ރާއްޖޭގައި ފެންނަމުންދާ ކޮވިޑް-19 ކޭސްތައް ފާއިތުވި ހަފްތާގައި ކޮންމެވެސް ވަރަކަށް ދަށްވި ނަމަވެސް، އެއްވުންތައް ބާއްވާ ޙާލަތަށް އަދި ނުދާ ކަމަށް ހެލްތް އިމަރޖެންސީ އޮޕަރޭޝަންސް ސެންޓަރ (އެޗްއީއޯސީ) އިން ބުނެފިއެވެ.
ހޮނިހިރު ދުވަހުގެ ރޭ އެޗްއީއޯސީން ބޭއްވި ނޫސްވެރިންގެ ބައްދަލުވުމުގައި އެ ސެންޓަރުގެ ތަރުޖަމާނު ޑޮކްޓަރ ނަޒްލާ ރަފީޤު ވިދާޅުވީ، ފެންނަމުންދާ ކޭސްތައް ކޮންމެސް މިންވަރަކަށް މަދުވި ނަމަވެސް ރައްކާތެރިކަމުގެ ފިޔަވަޅުތަކަށް ކުޑަކޮށް ވެސް ފަރުވާ ކުޑަ ކުރެވެން ނެތް ކަމަށެވެ.
އެގޮތުން އަދިވެސް މި ބަލި އުޅޭކަން ހަނދާން ކުރަންޖެހޭކަން ފާހަގަ ކުރައްވައި ޑރ ނަޒްލާ ވިދާޅުވީ، ބަލި ފެތުރޭ މިންވަރު އަދިވެސް ދަށަށް ނުދާ ކަމަށެވެ.
އެއާއެކު، މިއީ ޕާޓީތަކާއި އެއްވުންތައް ބާއްވާފަދަ ޙާލަތެއް ނޫން ކަމަށާއި، ޒަރޫރީ ބޭނުމެއްގައި މެނުވީ މިވަގުތު ބޭރަށް ނުނިކުތުމަށް ވެސް ޑރ ނަޒްލާ ވަނީ އިލްތިމާސް ކުރައްވާފައެވެ.
އޭގެ އިތުރުން، އަތޮޅު ތެރެއަށް މިބަލި ފެތުރިގެން ދިޔަ ނުދިނުމަށްޓަކައި އެއްވެސް ރަށަކުން ކަރަންޓީން ނުވަތަ އައިސޮލޭޝަންގެ އުސޫލުތަކާ ޚިލާފުވާނަމަ ލަސްނުކޮށް އެޗްއީއޯސީ އާއި ކަމާބެހޭ ފަރާތްތަކުގެ ސަމާލުކަމަށް އެކަން ގެނައުމަށް ޑރ. ނަޒްލާ ވަނީ އެދިވަޑައިގެންފައެވެ.
