ޗެނަލް 13 އިން ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހުގެ ހަށިކޮޅުގައި އަލިފާން ޖަހަން ގޮވާލި ކޮންޓެންޓު ބްރޯޑްކާސްޓް ކުރި މައްސަލައިގައި ބްރޯޑްކާސްޓިންގ ކޮމިޝަނަށް ޖަވާބުދާރީވާން އެންގި ފުރުސަތުތަކުގައި ޖަވާބުދާރީ ވެފައިނުވާތީ މައާފަށް އެދި ބަޔާނެއް އާއްމު ކުރުމުގެ އިންޒާރު ދީފިއެވެ.

ޗެނަލް13 އިން 3 ސެޕްޓެންބަރު ވީ ބުރާސްފަތި ދުވަހުގެ މެންދުރު 13:00 ގައި ބްރޯޑްކާސްޓު ކުރި ރައްޔިތުންގެ އަޑު ޕްރޮގްރާމަށް ގުޅި މީހަކު ވަނީ ރައީސް ސޯލިހުގެ ހަށިކޮޅުގައި އަލިފާން ޖެހުމަށް ގޮވާލާފައެވެ. މި މައްސަލައާ ގުޅިގެން ކޯޓު އަމުރެއްގެ ދަށުން އެ މީހާ ހައްޔަރު ކޮށްފައިވާއިރު ފުލުހުން ދަނީ އިތުރަށް މައްސަލަ ތަހުގީގު ކުރަމުންނެވެ.

މި މައްސަލައާ ގުޅިގެން ބްރޯޑްކޮމް އިން ބުނީ ޗެނަލް 13 އިން ބްރޯޑްކާސްޓް ކުރި ކޮންޓެންޓަކީ، ބްރޯޑްކާސްޓް ކުރުމުގެ ކޯޑް އޮފް ޕްރެކްޓިސްގެ އެއް ވަނަ ހަމައިގެ ދެ ވަނަ ނަންބަރާއި، ބްރޯޑްކާސްޓް ކުރުމުގެ ކޯޑް އޮފް ޕްރެކްޓިސްގެ އެއް ވަނަ ހަމައިގެ ތިން ނަންބަރާ ހިލާފު ކޮންޓެންޓެއް ކަމަށް ކޮމިޝަނުގެ ތަހުގީގަށް ސާބިތުވާ ކަމަށެވެ. އަދި މިއީ ޗެނަލް 13 އިން ބްރޯޑްކާސްޓް ކުރުމުގެ ހަމަތަކާ ހިލާފުވާ ފުރަތަމަ ފަހަރު ނަމަވެސް އެ ޗެނަލް ހިންގާ މީޑިއާ ރިންގް ޕްރައިވެޓް ލިމިޓެޑުން ތަކުރާރުކޮށް ބްރޯޑްކާސްޓް ކުރުމުގެ ގާނޫނާއި ކޯޑް އޮފް ޕްރެކްޓިސްއާ ހިލާފުވަމުން އަންނަ ކަމަށް ވެސް ބްރޯޑްކޮމް އިން ބުނެއެވެ.

މީގެއިތުރުން ބްރޯޑްކޮމް އިން ވަނީ މައްސަލައިގެ ޒާތަށާއި، ހައްސާސް ކަމަށް ބަލައި ގާނޫނާއި ގަވާއިދުގެ އިމުގެ ތެރެއިން ހަރުކަށި ފިޔަވަޅު އަޅާނެ ކަމުގެ އިންޒާރު ދީފައެވެ.

އެގޮތުން އެ މައްސަލާގައި ޗެނަލް 13 އިން މައާފަށް އެދި ބަޔާނެއް ނެރުމަށާއި، އެއްވެސް ޝަރުތެއް ނެތި އެ ބަޔާން 14 ސެޕްޓެންބަރު ވާ ހޯމަ ދުވަހުގެ ކުރިން، ދެ ދުވަހު، "ރައްޔިތުންގެ އަޑު" ޕްރޮގްރާމް ފެށުމުގެ ކުރިންނާއި 14 ސެޕްޓެންބަރު ވާ ހޯމަ ދުވަހުގެ ކުރިން، ދެ ދުވަހު، 20:00 އިން 21:00 އާ ދެމެދުގެ ވަގުތެއްގައި ޗެނަލް 13 އިން އާންމު ކުރުމަށް ބްރޯޑްކޮމް އިން ވަނީ އަންގާފައެވެ.

ބްރޯޑްކޮމް އިން ބުނީ، ބްރޯޑްކާސްޓް ކުރުމުގެ ގާނޫނާއި، ކޯޑް އޮފް ޕްރެކްޓިސްއާ ހިލާފު ކޮންޓެންޓެއް އޮންއެއަރވުމުގެ ފުރުސަތު ނުދިނުމަށް، އޮން-އެއަރ ޕްރޮގްރާމްތަކުގައި ރައްޔިތުންނަށް ފޯނު ކުރާ ފަރާތުން، އެ ރައްޔިތު މީހާ އޮން-އެއަރގައި ސަމާލުވާންވީ ކަންތައްތައް ކިޔާދިނުމަށް ފަހުގައި މެނުވީ ފޯނު ކޯލުތައް އޮން-އެއަރ ކުރެވިގެން ނުވާނެ ކަމަށެވެ.

އެގޮތުން ބްރޯޑްކާސްޓް ކުރުމުގެ ގަވާއިދުގެ 33 ވަނަ މާއްދާގައި ބަޔާންކޮށްފައިވާ ގޮތުގެ މަތިން ލައިވް އިވެންޓްތައް ބްރޯޑްކާސްޓް ކުރުމުގައި ގާނޫނަކާއި ހިލާފު ކޮންޓެންޓެއްގެ ބްރޯޑްކާސްޓް އޮންއެއަރ ވުމުގެ ކުރިން އެފަދަ ކޮންޓެންޓެއް ސެންސަރު ކުރުމަށް މަގުފަހި ކުރުމުގެ ގޮތުން ޑިލޭއަށް ލައިގެން ބްރޯޑްކާސްޓް ކުރެވޭނެ ފަދަ ނިޒާމެއް ގާއިމު ކުރުމަށް ވެސް ބްރޯޑްކޮމް އިން އަންގާފައިވެއެވެ.