"އިންޑިއާ އައުޓް" އޭ ކިޔާ ގޮވަނީ ރާއްޖޭގައި ހަރަކާތްތެރިވާ ދީނީ ހަރުކަށި ފިކުރުތަކަށް ތާއިދު ކުރާ އައިސިސް ނުވަތަ އިސްލާމިކް ސްޓޭޓް ޖަމާޢަތުގެ ސެލްތަކުން ކަމަށް ކުރީގެ ރައީސް އަދި ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވެއްޖެ އެވެ.
އާދިއްތަ ދުވަހު ރައީސް ނަޝީދު ކުރައްވާފައިވާ ޓްވީޓެއްގައި ވަނީ އެކަން މިހާރު ވަރަށް ގިނަ ބައިނަލްއަޤްވާމީ އިދާރާތަކަށް ސާފުވެފައިވާ ކަމަށެވެ. އަދި ޕީޕީއެމް ޕީއެންސީން މި ޝިޔާރު ބޭނުން ކުރަން އެދެނީނަމަ އެ ބާރުދެވެނީ އައިސިސް އިން މި ރާއްޖެ ހިފުމަށް ކަމަށް ރައީސް ނަޝީދު ވިދާޅުވިއެވެ.
ރައީސް ނަޝީދު ޓްވީޓް ކުރައްވާފައި މިވަނީ ރާއްޖޭގައި އިންޑިއާގެ އަސްކަރީ މަރުކަޒެއް ބިނާ ކޮށް އިންޑިއާ އިން ރާއްޖޭގެ އަށް ނުފޫޒް ފޯރުވައި އެ ގައުމުގެ އަޅުވެތިކަމުގެ ދަށަށް ދިވެހިރާއްޖެ ގެންދިއުމަށް މަސައްކަތް ކުރަމުންދާ ކަމަށް ބުނެ "އިންޑިއާ އައުޓް" ގެ ނަމުގައި ސަރުކާރާއި އިދިކޮޅު ފަރާތްތަކުން ހޭޝްޓެގް ބޭނުން ކޮށް ސޯޝަލް މީޑިއާގައި ނުރުހުން ފާޅުކުރަމުންދާ ދަނޑިވަޅެއްގައެވެ.
ނަމަވެސް ސަރުކާރުން ވަނީ އެ ވާހަކަތައް ދޮގުކޮށްފައެވެ. އިންޑިއާ ދެކޮޅަށް އިދިކޮޅުން ދަނީ މަގުމަތީގައި މުޒާހަރާ ވެސް ކުރަމުންނެވެ.
