ފާއިތުވި ހަފްތާގައި ކޮވިޑް-19 ގެ ކޭސްތައް އިތުރުވުމާއި ގުޅިގެން ހެލްތް އިމަރޖެންސީ އޮޕަރޭޝަން ސެންޓަރުން އަޅާފައިވާ ފިޔަވަޅުތައް އިތުރަށް ހަރުދަނާކޮށްފައިވާއިރު ރައީސުލް ޖުމްހޫރިއްޔާ އިބްރާހީމް މުހައްމަދު ސޯލިހްގެ އިރުޝާދުގެ ދަށުން އެޗްއީއޯސީގެ މަސައްކަތްތައް މިހާރު ކުރިއަށްދަނީ ނައިބު ރައީސް ފައިސަލް ނަސީމްގެ ބެއްލެވުމުގެ ދަށުން ކަމަށް ރައީސް އޮފީހުން ބުނެފިއެވެ.

ރައީސް އޮފީހުން ފާއިތުވި ހަފްތާގައި ކޮށްފައިވާ މަސައްކަތްތަކަށް އަލިއަޅުވާލާ ނެރުނު ވީޑިއޯއެއްގައި ބުނެފައިވަނީ ކޮންމެ ދުވަހެއްގެ މެންދުރު ކުރީގައި ބާއްވާ ހެލްތް އިމަރޖެންސީ ކޮޑިނޭޝަން ކޮމެޓީގެ ބައްދަލުވުމުގެ ރިޔާސަތު ބަހަލައްޓަވަނީ ނައިބު ރައީސް ކަމަށެވެ.

އާންމުކޮށް މި ކޮމެޓީގެ ބައްދަލުވުމުގައި ބައިވެރިވަނީ ސަރުކާރުގެ އެކި މުއައްސަސާތަކުގެ އިސްވެރިންނެވެ. އެގޮތުން ފުލުހުންނާއި އެލްޖީއޭއާ އައިޖީއެމްއެޗް، ފިނޭންސް މިނިސްޓްރީގެ އިތުރުން ޓޫރިޒަމް މިނިސްޓްރީން ވެސް މި ބައްދަލުވުންތަކުގައި ބައިވެރިވެއެވެ.

މި ބައްދަލުވުންތައް ކޮންމެ ދުވަހަކު ވެސް ކުރިއަށްދަނީ 11:00ން 12:00ށެވެ. ކޮޑިނޭޝަން ކޮމެޓީގެ ބައްދަލުވުން މިއަދު ބާއްވާފައިވާއިރު މި ބައްދަލުވުމުގައި މައިގަނޑު ގޮތެއްގައި މަޝްވަރާ ކުރެވުނީ ހޮސްޕިޓަލުގެ އެނދުތައް އިތުރު ކުރުމަށާއި ގުޅީފަޅުގައި ހުރި ފެސިލިޓީ އިންސްޕެކްޓްކޮށް މީހުން އެތަނެއް ގެންދެވޭނެ ގޮތެއް ހަމަޖެއްސުމަށާއި ފަރުކޮޅުފުށި ފެސިލިޓީގެ އޮޕަރޭޝަންތައް ރަސްމީކޮށް ފެށުމަށް ކަމަށް އެޗްއީއޯސީން މައުލޫމާތުދެއެވެ. މީގެއިތުރުން ރިޓަޔަރކޮށްފައި ތިބި ލެބްރޯޓަރީ ޓެކްނީޝަނުންނާއި ނަރުހުން ހިދުމަތަށް ގެނައުމަށް މަޝްވަރާ ކުރެވުނު ކަމަށް ވެސް އެޗްއީއޯސީން މައުލޫމާތުދެއެވެ.

ހެލްތް އިމަރޖެންސީ ކޮޑިނޭޝަން ކޮމެޓީގެ ބައްދަލުވުމުގެ ރިޔާސަތު ނައިބު ރައީސް ބައްލަވާއިރު އެޗްއީއޯސީން އަންނަނީ ނޫސްވެރިންގެ ބައްދަލުވުންތައް ބާއްވާ ރާއްޖޭގެ ހާލަތާއި ގުޅޭ މައުލޫމާތު ފޯރުކޮށްދެމުންނެވެ.