ކުޑަކުދިންގެ ހައްގުތައް ރައްކާތެރިކުރުމުގެ ގާނޫނުގައި ބުނާ ރިހެބިލިޓޭޝަން ޕްރޮގްރާމް ޖޭޖޭޔޫ އިން ހިންގަން ހަމަޖެހިފައިވަނީ މި އަހަރުގެ ނޮވެމްބަރު މަހު ކަމަށް ޖުވެނައިލް ޖަސްޓިސް ޔުނިޓް (ޖޭޖޭޔޫ) އިން ބުނެފިއެވެ.

އެ ގާނޫނުގައިވާ ކަންތައްތަކާއި ގުޅޭ ގޮތުން ހޮނިހިރު ދުވަހު ''ރާއްޖެ.އެމްވީ'' އަށް ދެއްވި އިންޓަވިއުއެއްގައި ޖޭޖޭޔޫގެ ޑިރެކްޓަރ ޖެނެރަލް ފާތިމަތު ރޫނާ ވިދާޅުވީ، އެ އިދާރާ އަށް ހުށައެޅޭ މައްސަލަތަކުގެ ތެރެއިން ގިނަ މައްސަލަތަކަކީ ކުޑަކުދިން ކުދި ކުށްތަަކަށް އަރައި ގަންނަ މައްސަލަތައް ކަމަށެވެ. ގާނޫގައި ބުނާ ގޮތަށް ކުށްތަކަށް އަރައިގަތުމުގެ ކުރިން އެ ކުދިންނަށް ހާއްސަކޮށްގެން ރިހެބިލިޓޭޝަން ޕްރޮގްރާމް ހިންގަން ފެށުމުން ބަދަލުތަކެއް ގެނެވޭނެ ކަން އޭނާ ވަނީ ފާހަގަކޮށްފައެވެ.

ކުޑަކުދިން ކުށް ކުރުން ދުރު ކުރުމަށް ބޭނުންވާ ޕްރޮގްރާމް ހިންގަން ފެށުމުން ކުށުގެ ވެއްޓަށް ހުށައެޅޭ ކުދިންގެ އަދަދު މަދުވެގެންދާނެ ކަމަށް ވެސް ރޫނާ ވިދާޅުވިއެވެ.

މިދިޔަ އަހަރު ފާސް ކުރި ކުޑަކުދިންގެ ހައްގުތައް ރައްކާތެރިކުރުމުގެ ގާނޫނުގެ 109 ވަނަ މާއްދާގެ ހ ގައި ބުނާ ގޮތުން ކުޑަކުދިން ކުށްކުރުމުން ރައްކާތެރިކޮށް ދުރުހެލިކުރުވުމަށްޓަކައި ކަނޑައަޅަން ޖެހޭ ސިޔާސަތުތައް ކަނޑައަޅައި، ކުށަށް އަރައިގަތުމުގެ ނުރައްކަލުގައި ތިބި ކުދިންނަށް ހާއްސަ އެހީތެރިކަމާއި ރައްކާތެރިކަން ދައުލަތުން ފޯރުކޮށްދޭންވާނެ ކަމަށް ވަނީ ބުނެފަ އެވެ. ހަމަ އެގާނޫނުގެ 110 ވަނަ މާއްދާގައި ބުނާ ގޮތުން ދައުލަތުގެ ފަރާތުން ހިންގާ ޕްރޮގްރާމްތައް ހިންގާނީ، ކަމާބެހޭ ފަރާތްތަކުގެ މަޝްވަރާއާއެކު، ޖުވެނައިލް ޖަސްޓިސްއިންނެވެ.

ޖެންޑަރ މިނިސްޓްރީގައި 08 އަހަރަށްވުރެ ގިނަ ދުވަހު މަސައްކަތް ކުރައްވާފައިވާ ރޫނާގެ ނަޒަރުގައި، ގެވެށި އަނިޔާ އާއި ޖިންސީ ގޯނާގެ މައްސަލަތައް އިތުރުވެފައިވާއިރު އެ ކަންތައްތައް ހިނގުމުގެ ކުރިން އެފަދަ އަމަލުތަކަށް ހުށައެޅިގެންދާ ކަހަލަ ކަންތައްތައް ބޮޑެތި މީހުން ނުވަތަ ކުޑަކުދިންގެ ފަރާތުން ފެންނައިރު އެ ފަރާތްތަކަށް އެހީތެރިކަން ފޯރުކޮށްދިނުމުގެ ނިޒާމެއް ގާއިމުކުރަން ޖެހެއެވެ.

ރޫނާ ވިދާޅުވީ، އެ ފެންނަ އަލާމާތްތަކަށް ރަނގަޅަށް އެޑްރެސް ކުރަން ޖެހޭ ކަމަށެވެ.

ޖޭޖޭޔޫ އަށް މިދިޔަ އަހަރު ހުށައެޅުނު މައްސަލަތަަކާއި އޭގެ ކުރީ އަހަރު ހުށައެޅުނު ކުޑަކުދިންނާ ގުޅުން ހުރި މައްސަލަތައް ގިނައެވެ. ނަމަވެސް މިދިޔަ އަހަރު ހުށައެޅުނު މައްސަލަތަކުގެ ތެރެއިން މަސްތުވާތަކެތީގެ މައްސަލަ އާއި ކުޑަކުދިން ސްކޫލަށް ނުދާ މައްސަލަތަކުގެ އިތުރުން މާރާމާރީގެ މައްސަލަތަކެވެ.