ޤާނޫނު ތަންފީޒުކޮށް ނެގެހެއްޓުމުގައި އަންހެނުންގެ ދައުރު އިތުރު ކުރަން ޖެހޭ ކަމަށް ރައީސުލްޖުމްހޫރިއްޔާގެ އަނބިކަނބަލުން މެޑަމް ފަޒްނާ އަހުމަދު ވިދާޅުވެއްޖެއެވެ.
"މޯލްޑިވްސް ވުމެން އިން ޕޮލިސިންގ އެންޑް ޕްރޮޖެކްޓް ގާރޑިއަން" އިފްތިތާހު ކުރުމަށް އަންގާރަ ދުވަހު ބޭއްވި ރަސްމިއްޔާތު ޝަރަފުވެރި ކޮށްދެއްވައި ވާހަކަ ދައްކަވަމުން ފަޒްނާ ވަނީ، ޤާނޫނު ތަންފީޒުކޮށް ނެގެހެއްޓުމުގައި އަންހެނުންގެ ދައުރާއި، އަންހެނުންނާއި ކުޑަކުދިންނާއި އާއިލާތަކަށް ކުރާ އަނިޔާcއިން އެ ފަރާތްތައް ސަލާމަތް ކުރުމުގައި ފުލުހުންގެ ދައުރުގެ މައްޗަށް އަލިއަޅުވާލައްވާފައެވެ. އެގޮތުން ފަޒްނާ ވިދާޅުވީ، ދިވެހި ފުލުހުންނަކީ ޤާނޫނު ތަންފީޒު ކުރުމުގައި އެންމެ ކުރީ ސަފުގައި ހަރަކާތްތެރިވާ ޚިދުމަތްތެރިން ކަމަށެވެ.
ރާއްޖޭގެ ބައެއް ރަށްތަކަކީ ކުދި ކޮމިއުނިޓީއެއްގެ މައްޗަށް އެކުލެވޭ ރަށްތަކެއްކަން ފާހަގަ ކުރައްވައި ފަޒްނާ ވިދާޅުވީ، އެކަމުގެ ސަބަބުން އަނިޔާގެ މައްސަލަތައް ރިޕޯޓް ކުރުމުގައި ދަތިތަކާ ކުރިމަތިވާނެ ކަމަށް ބެލެވޭ ކަމަށެވެ. އެހެން ނަމަވެސް، އެފަދަ ރަށްތަކުގައި ނެއިބަރހުޑް ޕޮލިސިންގ ތައާރަފް ކުރެވިއްޖެނަމަ، މުޖުތަމައުގައި ހިމެނޭ ޓީޗަރުންނާއި، ހެލެތް ވޯކަރުން ފަދަ ޚިދުމަތްތެރިންގެ އެހީގައި ނުރައްކަލަށް ހުށައެޅޭ މީހުން އަވަހަށް ދެނެގަނެވޭނެ ކަމަށެވެ. އަދި އެކަމުގެ ސަބަބުން ރައްކާތެރިކަމުގެ ފިޔަވަޅުތައް އެޅުމަށް ވެސް ފަސޭހަ ވެގެންދާނެ ކަމަށް ފަޒްނާ ވިދާޅުވިއެވެ.
އެހެން ނަމަވެސް، މުޅި ފުލުހުންގެ ޚިދުމަތުގައި އަންހެނުން ހިއްސާ ކުރަނީ 10 އިންސައްތަކަން ފާހަގަ ކުރައްވައި ފަޒްނާ ވިދާޅުވީ، މިއީ ނެއިބަރހުޑް ޕޮލިސިންގ އަށް އޮތް ގޮންޖެހުމެއް ކަމަށެވެ. އެއާއެކު ވެސް، ބޮޑެތި ނިންމުންތައް ނިންމުމުގައި އަންހެނުންގެ ދައުރު އިތުރު ކުރުމަށް ފަޒްނާ ވަނީ ޙިޔާލު ހުށައަޅުއްވާފައެވެ.
އޭގެ އިތުރުން، ފުލުހުންގެ އިންޓެލިޖެންސް އާއި، ފޮރެންސިކްސް އާއި، ޓެރަރިޒަމްގެ މައްސަލަތައް ބެލުމާއި، އެފަދަ އެކި ޑިވިޜަންތަކުން ކުރިއެރުމަށް އަންހެން ފުލުހުންނަށްވެސް މިހާރަށްވުރެ ބޮޑަށް ހިތްވަރުދީ ތަމްރީނު ދިނުމަށް ފަޒްނާ ވަނީ ގޮވާލައްވާފައެވެ.
މިހާރު އަނިޔާގެ މައްސަލަތައް ރިޕޯޓް ކުރާ މިންވަރު އިތުރުކަން ފާހަގަ ކުރައްވައި ފަޒްނާ ވިދާޅުވީ، އެކަމުން ދޭހަވަނީ ކުރިއާ ޚިލާފަށް މިހާރު އާންމު ރައްޔިތުންގެ މެދުގައި އޮންނަ ހޭލުންތެރިކަން އިތުރުވެ، ފުލުހުންނާއި ދައުލަތުގެ އިދާރާތަކުން އެކަންކަމަށް ޙައްލެއް ހޯދައިދިނުން ރައްޔިތުން އެދޭ މިންވަރު ކަމަށެވެ.
މާޒީގައި ކަންކަން ހިނގާފައިވާ ގޮތަށް ބަލާއިރު، މިބާވަތުގެ ކަންކަން ރިޕޯޓް ކުރުމަކީ އާންމު ކަމެއް ނޫން، މިކަންކަން ވެފައި އޮންނަނީ އާއިލާ ތެރޭގައިވެސް އޮންނަ ބޮޑު ސިއްރެއްގެ ގޮތުގައި، އަދި އެކި ސަބަބުތަކާހުރެ އަނިޔާ ކުރުމަކީ މާބޮޑު ކަމެއްގެ ގޮތުގައި ބެލި، އެކަންކަން ހުއްޓުވުމަށް މަސައްކަތް ކުރެވިފައެއް ނެތް، ނަމަވެސް ރޭޕް، ޖިންސީ އަނިޔާ، ފުރައްސާރަ، އަންހެނުންނާއި ކުޑަކުދިންނަށް ކުރާ އަނިޔާތަކުގެ މައްސަލަތައް މިހާރު ހުށައެޅޭ މިންވަރު މަތި،ފަރސްޓްލޭޑީ ފަޒްނާ އަހުމަދު
ފަޒްނާ ވިދާޅުވީ، އަންހެނުންނާއި ކުޑަކުދިންނަށް ކުރާ އަނިޔާއާއި، އާއިލާތަކަށް ކުރިމަތިވާ އަނިޔާ ހުއްޓުވުމުގައި އެންމެ ކުރީ ސަފުގައި މަސައްކަތް ކުރާ އެއް ބަޔަކީވެސް ފުލުހުން ކަމަށެވެ.
