫއަކީ، ކުރިއަށް އޮތްތަނުގައި މި ސަރުކާރުން ހިންގާ މަޝްރޫއުތަކުގެ ތެރެއިން، ވަރަށް ބޮޑު އިސްކަމެއް ދެއްވައިގެން ހިންގާނެ އެއް މަޝްރޫއުކަމަށް ޓޫރިޒަމް މިނިސްޓަރ ޑރ. އަބްދުﷲ މައުސޫމް ވިދާޅުވެއްޖެއެވެ.

އުލިގަމުގައި އެޅުމަށް ހަމަޖެހިފައިވާ 100 އެނދުގެ ހޯޓާ އެޅުމުގެ މަޝްރޫއު ލަސްވާ ސަބަބު އޮޅުން ފިލުވާލުމަށް "ރާއްޖެއެމްވީ" ގުޅުމުން މިނިސްޓަރު މައުސޫމް ވިދާޅުވީ އުލިގަމުގައި 100 އެނދުގެ ހޮޓާ އެޅުމުގެ މަޝްރޫއުއަކީ، މިސަރުކާރުން ކުރިއަށް އޮތްތަނުގައި ހިންގާނެ އަދި އެންމެ އިސްކަމެއް ދެއްވައިގެން ހިންގާ މަޝްރޫއުތަކުގެ ތެރެއިން މަޝްރޫއެއް ކަމަށާއި އޭގެ އިތުރުންވެސް، އުލިގަމަށް އަންނަ ޔޮޓު ފަދަ އުޅަނދުތަކަށް ބޭނުންވާ ހިދްމަތްތައް އިތުރަށް ތަރައްގީ ކުރުމާއި، ބޮޑު ތިލަދުއްމަތީގައި ހަދާފައިވާ އެއަރޕޯޓްތައް އިތުރަށް ތަރައްގީ ކުރުމާއި، އަދި ހަދަމުންދާ އެއަރޕޯޓްތައް ނިންމައި ހުޅުވުމުގެ މަސައްކަތްތައް ވަރަށް ބާރަށް މިސަރުކާރުން ކުރިއަށް ގެންދާ ކަމަށެެވެ.

މީގެ އިތުރުން މިނިސްޓަރު މައުސޫމް ވިދާޅުވީ، އުލިގަމުގައި 100 އެނދުގެ ހޮޓާ އެޅުމުގެ މަޝްރޫއު ވަރަށް އަވަހަށް ފަށައި، އެ މަޝްރޫއުގެ މައުލޫމާތާއި އިތުރު އުފާވެރި ޚަބަރުތައް ކުރިއަށް އޮތް ދުވަސްތަކުގައި ދިވެހި ރައްޔިތުންނަށް ލިބޭނެ ކަމަށެވެ.

ހއ. އުލިގަމުގައި 100 އެނދުގެ ހޮޓަލެއް ތަރައްގީކުރުމަށް އެމްޓީޑީސީ އާއި ހަވާލުކުރިއިރު، ކޮށްފައިވާ އިންވެސްޓްމެންޓް ދެނެގަތުމަށް ކުއަންޓިޓީ ސަރވޭޔަރެއް ހޯދަން ބޭނުންވާ ކަމަށް ޓޫރިޒަމް މިނިސްޓްރީން މީގެ އަހަރެއްހާ ދުވަސްކުރިން އިއުލާންކޮށްފައި ވެއެވެ. އެ މަސައްކަތް ނިމި އެތައް ދުވަހެއްް ވީއިރުބވެސް، އެ ހޮޓަލާ ގުޅޭ އިތުރު އެއްވެސް މަސައްކަތެއް ކުރަމުންނުދާ ކަމަށް އުލިގަމު ކައުންސިލުން ބުނެފައި ވެއެވެ.

އުލިގަމުގައި ސިޓީ ހޮޓަލެއް ތަރައްޤީ ކުރުމަށް މޯލްޑިވްސް ޓޫރިޒަމް ޑިވެލޮޕްމަންޓް ކޯޕަރޭޝަނުން ކޮށްފައިވާ އިންވެސްޓްމަންޓު ދެނެގަތުމަށް ފަހު އެ މަސައްކަތަށް އަލުން ބިޑަށް ހުޅުވާލާނެ ކަމަށް ކުރީގެ ޓޫރިޒަމް މިނިސްޓަރު އަލީ ވަހީދު މިދިއަ 2019 ވަނަ އަހަރުގެ އޮގަސްޓް މަހުގެ ތެރޭގައި ވިދާޅުވެފައި ވެއެވެ. ކުރީގެ ޓޫރިޒަމް މިނިސްޓަރ އަލީ ވަހީދު ވިދާޅުވެފައިވަނީ، ހަރަދުތަކުގެ ތަފްސީލު ދެނެގަތުމަށް ފަހު، އެތަން ތަރައްޤީކޮށް ހިންގަން، ބިޑް އުސޫލުން ބަޔަކާ ހަވާލުކުރަން ނިންމާފައިވާ ކަމަށާއި، އެ މަސައްކަތް އެންމެ ރަނގަޅަށް ކުރަން ބޭނުންވާނަމަ ޚަރަދުތަކުގެ ތަފްސީލު ދެނެގަތުމަކީ މުހިއްމު ކަމެއް ކަމަށެވެ.

އުލިގަމުގައި 100 ކޮޓަރީގެ ޓޫރިސްޓު ހޮޓަލެއް ތަރައްގީ ކުރުމަށް 27 ފެބްރުއަރީ 2007 ގައި އެމްޓީޑީސީ އާއި ކުރެވުނު އެގްރީމަންޓު، 21 ޖުލައި 2015 ގައި ވަނީ ބާތިލް ކޮށްފައެވެ.