ދ.ކުޑަހުވަދޫއިން ކޮވިޑް-19 އަށް ޕޮޒިޓިވްވި އެއް މަހުގެ ތުއްތު ކުއްޖަކަށް ފަރުވާދިނުމަށް ލ.ގަމު ކޮވިޑް ފެސިލިޓީގެ އައި.ސީ.ޔޫގައި އެޑްމިޓްކޮށްފިއެވެ.
ކުޑަހުވަދޫއިން ޕޮޒިޓިވްވި ތުއްތު ކުއްޖާއާއެކު އޭނާގެ މަންމަ އާއި ބައްޕަ އަދި އާއިލާގެ އެހެން މެންބަރެއްވެސް ހިމެނެއެވެ.
ރާއްޖެއެމްވީއަށް މައުލޫމާތު ދެއްވަމުން ގަމު ރީޖަނަލް ހޮސްޕިޓަލްގެ މެނޭޖަރ އަލީ ނަޝީދު ވިދާޅުވީ، އެއް މަހުގެ ތުއްތު ކުއްޖެއް ހޮނިހިރު ދުވަހު ހެނދުނު ގަމު ކޮވިޑް ފެސިލިޓީގެ އައިސީޔޫގައި އެޑްމިޓްކޮށް ފަރުވާދޭން ފަށާފައިވާ ކަމަށެވެ. އަދި އެކުއްޖާ ގަމު ކޮވިޑް ފެސިލިޓީއަށް ގެނެސްފައިވަނީ ހޮޑުލެވި އުނދަގޫވާތީ އިތުރަށް ގޯސްވެދާނެ ކަމަށް ބަލާފައި ކަމަށް މެނޭޖަރު ވިދާޅުވިއެވެ. ނަމަވެސް ދެމައިންގެ ހާލު ރަނގަޅު ކަމަށް އޭނާ ވިދާޅުވިއެވެ.
ނަޝީދު ވިދާޅުވީ، ތުއްތު ކުއްޖާގެ އެހީތެރިއެއްގެ ގޮތުން އޭނާގެ މަންމަ ވެސް ފެސިލިޓީއަށް ބަދަލުކުރެވިފައިވާ ކަމަށާއި އެއީވެސް ޕޮޒިޓިވް ކޭސްއެއް ކަމަށެވެ.
އެއް މަހުގެ ތުއްތު ކުއްޖަކާއި އެކުއްޖާގެ މަންމަ ކޮވިޑަށް ޕޮޒިޓިވްވީ. 1 މަހުގެ ކުއްޖެއް. ހޮޑުލެވޭތީ އިތުރަށް ގޯސްވެދާނެ ކަމަށް ބެލެވޭތީ ފެސިލިޓީއަށް ބަދަލުކުރީ. މިދިޔަ ހޯމަ ދުވަހު ހޯމް ކަރަންޓީނަށް އައި ކުއްޖެއް އެކުއްޖާއަކީ. ސްޓޭބަލް. މަންމައާއި ދަރިފުޅުގެ އިތުރުން ބައްޕަވެސް އަދި ތިން އަހަރުގެ ކުއްޖެއްވެސް ޕޮޒިޓިވްވެފައިވަނީ އެ އާއިލާއިންލ.ގަމު ރީޖަނަލް ހޮސްޕިޓަލްގެ މެނޭޖަރ އަލީ ނަޝީދު
ރާއްޖެއެމްވީއަށް މައުލޫތުމާތު ދެއްވަމުން ދ.ކުޑަހުވަދޫ ކައުންސިލްގެ ރައީސް އަހުމަދު ޝާމް ވިދާޅުވީ، އެރަށުން ކޮވިޑަށް ޕޮޒިޓިވްވި ހަތަރު މީހުންނަކީ މީގެ ވިއްސަކަށް ދުވަސް ކުރިން މާލެއިން ރަށަށް ބަދަލުވި އާއިލާއެއް ކަމަށެވެ. އަދި އެފަރާތުން ބަލި ފެނުނީ ހޯމް ކަރަންޓީނުގައި ތިބުމަށްފަހު ދޫކޮށްލުމަށް ހެދި ޓެސްޓުތަކުން ކަމަށް ޝާމް ވިދާޅުވިއެވެ.
ޝާމް ވިދާޅުވީ ރަށުތެރޭގައި ބަލި އުޅޭ މިންވަރު ދެނެގަތުން ދެ ދުވަސްކުރިން ނެގި 25 ރެންޑޮމް ސާމްޕަލްވެސް ނެގެޓިވް ވެފައިވާ ކަމަށެވެ. އަދި މިވަގުތު ރަށުގެ އާންމު ހާލަތުވެސް ރަނގަޅުކަމަށް އޭނާ ވިދާޅުވިއެވެ.
މާލޭގައި ކޮވިޑް ބަލި ފެތުރުން އިތުރުވެފައިމިވާ ހާލަތުގައި ރާއްޖޭގެ އެކި ރަށްރަށުންވެސް ދަނީ މި ބަލި ފެންނަމުންނެވެ.
ކުޑަހުވަދޫ ކައުންސިލުން ވަނީ އެރަށުގެ އާއިލާއެއް ކޮވިޑް-19 އަށް ޕޮޒިޓިވް ވުމާއި ގުޅިގެން ހެލްތް ޕްރޮޓެކްޝަން އެޖެންސީއާއި ރަށު ކައުންސިލް އަދި ސިއްހީ ހިދުމަތްތެރިން ދެއްވާ އިރުޝާދުތަކާ އެއްގޮތަށް އަމަލުތައް ބެހެއްޓުމަށް ރައްޔިތުންގެ ކިބައިން އެދިފައެވެ.
