ރާއްޖެއިން ކޮވިޑް-19 އަށް ޕޮޒިޓިވްވި މީހުންގެ ޖުމުލަ އަދަދު 8000ން މައްޗަށް އަރައިފިއެވެ.

ހެލްތް ޕްރޮޓެކްޝަން އޭޖެންސީ (އެޗްޕީއޭ) އިން ކޮށްފައިވާ ޓްވީޓެއްގައި ބުނީ، އަންގާރަ ދުވަހު އިތުރު 199 މީހުން ކޮވިޑް-19 އަށް ޕޮޒިޓިވްވެފައިވާ ކަމަށާއި، އޭގެ ތެރޭގައި 145 ދިވެހިން ވެސް ހިމެނޭ ކަމަށެވެ.

އޭގެ އިތުރުން، ބަންގްލަދޭޝް އަށް ނިސްބަތްވާ 42 މީހަކާއި، އިންޑިއާއަށް ނިސްބަތްވާ 5 މީހަކާއި، ސްރިލަންކާއަށް ނިސްބަތްވާ 3 މީހެއް ވަނީ ޕޮޒިޓިވްވެފައެވެ. އަދި އެމެރިކާއަށް ނިސްބަތްވާ 2 މީހުންނާއި، ޗައިނާއަށް ނިސްބަތްވާ މީހަކާއި، ޖަޕާނަށް ނިސްބަތްވާ މީހެއްވެސް އަންގާރަ ދުވަހު ޕޮޒިޓިވްވި މީހުންގެ ތެރޭގައި ހިމެނެއެވެ.

އެޗްޕީއޭއިން ބުނީ، އޭގެ ތެރެއިން 168 މީހުންނަކީ މާލޭ ސަރަޙައްދުން ޕޮޒިޓިވްވި މީހުން ކަމަށެވެ. އަދި 31 މީހުންނަކީ ރަށްރަށުންނާއި، ރިސޯޓުތަކުން ޕޮޒިޓިވްވި މީހުންނެވެ. އެއާއެކު ރާއްޖެއިން ޕޮޒިޓިވްވި މީހުންގެ ޖުމުލަ އަދަދު ވަނީ 8003ށް އަރާފައެވެ.

އެޗްޕީއޭ އިން ބުނީ، ރާއްޖެއިން ކޮވިޑް ޖެހިގެން ރަނގަޅު ވެފައިވަނީ 5265 މީހުން ކަމަށެވެ. އަދި މިވަގުތުގެ އެކްޓިވް ކޭސްތަކުގެ އަދަދަކީ 2703 ކަމަށްވެސް އެޗްޕީއޭ އިން މައުލޫމާތު ދީފައިވެއެވެ.

މި ވަގުތު އައިސޮލޭޝަން ފެސިލިޓީތަކުގައި 1395 މީހުންނަށް ފަރުވާދެމުންދާއިރު، 162 މީހަކަށް ހޮސްޕިޓަލުގައި ދަނީ ފަރުވާދެމުންނެވެ.