ޑޯނިއަރ އެއަރކްރާފްޓް އަދި ހެލިކަޕްޓަރު ދުއްވަން ޕައިލެޓުން އެމްއެންޑީއެފްގެ ތެރެއިން ތަމްރީން ކުރަމުންދާ ކަމަށާއި ތަމްރީން ލިބިފައި ހުރި ދިވެހިން ހޯދަން ގޮންޖެހުން އެބަހުރި ކަމަށް މޭޖަރ ޖެނެރަލް އަބްދުﷲ ޝަމާލް ވިދާޅުވެއްޖެއެވެ.
ޝަމާލް މިހެން ވިދާޅުވީ އާދިއްތަ ދުވަހު ބޭއްވި ނޫސްވެރިންގެ ބައްދަލުވުމުގައި ރާއްޖެއެމްވީން ކުރި ސުވާލަކަށް ޖަވާބު ދެއްވަމުންނެވެ. ހެލިކޮޕްޓަރުތައް ދުއްވުމަށް ދިވެހިން ނުތިބެނީ މުސާރަ ދިނުމުގައި ގޮންޖެހުން ކުރިމަތިވާތީތޯ ސުވާލުކުރުމުން ޝަމާލް ވިދާޅުވީ، އެމްއެންޑީއެފްގައި މިހާރު ތިބި ޕައިލެޓުން އެއަރކްރާފްޓަށް ތަމްރީނު ކުރަމުންދާ ކަމަށެވެ. އެގޮތުން ސީދާ ހެލިކޮޕްޓަރގެ ޓްރެއިނިންގް ހަދާފައި ހުރި ކުއްޖެއް ނެތް ކަމުގައި ވިޔަސް މިހާރު އެ މަސައްކަތް ބާރަށް ކުރަމުންދާކަން ޝަމާލް ފާހަގަކުރެއްވިއެވެ.
ގިނަ ގޮންޖެހުންތަކެއް ހުރިކަން ފާހަގަކޮށް ޝަމާލް އިތުރަށް ވިދާޅުވީ ޕައިލެޓުން ގޮތުގައި ތިބީ "ހައެއްކަ" ކުދިން ކަމަށާއި ތަފާތު އެކަޑެމީތަކުން ތަމްރީން ލިބިފައިވީ ކަމުގައި ވިޔަސް ސީދާ މިހާރު ހުރި އެއަރކްރާފްޓްގެ ރޭޓިންގްއެއް ހަދާފައި ނެތް ކަމަށެވެ. އޭނާ ވިދާޅުވީ އެމްއެންޑީއެފް ތެރެއިން ޕައިލެޓުން ތަމްރީން ކުރަން ނިންމީ ބޭޭރުން ޕައިލެޓުން ހޯދުމަށް ގޮންޖެހުންތަކާއި ދިމާވާތީ ކަމަށެވެ. ޝަމާލް ވިދާޅުވީ ރާއްޖޭގައި ކޮމާރޝަލް ޕައިލެޓުންގެ މުސާރަ އާއި އެމްއެންޑީއެފްއަށް ދެވޭ ވަރާ ފަރުގުތަކެއް އެބަހުރި ކަމަށެވެ.
އެމްއެންޑީއެފްގެ ތެރެއިން ޕައިލެޓުން އުފެއްދުމުގެ މަގްސަދަކީވެސް އަޅުގަނޑުމެންނަށް ބޭރުން އެބަހުރި ގޮންޖެހުންތައް. އެނގިވަޑައިގަންނަވާނެ ފަދައިން ރާއްޖޭގައި ވަރަށް ބޮޑު މާރކެޓެއް އެބައޮތް ކޮމާރޝަލީ މިކަން ކުރޭ އެބަ ވަރަށް ބޮޑަށް، ކުރާއިރު ކޮމާރޝަލް ޕައިލެޓުންގެ މިސާލަކަށް ދަންނަވާކަމުގައިވާނަމަ މުސާރައާއި އަޅުގަނޑުމެންނަށް މިދެވޭ އެއްޗެއްގެ ޗެލެންޖެސްތައް އެބަހުރި. ވަރަށް ބޮޑު މުސާރައަކަށް މިސާލަކަށް ދަތިތަކެކޭ އަޅުގަނޑު މި ދަންނަވަނީ ގާތްގަނޑަކަށް 60،000 - 80،000 ދޭތެރޭ ޕައިލެޓަކަށް މުސާރަ ދޭންޖެހޭ. ދޭއިރުގައި އަޅުގަނޑުމެން އެގޮތަށް ސިފައިންގެ އޮފިސަރަކަށް ނުވަތަ ޕައިލެޓެއްގެ ގޮތުގައި މަސައްކަތް ކުރާ ބޭފުޅަކަށް އެވަރުގެ މުސާރައެއް ދީފިނަމަ އެހެން ދިމާލަށްވެސް މުސާރަ ބޮޑުކޮށްދޭންޖެހޭ. އޭގެތެރޭގައި ލޯޔަރުން ޑޮކްޓަރުން އިންޖީނިއަރުންނާއި ޓެކްނިކަލް ވަރަށް ގިނަ ބަޔަކު ހިމެނޭމޭޖަރ ޖެނެރަލް އަބްދުﷲ ޝަމާލް
ޕައިލެޓަކަށް މުސާރަ ދެވޭ ވަރަށް އެމްއެންޑީއެފުން މުސާރަ ދީފި ކަމުގައިވާނަމަ އެހެން ދާއިރާތަކުންވެސް އޮފިސަރުންނަށް މުސާރަ ބޮޑުކުރަން ޖެހޭނެކަން ފާހަގަކުރައްވައި ޝަމާލް ވިދާޅުވީ މާލީ ގޮތުން ގިނަ ގޮންޖެހުންތަކެއް ވެސް އެބަހުރި ކަމަށެވެ. ނަމަވެސް، މިހާރު ވެސް ތަޖުރިބާ ހުރި ފަރާތްތަކާއި ގައުމީ ދިފާއީ ބާރާއި ގުޅުމަށް މަޝްވަރާ ކުރަމުންދާ ކަމަށް ޝަމާލް ވިދާޅުވިއެވެ.
