ކ. މާލެ
|
12 ސެޕްޓެންބަރ 2020 | ހޮނިހިރު 09:02
ފްރޭމްވަރކް ގައި ސޮއި ކުރުމަށް ބޭއްވި ރަސްމިއްޔާތުގެ ތެރެއިން
ފްރޭމްވަރކް ގައި ސޮއި ކުރުމަށް ބޭއްވި ރަސްމިއްޔާތުގެ ތެރެއިން
މިނިސްޓްރީ އޮފް ޑިފެންސް
ބޭރުގައުމުތަކާއި އޮންނަ ދިފާޢީ އަދި ސަލާމަތީ ގުޅު
ރާއްޖެއާއި އެމެރިކާގެ ދިފާޢީ އަދި ސަލާމަތީ ގުޅުން ވަރުގަދަ ކުރުމަށްޓަކައި ފްރޭމްވާރކެއް އެކުލަވާލައިފި
މިނިސްޓަރ މާރިޔާ މިވަގުތު ހުންނެވީ އަމިއްލަ ދަތުރުފުޅެއްގައި
ފްރޭމްވަރކްގެ ދަށުން ދެޤައުމުގެ ދިފާޢީ އަދި ސަލާމަތީ ދާއިރާގެ އިސްވެރިންގެ މެދުގައި މަޝްވަރާ ބައްދަލުވުންތައް ބޭއްވޭނެ

ދިވެހިރާއްޖެއާއި އެމެރިކާގެ ދިފާޢީ އަދި ސަލާމަތީ ގުޅުން އިތުރަށް ވަރުގަދަ ކުރުމަށްޓަކައި ދެ ޤައުމުގެ ސަރުކާރުން ގުޅިގެން ފްރޭމްވާރކެއް އެކުލަވާލައިފިއެވެ.

އެމެރިކާގައި ބޭއްވި ޙަފްލާގައި "ފްރޭމްވަރކް ފޮރ ޔޫ.އެސް ޑިޕާޓްމަންޓް އޮފް ޑިފެންސް – މޯލްޑިވްސް މިނިސްޓްރީ އޮފް ޑިފެންސް – ޑިފެންސް އެންޑް ސެކިއުރިޓީ ރިލޭޝަންޝިޕް"ގެ ނަމުގައި އެކުލަވާލައިފައިވާ މި ފްރޭމްވާރކާ ބެހޭ އެއްބަސްވުމުގައި ދިވެހިރާއްޖޭގެ ފަރާތުން ސޮއި ކުރައްވާފައިވަނީ، މިނިސްޓަރ އޮފް ޑިފެންސް އަލްއުސްތާޛާ މާރިޔާ އަޙްމަދު ދީދީއެވެ.

އަދި އެމެރިކާ ސަރުކާރުގެ ފަރާތުން، މި އެއްބަސްވުމުގައި ސޮއި ކުރައްވާފައިވަނީ، ޑެޕިއުޓީ އެސިސްޓަންޓް ސެކްރެޓަރީ އޮފް ޑިފެންސް ފޮރ ސައުތު އެންޑް ސައުތު އީސްޓް އޭޝިޔާ، ރީޑް ވަރނަރ އެވެ.

މިކަމާއި ގުޅޭގޮތުން ބޭއްވި ހަފްލާގައި ވާހަކަ ދައްކަވަމުން، މިނިސްޓަރ މާރިޔާ ވަނީ، މި ފްރޭމްވާރކްގެ ސަބަބުން، ދިފާޢީ އަދި ސަލާމަތީ ކަންކަމުގައި، ދެ ޤައުމުގެ ދެމެދުގައި އޮންނަ ވަރުގަދަ ގުޅުމަށް އިތުރު ބާރެއް ލިބިގެންދާނެ ކަމަށް ވިދާޅުވެފައެވެ. އަދި އިންޑޯ-ޕެސިފިކް ސަރަޙައްދާއި އިންޑިއާ ކަނޑުގެ ސަރަޙައްދުގެ ސަލާމަތާއި ރައްކާތެރިކަން ދެމެހެއްޓުމަކީ ދެ ޤައުމުގެ މަޞްލަޙަތާ ގުޅިފައިވާ ކަމަކަށްވާއިރު، ކޯވިޑް-19 ގެ މި ޙާލަތުގައި ވެސް، ކަނޑު ފޭރުމާއި ޓެރަރިޒަމާއި ހަރުކަށި ފިކުރާއި މަސްތުވާތަކެތީގެ ނުރައްކަލާ، ރާއްޖެއިން ކުރިމަތިލާންޖެހިފައިވާ ކަން ވެސް އެކަމަނާ ފާހަގަކުރެއްވި ކަމަށް ޑިފެންސް މިނިސްޓްރީން ބުންޏެވެ.

އެހެންކަމުން، ބައިނަލްއަޤްވާމީ ގޮތުންނާއި ސަރަޙައްދީ ގޮތުން، ދިވެހިރާއްޖެ ފަދަ ކަނޑުގެ ސަރަޙައްދު ބޮޑު ޤައުމަކަށް، ކުރިމަތިވެފައިވާ ގޮންޖެހުންތަކާ ކުރިމަތިލުމުގައި، ދެ ޤައުމުގެ ސަރުކާރުން މަޝްވަރާ ކޮށްގެން ކުރިއަށް ދިޔުން މުހިންމު ކަމަށް އެކަމަނާ ފާހަގަކުރެއްވި ކަމަށް ވެސް މިނިސްޓްރީން ބުންޏެވެ.

މިކަމާއި ގުޅޭގޮތުން މައުލޫމާތު ދެމުން ޑިފެންސް މިނިސްޓްރީން ބުނީ މި ފްރޭމްވާރކްގެ ދަށުން، ދެ ޤައުމުގެ ދިފާޢީ ވުޒާރާ އިން ގުޅިގެން، އިތުރު ޙަރަކާތްތަކެއް ހިންގުމަށް ވަނީ ހަމަޖެހިފައިވާ ކަމަށެވެ.

އެގޮތުން ދެ ޤައުމުގެ ދިފާޢީ އަދި ސަލާމަތީ ދާއިރާގެ އިސްވެރިންގެ މެދުގައި މަޝްވަރާ ބައްދަލުވުންތައް ބޭއްވުމާއި، ދިވެހިރާއްޖޭގެ ދިފާޢީ މުއައްސަސާ އިތުރަށް ހަރުދަނާ ކުރުމާ ބެހޭ ޙަރަކާތްތައް ހިންގުމަށް ފުރުޞަތު ތަނަވަސް ކުރުމާއި، މެރިޓައިމް ސެކިއުރިޓީ ނުވަތަ ކަނޑުމަގުގެ ސަލާމަތާއި ރައްކާތެރިކަން ދެމެހެއްޓުމުގައި އެއްބާރުލުން އިތުރު ކުރުން ހިމެނޭ ކަމަށެވެ. އަދި ނިރުބަވެރިކަމާއި ހަރުކަށި ފިކުރާ ދެކޮޅަށް ކުރާ މަސައްކަތްތައް ހަރުދަނާ ކުރުމާއި، ޤުދުރަތީ ކާރިސާތަކާއި އިންސާނީ އެހީއަށް ބޭނުން ޖެހޭ ޙާލަތްތަކުގައި، ގުޅިގެން އޮޕަރޭޝަންތައް ހިންގުން ފަދަ ކަންކަން ވެސް ހިމެނޭ ކަމަށެވެ.

މިނިސްޓްރީން އިތުރަށް ބުނީ މިނިސްޓަރ މާރިޔާ މިވަގުތު ހުންނެވީ އަމިއްލަ ދަތުރުފުޅެއްގައި އެމެރިކާގައި ކަމަށާއި މި ދަތުރުފުޅަށް ދިވެހި ސަރުކާރުން އެއްވެސް ޚަރަދެއް ކޮށްފައެއް ނުވާނެ ކަމަށެވެ.

- ކޮމެންޓް